സ്‌കോർപിയോ ഇടിച്ച് അമ്മയെ കൊലപ്പെടുത്തി, ആശ്രിത നിയമനത്തിലൂടെ സർക്കാർ ജോലി തട്ടാൻ 7 ലക്ഷത്തിന്റെ ക്വട്ടേഷൻ; യുവതി അറസ്റ്റിൽ | Neeraj Sharma Jaipur murder

ജയ്പൂർ: അച്ഛന്റെ മരണത്തെത്തുടർന്ന് അമ്മയ്ക്ക് ലഭിച്ച സർക്കാർ ജോലിയും കുടുംബ സ്വത്തും തട്ടിയെടുക്കാൻ മകൾ ആസൂത്രണം ചെയ്ത ക്രൂരമായ കൊലപാതകത്തിന്റെ ഞെട്ടിക്കുന്ന വിവരങ്ങൾ പുറത്ത്(Neeraj Sharma Jaipur murder). റോഡപകടമെന്ന് തോന്നിപ്പിക്കും വിധം 130 കിലോമീറ്റർ വേഗതയിൽ സ്‌കോർപിയോ എസ്.യു.വി ഇടിച്ചുകയറ്റിയാണ് കോടതി ജീവനക്കാരിയായ 45കാരിയെ കൊലപ്പെടുത്തിയത്. ക്വട്ടേഷൻ സംഘത്തെ വിലയ്‌ക്കെടുത്തായിരുന്നു ക്രൂരകൃത്യം നടത്തിയത്. സംഭവത്തിൽ കൊല്ലപ്പെട്ട സ്ത്രീയുടെ മകൾ ഉൾപ്പെടെ ഏഴ് പേരെ ജയ്പൂർ പോലീസ് അറസ്റ്റ് ചെയ്തു. കൊലപാതകത്തിന്റെ മുഖ്യസൂത്രധാരന്മാരിൽ ഒരാളായ ബന്ധു ഒളിവിലാണ്.

ജയ്പൂരിലെ കോടതിയിൽ ലോവർ ഡിവിഷൻ ക്ലർക്കായി ജോലി ചെയ്തിരുന്ന നീരജ് ശർമയാണ് (45) കൊല്ലപ്പെട്ടത്. ജൂലൈ മൂന്നിന് വൈകുന്നേരം 4:45ഓടെയായിരുന്നു രാജസ്ഥാനെ നടുക്കിയ സംഭവം നടന്നത്. തന്റെ മകനെ കോച്ചിങ് ഇൻസ്റ്റിറ്റ്യൂട്ടിൽ കൊണ്ടാക്കിയ ശേഷം വീട്ടിലേക്ക് മടങ്ങുകയായിരുന്ന നീരജിനെ അതിവേഗത്തിലെത്തിയ സ്‌കോർപിയോ കാർ ഇടിച്ചുതെറിപ്പിക്കുകയായിരുന്നു. ഇടിയുടെ ആഘാതത്തിൽ നൂറടി ദൂരേക്ക് തെറിച്ചുവീണ അവർ സംഭവസ്ഥലത്തുതന്നെ മരിച്ചു.

‘അപകടമല്ല, ആസൂത്രിത കൊലപാതകം’: സി.സി.ടി.വിവഴിത്തിരിവായി | Neeraj Sharma Jaipur murder

ആദ്യഘട്ടത്തിൽ ഇതൊരു സാധാരണ വാഹനാപകടമായാണു കണക്കാക്കിയിരുന്നതെങ്കിലും പ്രദേശത്തെ സി.സി.ടി.വി ദൃശ്യങ്ങൾ പരിശോധിച്ചതോടെയാണ് പോലീസിന് സംശയം തോന്നിയത്. മനഃപൂർവം ലക്ഷ്യംവച്ച് വണ്ടി ഇടിച്ചുകയറ്റുകയാണെന്ന് ദൃശ്യങ്ങളിൽ വ്യക്തമായി. തുടർന്നുള്ള അന്വേഷണം നീരജ് ശർമയുടെ സ്വന്തം കുടുംബത്തിലേക്ക് തന്നെയാണ് എത്തിയത്.

ഇവരുടെ ഭർത്താവ് ഒരു വർഷം മുൻപാണ് മരിച്ചത്. ഇതേതുടർന്ന് ആശ്രിത നിയമനം വഴി നീരജിന് കോടതിയിൽ എൽ.ഡി.സി ആയി ജോലി ലഭിച്ചു. എന്നാൽ, ഈ ജോലി തനിക്ക് വേണമെന്നായിരുന്നു മകൾ ആയുഷി ശർമയുടെ ആവശ്യം. ഇത് കൂടാതെ കഴിഞ്ഞ രണ്ട്-മൂന്ന് വർഷമായി അമ്മയും മകളും തമ്മിൽ സ്വത്തുതർക്കവും നിലനിന്നിരുന്നു.

