‘നെതന്യാഹുവിനേക്കാൾ നല്ലത് എന്റെ വളർത്തുപൂച്ച രാജ്യം ഭരിക്കുന്നതാണ്, ഈ ഭ്രാന്ത് അവസാനിപ്പിക്കാൻ സൈനിക അട്ടിമറി വേണം’; ഇസ്രയേൽ പ്രധാനമന്ത്രിക്കെതിരെ മുൻ സുഹൃത്ത്

തെൽ അവീവ്: ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിനെ പുറത്താക്കാൻ ഒരു സൈനിക അട്ടിമറി നടന്നാൽ തനിക്ക് ഏറെ സന്തോഷമാണെന്ന് അദ്ദേഹത്തിന്റെ മുൻ സുഹൃത്തും പ്രമുഖ എഴുത്തുകാരനുമായ ഇയാൽ മെഗ്ഗെദ്. 103 എഫ്.എം റേഡിയോയിൽ ഹാരെറ്റ്സ് സാഹിത്യ സപ്ലിമെന്റ് എഡിറ്ററും നെതന്യാഹു കുടുംബത്തിന്റെ വിശ്വസ്തനുമായ ബെന്നി സിഫറുമായി സംസാരിക്കുകയായിരുന്നു അദ്ദേഹം. നെതന്യാഹുവിന് പകരം തന്റെ വളർത്തുപൂച്ച രാജ്യം ഭരിക്കുന്നതാണ് കൂടുതൽ നല്ലതെന്നും ഈ ഭ്രാന്തൻ അവസ്ഥയുമായി മുന്നോട്ട് പോകാൻ കഴിയില്ലെന്നും അദ്ദേഹം തുറന്നടിച്ചു.

തിങ്കളാഴ്ച രാത്രി ജറുസലേമിലെ ഹദസ്സ ആശുപത്രിയിൽ നെതന്യാഹു ദന്തചികിത്സയ്ക്കായി നടത്തിയ സന്ദർശനത്തെക്കുറിച്ചും മെഗ്ഗെദ് പരാമർശിച്ചു. നെതന്യാഹുവിന്റെ പല്ലിന്റെ അവസ്ഥയല്ല തന്നെ അലട്ടുന്നതെന്നും, തന്റെ വീടിനടുത്തുള്ള റംബാം ആശുപത്രിയിലേക്ക് രാത്രിയിൽ കൊണ്ടുവരുന്ന ഗുരുതരമായി പരിക്കേറ്റ സൈനികരെക്കുറിച്ചോർത്താണ് തനിക്ക് ആശങ്കയുള്ളതെന്നും അദ്ദേഹം പറഞ്ഞു. നെതന്യാഹുവിന്റെ ഭ്രാന്തൻ സാഹസങ്ങൾ കാരണം ആ സൈനികർക്ക് ജീവിതകാലം മുഴുവൻ ദുരിതമനുഭവിക്കേണ്ടി വരും. ലെബനനിൽ ഇപ്പോൾ നടക്കുന്നത് തികച്ചും അർത്ഥശൂന്യമായ യുദ്ധമാണെന്നും അദ്ദേഹം വ്യക്തമാക്കി. ഹിസ്ബുള്ളയെ പതിറ്റാണ്ടുകൾ പിന്നിലാക്കിയെന്ന് പറഞ്ഞിരുന്നെങ്കിലും, ഇപ്പോൾ അവരിൽ നിന്നും നാം വലിയ തിരിച്ചടികൾ ഏറ്റുവാങ്ങുകയാണെന്നും നമ്മുടെ സൈനികർ അവിടെ കൊല്ലപ്പെടുകയാണെന്നും അദ്ദേഹം പറഞ്ഞു.

ഒരു കുടുംബം മാത്രം രാജ്യത്തെ നിയന്ത്രിക്കുന്ന ഈ അവസ്ഥ ഇനിയും എത്രനാൾ തുടരാനാകുമെന്ന് മെഗ്ഗെദ് ചോദിച്ചു. നെതന്യാഹു രാജ്യത്തെ നശിപ്പിക്കാൻ തീരുമാനിച്ചുറപ്പിച്ചിരിക്കുകയാണെന്നും, താൻ സ്ഥാനമൊഴിഞ്ഞാൽ ഈ രാജ്യത്തിന് എന്ത് സംഭവിക്കുമെന്നതിനെക്കുറിച്ച് അദ്ദേഹത്തിന് യാതൊരു ഉത്കണ്ഠയുമില്ലെന്നും അദ്ദേഹം ആരോപിച്ചു. ഉറ്റവരെ നഷ്ടപ്പെട്ട കുടുംബങ്ങളെയും സൈനിക സെമിത്തേരികളിലെ കാഴ്ചകളും നാം കാണുന്നില്ലേ എന്ന് ചോദിച്ച അദ്ദേഹം, വരാനിരിക്കുന്ന തെരഞ്ഞെടുപ്പ് നെതന്യാഹുവിനെ ചരിത്രത്തിന്റെ വേദിയിൽ നിന്ന് മാറ്റുമെന്ന് ആരെങ്കിലും കരുതുന്നുണ്ടെങ്കിൽ അത് പൂർണ്ണമായും തെറ്റാണെന്നും പറഞ്ഞു. രക്തത്തിലും തീയിലും പുകച്ചുരുളുകളിലും ചരിത്രത്തിൽ നിന്ന് വിടവാങ്ങാനാണ് അദ്ദേഹം തീരുമാനിച്ചിരിക്കുന്നതെന്നും അദ്ദേഹം കൂട്ടിച്ചേർത്തു.

അതേസമയം, റേഡിയോ ചർച്ചയിൽ ബെന്നി സിഫർ നെതന്യാഹുവിനെ ശക്തമായി പ്രതിരോധിച്ചു. തനിക്ക് സ്വന്തമായി ഒരു ജീവിതമുണ്ടെന്നും ചിലരെപ്പോലെ പ്രധാനമന്ത്രിയുടെ ഓരോ ചുവടുവെപ്പും അമിതമായി നിരീക്ഷിക്കാൻ താൻ തയ്യാറല്ലെന്നും അദ്ദേഹം പറഞ്ഞു. ബീബിയുടെയും സാറയുടെയും വിവരങ്ങൾ ഇടയ്ക്ക് അന്വേഷിക്കാറുണ്ടെങ്കിലും അതൊരു ഭ്രമമല്ല. പ്രധാനമന്ത്രിയുടെ പല്ല് വൃത്തിയാക്കൽ പോലുള്ള ഓരോ ചെറിയ ആരോഗ്യ വിവരങ്ങളും നിരീക്ഷിക്കുന്നത് ജനങ്ങളുടെ സഹാനുഭൂതിയല്ല, മറിച്ച് അതൊരുതരം മാനസിക രോഗമാണെന്ന് സിഫർ വിമർശിച്ചു. പ്രധാനമന്ത്രി ഇപ്പോഴും തികഞ്ഞ കാര്യക്ഷമതയോടെയാണ് പ്രവർത്തിക്കുന്നതെന്ന് ചരിത്രം തെളിയിക്കുന്നുണ്ടെന്നും അദ്ദേഹം വ്യക്തമാക്കി.