വടകര മണിയൂർ ചൊവ്വാപ്പുഴയിൽ ഒഴുക്കിൽപ്പെട്ട് രണ്ട് വിദ്യാർത്ഥികൾ മരിച്ചു

വടകര: മണിയൂർ ചൊവ്വാപ്പുഴയിൽ നീന്തൽ പഠിക്കാനിറങ്ങിയ രണ്ട് വിദ്യാർത്ഥികൾ ഒഴുക്കിൽപ്പെട്ട് മരിച്ചു. മണിയൂർ വില്ലേജ് ഓഫീസിന് പിൻവശത്തെ മൂരിയാട് പുഴ ഭാഗത്താണ് അപകടമുണ്ടായത്. പാലയാട് സ്വദേശി നബീൽ (19), ഓർക്കാട്ടേരി വരപ്പുറഞ്ഞ് സ്വദേശി സിനാൻ (12) എന്നിവരാണ് മരിച്ചത്.

നാലുപേരടങ്ങുന്ന സംഘമാണ് പുഴയിൽ നീന്തൽ പഠിക്കാനായി എത്തിയത്. കുളിക്കുന്നതിനിടെ നാലുപേരും ഒഴുക്കിൽപ്പെടുകയായിരുന്നു. തുടർന്ന് കൂടെയുണ്ടായിരുന്ന രണ്ടുപേർ രക്ഷപ്പെട്ടെങ്കിലും നബീലും സിനാനും ഒഴുക്കിൽപ്പെടുകയായിരുന്നു.

അതേസമയം, കോഴിക്കോട് ജില്ലയിൽ ഇന്ന് പുഴകളിൽ ഒഴുക്കിൽപ്പെട്ട് മൂന്ന് പേരാണ് മരിച്ചത്. കൊടുവള്ളി മാനിപുരം പുഴയിൽ കൂട്ടുകാർക്കൊപ്പം മീൻ പിടിക്കാൻ ഇറങ്ങിയ മുഹമ്മദ് ഷഹീൻ (17) ആണ് മരിച്ച മൂന്നാമത്തെയാൾ. നാട്ടുകാരും മാവൂർ ഫയർഫോഴ്‌സും പൊലീസും നടത്തിയ തിരച്ചിലിൽ പുഴയിൽ വീണുകിടന്ന മരത്തടിക്ക് അടിയിൽ നിന്നാണ് ഷഹീന്റെ മൃതദേഹം കണ്ടെടുത്തത്.