‘ഞങ്ങൾക്ക് സുരക്ഷയില്ലെങ്കിൽ ആർക്കുമുണ്ടാവില്ല’:ഹോർമുസ് ഉപരോധ നീക്കത്തിനെതിരെ മുന്നറിയിപ്പുമായി ഇറാൻ
തെഹ്റാൻ: ഇറാനിയൻ തീരങ്ങളെയും തുറമുഖങ്ങളെയും ലക്ഷ്യമിട്ടുള്ള അമേരിക്കയുടെ പുതിയ ഉപരോധ നീക്കങ്ങൾക്കെതിരെ കടുത്ത പ്രത്യാക്രമണ ഭീഷണിയുമായി ഇറാൻ രംഗത്ത്. തങ്ങളുടെ തുറമുഖങ്ങളിൽ നിന്നുള്ള കപ്പൽ ഗതാഗതം തടസ്സപ്പെടുത്താനാണ് യുഎസ് നീക്കമെങ്കിൽ പേർഷ്യൻ ഗൾഫിലെയും ഒമാൻ കടലിലെയും ഒരൊറ്റ തുറമുഖവും സുരക്ഷിതമായിരിക്കില്ലെന്ന് ഇറാൻ ഔദ്യോഗികമായി മുന്നറിയിപ്പ് നൽകി.
പാകിസ്താനിൽ വെച്ച് നടന്ന വെടിനിർത്തൽ ചർച്ചകൾ പരാജയപ്പെട്ട പശ്ചാത്തലത്തിൽ, ഇറാന് മേൽ സമ്മർദ്ദം ശക്തമാക്കാൻ ലക്ഷ്യമിട്ടാണ് ഇറാനിയൻ തുറമുഖങ്ങളിലേക്കുള്ള ഗതാഗതം തടയുമെന്ന് അമേരിക്കൻ സൈന്യം പ്രഖ്യാപിച്ചത്. ഇതിന് മറുപടിയായാണ് ഇറാന്റെ കരുത്തുറ്റ സൈനിക വിഭാഗമായ റെവല്യൂഷണറി ഗാർഡ്സ് രംഗത്തെത്തിയത്.
“സുരക്ഷ എല്ലാവർക്കും ഒരുപോലെ അവകാശപ്പെട്ടതാണ്, അത് ഞങ്ങൾക്ക് ലഭിക്കുന്നില്ലെങ്കിൽ മറ്റാർക്കും ഉണ്ടാവില്ല” എന്ന വിട്ടുവീഴ്ചയില്ലാത്ത നിലപാടാണ് ഐആർജിസി സ്വീകരിച്ചിരിക്കുന്നത്. മേഖലയിലെ സമുദ്ര സുരക്ഷ പങ്കിടേണ്ട ഒന്നാണെന്നും ഇറാനെ മാത്രം ഒറ്റപ്പെടുത്തി ഉപരോധം ഏർപ്പെടുത്തിയാൽ അത് ഗൾഫ് മേഖലയിലെ സമാധാനം പൂർണ്ണമായും തകർക്കുമെന്നും സൈന്യം വ്യക്തമാക്കി. തങ്ങളുടെ വ്യാപാരങ്ങൾ തടയപ്പെട്ടാൽ അയൽരാജ്യങ്ങളിലെ തുറമുഖങ്ങളിലൂടെയുള്ള കപ്പൽ ഗതാഗതത്തിനും തങ്ങൾ തടസ്സമുണ്ടാക്കുമെന്ന പരോക്ഷ സൂചനയും ഇറാൻ നൽകി. ഇത്തരം ഏകപക്ഷീയമായ സൈനിക നീക്കങ്ങൾ ഗുരുതരമായ പ്രത്യാഘാതങ്ങൾ വിളിച്ചുവരുത്തുമെന്നും പ്രസ്താവനയിൽ പറയുന്നു.
അമേരിക്കയുടെ ഈ നീക്കം ആഗോള എണ്ണ വിപണിയെ കടുത്ത ആശങ്കയിലാഴ്ത്തിയിട്ടുണ്ട്. ലോകത്തെ പ്രധാന എണ്ണക്കടത്തു പാതയായ ഹോർമുസ് കടലിടുക്കിൽ ഉപരോധം ഉണ്ടായാൽ അത് ഇന്ധനവില കുതിച്ചുയരാൻ കാരണമാകും. ഇറാന്റെ ഭീഷണി ഗൾഫ് രാജ്യങ്ങളെയും പ്രതിരോധത്തിലാക്കിയിരിക്കുകയാണ്. മേഖലയിൽ വലിയൊരു സംഘർഷം ഒഴിവാക്കാൻ അന്താരാഷ്ട്ര തലത്തിൽ നയതന്ത്ര ചർച്ചകൾ നടക്കുന്നുണ്ടെങ്കിലും ഇറാൻ തന്റെ നിലപാടിൽ ഉറച്ചുനിൽക്കുകയാണ്. ഇതിനിടെ, ഇറാനെതിരായ പുതിയ ഉപരോധങ്ങളുടെ ഭാഗമാകാൻ താൽപ്പര്യമില്ലെന്ന് ബ്രിട്ടൻ വ്യക്തമാക്കിയത് അമേരിക്കയ്ക്ക് തിരിച്ചടിയായിട്ടുണ്ട്. എങ്കിലും മിഡിൽ ഈസ്റ്റിലെ സാഹചര്യം അതീവ സങ്കീർണ്ണമായി തുടരുകയാണ്.
