‘ജനസംഖ്യ ബാധ്യതയാണ്; സർക്കാർ ജനങ്ങളെ നിർബന്ധിതമായി വന്ധ്യംകരിക്കണം, പ്രത്യേകിച്ച് മുസ്ലിംകളെ’;വിവാദ പരാമർശങ്ങളുമായി മുൻ ഐ.എ.എസ് ഓഫീസർ നിയാസ് ഖാൻ
ന്യൂഡൽഹി: മുസ്ലിം സമുദായത്തിൽ ജനസംഖ്യാ വർദ്ധനവ് വളരെ കൂടുതലാണെന്നും അതിനാൽ അവർക്കിടയിൽ ജനസംഖ്യ നിയന്ത്രിക്കുന്നതിനായി കർശനമായ വന്ധ്യംകരണ നടപടികൾ നടപ്പിലാക്കണമെന്നും ആവശ്യപ്പെട്ട് വിരമിച്ച ഐ.എ.എസ് ഉദ്യോഗസ്ഥൻ നിയാസ് ഖാൻ. മധ്യപ്രദേശ് കേഡറിലെ മുൻ ഉദ്യോഗസ്ഥനും വിവിധ പുസ്തകങ്ങളുടെ രചയിതാവുമായ നിയാസ് ഖാൻ സോഷ്യൽ മീഡിയയിലൂടെയാണ് ഈ വിവാദപരമായ അഭിപ്രായം പങ്കുവെച്ചത്.
മുസ്ലീങ്ങൾക്കിടയിൽ കൂടുതൽ കുട്ടികൾക്ക് ജന്മം നൽകുന്ന പ്രവണതയുണ്ടെന്നും, ഇത് സമുദായത്തിന്റെ സാമൂഹികവും സാമ്പത്തികവുമായ പിന്നോക്കാവസ്ഥയ്ക്ക് പ്രധാന കാരണമാകുന്നുണ്ടെന്നുമാണ് അദ്ദേഹം വാദിക്കുന്നത്. വലിയ കുടുംബങ്ങൾ പുലർത്തുന്നതിന് പകരം മുസ്ലീം സമുദായം വിദ്യാഭ്യാസത്തിലും ആധുനിക തൊഴിൽ മേഖലകളിലും കൂടുതൽ ശ്രദ്ധ കേന്ദ്രീകരിക്കേണ്ടതുണ്ടെന്നും അദ്ദേഹം വ്യക്തമാക്കി. ജനസംഖ്യ ഫലപ്രദമായി നിയന്ത്രിക്കുന്നതിനായി സർക്കാരിന്റെ ഭാഗത്തുനിന്ന് കർശനമായ നിയമങ്ങളും നടപടികളും ഉണ്ടാകണമെന്നും, ഇതിനായി മുസ്ലീങ്ങളെ ലക്ഷ്യമാക്കി പ്രത്യേക വന്ധ്യംകരണ പരിപാടികൾ നടപ്പിലാക്കണമെന്നും അദ്ദേഹം തന്റെ പ്രസ്താവനയിൽ ആവശ്യപ്പെട്ടു.
കുറച്ചു കുട്ടികൾ മാത്രമുള്ള കുടുംബങ്ങൾക്ക് അവർക്ക് മികച്ച വിദ്യാഭ്യാസവും ആരോഗ്യവും മെച്ചപ്പെട്ട ജീവിത സാഹചര്യങ്ങളും ഉറപ്പാക്കാൻ കഴിയുമെന്നാണ് നിയാസ് ഖാൻ ചൂണ്ടിക്കാട്ടുന്നത്. അമിതമായ ജനസംഖ്യ ദാരിദ്ര്യത്തിലേക്കും തൊഴിലില്ലായ്മയിലേക്കും നയിക്കുമെന്നും അദ്ദേഹം മുന്നറിയിപ്പ് നൽകുന്നു. എന്നാൽ അദ്ദേഹത്തിന്റെ ഈ പ്രസ്താവന വലിയ വിവാദങ്ങൾക്കും രൂക്ഷമായ വിമർശനങ്ങൾക്കും വഴിവെച്ചിരിക്കുകയാണ്. ഒരു പ്രത്യേക സമുദായത്തെ മാത്രം ലക്ഷ്യമിട്ട് വന്ധ്യംകരണം പോലുള്ള നടപടികൾ വേണമെന്ന് ആവശ്യപ്പെടുന്നത് തികച്ചും വിവേചനപരവും അടിസ്ഥാനരഹിതവുമാണെന്ന് ചൂണ്ടിക്കാട്ടി സാമൂഹിക പ്രവർത്തകരും മറ്റു പലരും അദ്ദേഹത്തിനെതിരെ രംഗത്തെത്തി.
മുമ്പും തന്റെ പല അഭിപ്രായപ്രകടനങ്ങളിലൂടെയും പുസ്തകങ്ങളിലൂടെയും നിയാസ് ഖാൻ വാർത്തകളിൽ ഇടംനേടിയിട്ടുണ്ട്. എന്നാൽ, തന്റെ അഭിപ്രായം മുസ്ലീം സമുദായത്തിന്റെ വികസനവും പുരോഗതിയും മാത്രം ലക്ഷ്യമിട്ടുള്ളതാണെന്നാണ് ഈ വിഷയത്തിൽ അദ്ദേഹത്തിന്റെ വിശദീകരണം. നിലവിൽ ഈ വിഷയവുമായി ബന്ധപ്പെട്ട് സോഷ്യൽ മീഡിയയിലടക്കം വലിയ രീതിയിലുള്ള ചർച്ചകളും വാദപ്രതിവാദങ്ങളുമാണ് ഉയർന്നുവരുന്നത്.