അച്ഛന്റെ മരണശേഷം ജോലി തനിക്ക് ലഭിക്കാത്തതിലുള്ള വൈരാഗ്യവും സ്വത്ത് സ്വന്തമാക്കാനുള്ള അത്യാഗ്രഹവുമാണ് അമ്മയെ ഇല്ലാതാക്കാൻ മകളെ പ്രേരിപ്പിച്ചതെന്ന് ഡി.സി.പി രഞ്ജിത ശർമ പറഞ്ഞു.

7 ലക്ഷത്തിന്റെ ക്വട്ടേഷൻ; ഒരു മാസത്തെ നിരീക്ഷണം | Neeraj Sharma Jaipur murder

അമ്മയെ വകവരുത്താനായി ആയുഷി ശർമ തന്റെ അമ്മാവനായ മോഹൻ സ്വരൂപ്, അമ്മാവന്റെ മകൻ ബൽറാം എന്നിവരുമായി ചേർന്ന് ഗൂഢാലോചന നടത്തി. ഭരത്പൂർ സ്വദേശിയായ ഹേമന്ത് ശർമയ്ക്ക് ഏഴു ലക്ഷം രൂപയ്ക്കാണ് ഇവർ കൊലപാതക ക്വട്ടേഷൻ നൽകിയത്.

കൊലപാതകം നടപ്പാക്കാൻ പ്രതികൾ വിപുലമായ തയാറെടുപ്പുകളാണ് നടത്തിയത്. ആദ്യം ഒരു മഹീന്ദ്ര ഥാർ വാടകയ്‌ക്കെടുത്ത് ഇവർ നീരജ് ശർമയെ ദിവസങ്ങളോളം നിരീക്ഷിച്ചെങ്കിലും പദ്ധതി നടപ്പാക്കാൻ സാധിച്ചില്ല. പിന്നീട് ഒരു മാസത്തോളം നീരജിന്റെ ഓരോ നീക്കങ്ങളും കൃത്യമായി നിരീക്ഷിച്ച ശേഷമാണ് സ്‌കോർപിയോ കാർ ഉപയോഗിച്ച് ആക്രമിക്കാൻ തീരുമാനിച്ചത്.

കൃത്യം നിർവഹിച്ച പ്രതികളുടെ പങ്ക് | Neeraj Sharma Jaipur murder

കൊലപാതകം നടന്ന ദിവസം പ്രതികൾ അതീവ ആസൂത്രിതമായാണ് നീക്കങ്ങൾ ഏകോപിപ്പിച്ചത്. മോഹിത് ശർമ എന്ന പ്രതി നീരജിന്റെ തത്സമയ ലൊക്കേഷൻ മറ്റ് പ്രതികൾക്ക് പങ്കുവച്ചുകൊണ്ടിരുന്നു. മറ്റൊരു പ്രതിയായ രോഹിത് ജാതവ് ബൈക്കിൽ സമീപത്ത് തന്നെ നിലയുറപ്പിച്ചു. ആകാശ് ശർമയാണ് സ്‌കോർപിയോ ഓടിച്ചിരുന്നത്. ഒപ്പം അരവിന്ദ് ശർമയും കാറിനുള്ളിൽ ഉണ്ടായിരുന്നു. കൃത്യം നിർവഹിച്ച ശേഷം പ്രതികൾ സ്‌കോർപിയോ വഴിയിൽ ഉപേക്ഷിച്ച് ബൈക്കിൽ കടന്നുകളയുകയായിരുന്നു.

കൊല്ലപ്പെട്ട നീരജ് ശർമയുടെ സഹോദരൻ രാകേഷ് കുമാർ ശർമ നൽകിയ പരാതിയിലാണ് പോലീസ് കേസ് രജിസ്റ്റർ ചെയ്തത്. സ്വത്തിന്റെ പേരിൽ മകളും ഭർത്താവിന്റെ വീട്ടുകാരും തന്നെ നിരന്തരം പീഡിപ്പിച്ചിരുന്നതായും വധഭീഷണി മുഴക്കിയിരുന്നതായും നീരജ് മുൻപ് തന്നോട് പറഞ്ഞിരുന്നതായി രാകേഷ് പോലീസിനെ അറിയിച്ചു.

കേസിൽ മകൾ ആയുഷി ശർമ, മോഹൻ സ്വരൂപ്, മോഹിത് ശർമ, ആകാശ് ശർമ, അരവിന്ദ് ശർമ, ഹേമന്ത് ശർമ, രോഹിത് ജാതവ് എന്നിവരെ പോലീസ് അറസ്റ്റ് ചെയ്തിട്ടുണ്ട്. പ്രധാന ഗൂഢാലോചനക്കാരനായ ബൽറാം ഒളിവിലാണ്. ഇയാൾക്കായുള്ള തിരച്ചിൽ പോലീസ് ഊർജിതമാക്കി.