‘ഇംഗ്ലീഷിൽ സംസാരിക്കൂ..’; ഫിഫയുടെ സ്പാനിഷ് വിലക്ക്: അധികൃതരോട് ഏറ്റുമുട്ടി അഷ്റഫ് ഹക്കീമി; ഇംഗ്ലീഷ് അറിയാതെ വാർത്താ സമ്മേളനത്തിൽ വലഞ്ഞ് വിനീഷ്യസ് ജൂനിയർ
ന്യൂയോർക്: ബ്രസീൽ, മൊറോക്കോ ടീമുകളിലെ താരങ്ങളോട് സ്പാനിഷ് ഭാഷയിൽ ചോദ്യങ്ങൾ ചോദിക്കുന്നതിന് ഫിഫ മാധ്യമപ്രവർത്തകർക്ക് വിലക്ക് ഏർപ്പെടുത്തിയത് വലിയ വിവാദങ്ങൾക്ക് കാരണമായിരിക്കുകയാണ്. എന്നാൽ കർശനമായ ഈ ഫിഫ പ്രോട്ടോക്കോൾ വാർത്താ സമ്മേളനത്തിനിടെ പരസ്യമായി ലംഘിച്ചുകൊണ്ട് മൊറോക്കൻ ഇന്റർനാഷണൽ ഫുട്ബോൾ താരമായ അഷ്റഫ് ഹക്കീമി രംഗത്തെത്തി. വാർത്താ സമ്മേളനത്തിന്റെ തുടക്കത്തിൽ തന്നെ ഇംഗ്ലീഷ്, ഫ്രഞ്ച്, അറബിക്, പോർച്ചുഗീസ് എന്നീ നാല് ഭാഷകൾ മാത്രമേ ചോദ്യം ചോദിക്കാൻ ഉപയോഗിക്കാവൂ എന്ന് ഒരു ഫിഫ പ്രതിനിധി കർശന നിർദ്ദേശം നൽകിയിരുന്നു. എന്നാൽ ഈ നിയമം അവഗണിച്ച് ഒരു മെക്സിക്കൻ റിപ്പോർട്ടർ സ്പാനിഷ് ഭാഷയിൽ ചോദ്യം ചോദിച്ചതോടെ ഫിഫ പ്രതിനിധി ഉടൻ തന്നെ ഇടപെട്ട് അത് തടഞ്ഞു. സ്പെയിനിൽ ജനിച്ച അഷ്റഫ് ഹക്കീമി തനിക്ക് സ്പാനിഷ് ഭാഷ പൂർണ്ണമായും മനസ്സിലാകുമെന്നും ഇതിനുള്ള മറുപടി താൻ ഇംഗ്ലീഷിൽ നൽകിക്കൊള്ളാമെന്നും പറഞ്ഞിട്ടും ഫിഫ പ്രതിനിധി വിസമ്മതിച്ചു. ഇതോടെ താരം കാര്യങ്ങൾ സ്വന്തം നിലയിൽ ഏറ്റെടുത്ത് സ്പാനിഷിൽ തന്നെ ചോദ്യം ചോദിക്കാൻ മാധ്യമപ്രവർത്തകനോട് നേരിട്ട് ആവശ്യപ്പെടുകയും, തുടർന്ന് റിപ്പോർട്ടർ സ്പാനിഷിൽ ചോദിച്ച ചോദ്യത്തിന് ഹക്കീമി ഇംഗ്ലീഷിൽ മറുപടി നൽകുകയും ചെയ്തു.
അതേസമയം, അഷ്റഫ് ഹക്കീമി ഫിഫ അധികൃതരെ ശക്തമായി നേരിട്ടപ്പോൾ ബ്രസീലിയൻ സൂപ്പർ താരം വിനീഷ്യസ് ജൂനിയറിന് സമാനമായ സാഹചര്യത്തിൽ വലിയ രീതിയിൽ ബുദ്ധിമുട്ടേണ്ടി വന്നു. വാർത്താ സമ്മേളനത്തിൽ വിനീഷ്യസിനോട് ഇംഗ്ലീഷിലാണ് ചോദ്യങ്ങൾ ചോദിച്ചിരുന്നത്. എന്നാൽ ചോദ്യം ചോദിക്കുന്നത് സ്പെയിനിൽ നിന്നുള്ള മാധ്യമപ്രവർത്തകനാണെന്ന് മനസ്സിലാക്കിയ താരം, തന്നോട് സ്പാനിഷ് ഭാഷയിലേക്ക് മാറി ചോദ്യം ചോദിക്കാൻ അഭ്യർത്ഥിക്കുകയായിരുന്നു. തുടർന്ന് മാധ്യമപ്രവർത്തകന്റെ ചോദ്യങ്ങൾക്ക് സ്പാനിഷിൽ മറുപടി പറയാൻ ആരംഭിച്ച താരത്തെ ഫിഫ അധികൃതർ ഉടൻ തന്നെ വിലക്കി. അവിടെ റിമോട്ട് ഇന്റർപ്രെട്ടേഷൻ (വിദൂര വിവർത്തന സംവിധാനം) ലഭ്യമാകാത്തതിനാലാണ് സ്പാനിഷ് ഭാഷ അനുവദിക്കാത്തതെന്ന വിചിത്രമായ ന്യായീകരണമാണ് അധികൃതർ ഇതിനായി നിരത്തിയത്. ഇംഗ്ലീഷ് ഭാഷ നന്നായി കൈകാര്യം ചെയ്യാൻ അറിയാത്ത വിനീഷ്യസ് ജൂനിയർ ഇതോടെ വാർത്താ സമ്മേളനത്തിൽ കൃത്യമായി മറുപടി പറയാനാകാതെ ഏറെ വലയുന്ന സാഹചര്യമാണുണ്ടായത്. ലോകത്തിലെ ഏറ്റവും പ്രമുഖമായ ഒരു ഭാഷയ്ക്ക് ഫിഫ ഏർപ്പെടുത്തിയ ഈ കടുത്ത നിയന്ത്രണവും താരങ്ങളോടുള്ള സമീപനവും കായിക ലോകത്ത് ഇപ്പോൾ വലിയ രീതിയിലുള്ള ചർച്ചകൾക്കും വിമർശനങ്ങൾക്കും വഴിവെച്ചിരിക്കുകയാണ്.
