അമേരിക്കൻ താരിഫ് സമ്മർദ്ദങ്ങൾക്കിടെ ട്രംപിൻ്റെ മകനുമായി ബന്ധമുള്ള യു.എസ് റിഫൈനറി കമ്പനിയിൽ 100 ദശലക്ഷം ഡോളർ നിക്ഷേപിച്ച് റിലയൻസ്

വാഷിങ്ടൺ: അമേരിക്കൻ പ്രസിഡന്റ് ഡൊണാൾഡ് ട്രംപിന്റെ മകൻ ഡൊണാൾഡ് ട്രംപ് ജൂനിയറുമായി രഹസ്യ ബന്ധമുള്ള ടെക്സാസ് ആസ്ഥാനമായുള്ള ഒരു റിഫൈനറി സ്റ്റാർട്ടപ്പിൽ മുകേഷ് അംബാനിയുടെ റിലയൻസ് ഇൻഡസ്ട്രീസ് 100 ദശലക്ഷം ഡോളർ നിക്ഷേപിച്ചതായി റിപ്പോർട്ട്. ‘അമേരിക്ക ഫസ്റ്റ് റിഫൈനിങ്’ എന്ന് പേരുള്ള ഈ കമ്പനിയിൽ ഡൊണാൾഡ് ട്രംപ് ജൂനിയറിന് നിക്ഷേപ പങ്കാളിത്തമുണ്ടെന്നാണ് പുറത്തുവരുന്ന വിവരങ്ങൾ. ഈ വമ്പൻ നിക്ഷേപത്തിന് തൊട്ടുപിന്നാലെ റിലയൻസ് ഇൻഡസ്ട്രീസിനും അംബാനി കുടുംബത്തിനും അനുകൂലമായ പല സുപ്രധാന നയതീരുമാനങ്ങളും ട്രംപ് ഭരണകൂടത്തിന്റെ ഭാഗത്തുനിന്നും ഉണ്ടായിട്ടുണ്ട്. അമേരിക്കൻ സർക്കാരിൽ സ്വാധീനം ചെലുത്താൻ വിദേശ നിക്ഷേപകർ ട്രംപ് കുടുംബത്തിന്റെ ബിസിനസ്സ് താല്പര്യങ്ങളിൽ പണം ഇറക്കുന്നു എന്ന വലിയ ആരോപണമാണ് ഈ പുതിയ ഇടപാടിലൂടെ വീണ്ടും ചർച്ചയാകുന്നത്.

റഷ്യൻ എണ്ണ വാങ്ങുന്നതിൽ നിന്നും റിലയൻസ് ഉൾപ്പെടെയുള്ള ഇന്ത്യൻ കമ്പനികളെ പിന്തിരിപ്പിക്കാൻ ലക്ഷ്യമിട്ട് കഴിഞ്ഞ വർഷം ഓഗസ്റ്റിൽ ഇന്ത്യയ്ക്ക് മേലുള്ള താരിഫ് നിരക്കുകൾ ഡൊണാൾഡ് ട്രംപ് 50 ശതമാനമായി ഉയർത്തിയിരുന്നു. വൈറ്റ് ഹൗസിൽ നിന്നുള്ള ഈ കടുത്ത നടപടികൾക്കും സമ്മർദ്ദങ്ങൾക്കുമിടെ കഴിഞ്ഞ നവംബർ അവസാനത്തോടെ ഗുജറാത്തിലെ ജാംനഗറിൽ വെച്ച് മുകേഷ് അംബാനിയുടെ മകൻ ആനന്ദ് അംബാനിയും ഡൊണാൾഡ് ട്രംപ് ജൂനിയറും നേരിട്ട് കൂടിക്കാഴ്ച നടത്തി. ഈ കൂടിക്കാഴ്ചയ്ക്ക് ശേഷമാണ് മുമ്പ് ‘എലമെന്റ് ഫ്യുവൽസ്’ എന്ന് അറിയപ്പെട്ടിരുന്ന ഈ അമേരിക്കൻ സ്റ്റാർട്ടപ്പിലേക്ക് റിലയൻസ് പണമൊഴുക്കിയത്. ഈ നിക്ഷേപത്തിന് പിന്നാലെ അമേരിക്കയും ഇന്ത്യയും തമ്മിലുള്ള ബന്ധത്തിൽ വലിയ പുരോഗതിയുണ്ടായി. ഫെബ്രുവരിയിൽ ഇരു രാജ്യങ്ങളും തമ്മിൽ പുതിയ വ്യാപാര കരാർ ഒപ്പുവെക്കുകയും അമേരിക്ക താരിഫുകൾ വൻതോതിൽ കുറയ്ക്കുകയും ചെയ്തു. ഇതിന് പുറമെ വെനിസ്വേലയിൽ നിന്ന് എണ്ണ വാങ്ങാനുള്ള പ്രത്യേക ലൈസൻസും ട്രംപ് ഭരണകൂടം റിലയൻസിന് അനുവദിച്ചു നൽകി.

കഴിഞ്ഞ 50 വർഷത്തിനിടെ അമേരിക്കയിൽ നിർമ്മിക്കുന്ന ആദ്യത്തെ പുതിയ എണ്ണ ശുദ്ധീകരണശാലയാണിതെന്നും 300 ബില്യൺ ഡോളറിന്റെ ചരിത്രപരമായ പദ്ധതിയാണിതെന്നും അടുത്തിടെ തന്റെ സോഷ്യൽ മീഡിയ പ്ലാറ്റ്‌ഫോമായ ‘ട്രൂത്ത് സോഷ്യൽ’ വഴി ഡൊണാൾഡ് ട്രംപ് പ്രഖ്യാപിച്ചിരുന്നു. ടെക്സാസിലെ ബ്രൗൺസ്‌വില്ലെ തുറമുഖത്ത് നിർമ്മിക്കുന്ന ഈ വലിയ പദ്ധതിക്ക് നിക്ഷേപ പിന്തുണ നൽകിയ ഇന്ത്യയിലെ ഏറ്റവും വലിയ സ്വകാര്യ ഊർജ്ജ കമ്പനിയായ റിലയൻസിന് അദ്ദേഹം നന്ദി പറയുകയും ചെയ്തു. ഇതിനുപുറമെ 2024-ൽ മുംബൈയിലെ ഒരു പ്രോജക്ടിന്റെ വികസന ഫീസായി 10 ദശലക്ഷം ഡോളർ റിലയൻസ് ട്രംപ് ഓർഗനൈസേഷന് നൽകിയിരുന്ന കാര്യവും പുറത്തുവന്നിട്ടുണ്ട്. എന്നാൽ അമേരിക്കൻ സർക്കാരിന്റെ വാണിജ്യ, താരിഫ്, ഉപരോധ നയങ്ങളുമായി തങ്ങളുടെ പുതിയ നിക്ഷേപത്തിന് യാതൊരു ബന്ധവുമില്ലെന്നാണ് റിലയൻസ് ഇൻഡസ്ട്രീസ് വ്യക്തമാക്കുന്നത്. തികച്ചും വാണിജ്യപരവും തന്ത്രപരവുമായ ബിസിനസ്സ് സാധ്യതകൾ മുൻനിർത്തി മാത്രമാണ് തങ്ങൾ ഈ നിക്ഷേപം നടത്തിയതെന്നാണ് റിലയൻസിന്റെ ഔദ്യോഗിക വിശദീകരണം.