‘വോട്ട് ചോരി ആരോപണങ്ങളിൽ പ്രത്യേക പാർലമെൻ്റ് സമ്മേളനം നടത്താൻ തയാർ’; രാഹുൽ ഗാന്ധിയെ വെല്ലുവിളിച്ച് അമിത് ഷാ

ന്യൂഡൽഹി: തെരഞ്ഞെടുപ്പിലെ വോട്ട് തിരിമറി ആരോപണങ്ങളിലും മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരായ വിവാദങ്ങളിലും ചർച്ച നടത്താൻ സർക്കാർ തയ്യാറാണെന്ന് കേന്ദ്ര ആഭ്യന്തര മന്ത്രി അമിത് ഷാ. ഇതിനായി പ്രത്യേക പാർലമെന്റ് സമ്മേളനം വിളിക്കാൻ തയ്യാറാണെന്ന് അദ്ദേഹം വ്യക്തമാക്കി. മത്സരത്തിൽ തോറ്റതിന് ശേഷം റഫറിയെ കുറ്റപ്പെടുത്തുന്നതുപോലെയുള്ള സമീപനമാണ് പ്രതിപക്ഷ പാർട്ടികളുടേതെന്നും, ആരോപണങ്ങൾ പാർലമെന്റിൽ ഉന്നയിക്കാനും ജനാധിപത്യപരമായ ചട്ടക്കൂടിനുള്ളിൽ നിന്ന് ചർച്ച ചെയ്യാനും അദ്ദേഹം പ്രതിപക്ഷത്തെ വെല്ലുവിളിച്ചു.

ലഖ്നൗവിൽ നടന്ന പാർട്ടി യോഗത്തിൽ സംസാരിക്കവെയാണ് അമിത് ഷാ പ്രതിപക്ഷത്തിന് വെല്ലുവിളി മുഴക്കിയത്. “രാഹുലും അഖിലേഷ് യാദവും ഒരു മത്സരം തോറ്റതിന് ശേഷം കൂടുതൽ കഠിനമായി പരിശീലിക്കുന്നതിനുപകരം, റഫറിയെ കുറ്റപ്പെടുത്താനാണ് ശ്രമിക്കുന്നത്. ഞാൻ അവരെ വെല്ലുവിളിക്കുന്നു, ഈ ആരോപണങ്ങൾ പാർലമെന്റിൽ ചർച്ച ചെയ്യാൻ ഭരണപക്ഷം തയ്യാറാണ്. മുന്നോട്ട് വരൂ, നമുക്ക് ഒരു പ്രത്യേക സമ്മേളനം വിളിക്കാം,” ഷാ പറഞ്ഞു.

മണ്ഡല പുനർനിർണയം, വനിതാ സംവരണം എന്നിവയുമായി ബന്ധപ്പെട്ട ഭരണഘടനാ ഭേദഗതി ബില്ലുകൾ അവതരിപ്പിക്കുന്നതിനായി സർക്കാർ ഉടൻ ഒരു പ്രത്യേക സമ്മേളനം വിളിച്ചേക്കുമെന്ന് അഭ്യൂഹങ്ങളുണ്ടായിരുന്നു. എന്നാൽ, ആഗസ്റ്റ് 13ന് അവസാനിച്ച പാർലമെന്റിന്റെ മൺസൂൺ സമ്മേളനം ഇതുവരെ പൂർണ്ണമായി പിരിച്ചുവിട്ടിട്ടില്ലെന്നും അനിശ്ചിതമായി നീട്ടിവെക്കുക മാത്രമാണ് ചെയ്തതെന്നും അധികൃതർ അറിയിച്ചു. 13 കോടി വോട്ടർമാരെ ഒഴിവാക്കിയെന്ന ആക്ഷേപമുയർന്ന എസ്ഐആർ നടപടിക്രമങ്ങളിലെ ക്രമക്കേടുകൾ ചൂണ്ടിക്കാട്ടി രാഹുൽ ഗാന്ധിയുടെ നേതൃത്വത്തിലുള്ള പ്രതിപക്ഷം തെരഞ്ഞെടുപ്പ് കമ്മിഷണർക്കെതിരെ ശക്തമായ പ്രതിഷേധം തുടരുന്നതിനിടയിലാണ് ആഭ്യന്തരമന്ത്രിയുടെ വെല്ലുവിളി.

കഴിഞ്ഞ കുറച്ചാഴ്ചകളായി ഇന്ത്യ സഖ്യത്തിന്റെ നേതൃത്വത്തിൽ ഡൽഹിയിൽ വൻ പ്രതിഷേധങ്ങളാണ് അരങ്ങേറിയത്. എസ്ഐആർ പ്രക്രിയയിൽ തെരഞ്ഞെടുപ്പ് പാനൽ എടുത്ത വിവിധ തീരുമാനങ്ങളെ തെരഞ്ഞെടുപ്പ് കമ്മിഷണർമാർ എതിർത്തിരുന്നുവെന്ന തരത്തിലുള്ള മാധ്യമ വാർത്തകൾക്ക് പിന്നാലെയാണ് തലസ്ഥാനത്ത് പ്രതിഷേധം ശക്തമായത്. അതേസമയം, പ്രതിപക്ഷത്തിന്റെ ആരോപണങ്ങൾ പൂർണ്ണമായും രാഷ്ട്രീയ പ്രേരിതവും അടിസ്ഥാനരഹിതവുമാണെന്ന് ബിജെപി വ്യക്തമാക്കി. തെരഞ്ഞെടുപ്പുകളിൽ പരാജയപ്പെടുമ്പോൾ ഭരണഘടനാ സ്ഥാപനങ്ങളെയും തെരഞ്ഞെടുപ്പ് കമ്മിഷണറെയും വ്യക്തിപരമായി ലക്ഷ്യമിടുന്നത് പ്രതിപക്ഷത്തിന്റെ പതിവ് തന്ത്രമാണെന്നും, ഏത് വിഷയവും പാർലമെന്റിൽ ചർച്ച ചെയ്യാൻ ഭരണപക്ഷം തയ്യാറാണെന്നും അമിത് ഷാ കൂട്ടിച്ചേർത്തു.