പ്ലാസ്റ്റിക് സ്റ്റൂളിന് നടുവിൽ എന്തിനാണ് ആ ദ്വാരം?
വീടുകളിലും ഹോട്ടലുകളിലും ഒത്തുചേരലുകളിലും നാം സ്ഥിരമായി കാണുന്ന ഒന്നാണ് പ്ലാസ്റ്റിക് സ്റ്റൂളുകൾ. എന്നാൽ ഇവയുടെ മധ്യഭാഗത്തുള്ള ചെറിയ വൃത്താകൃതിയിലുള്ള ദ്വാരത്തെക്കുറിച്ച് എപ്പോഴെങ്കിലും ചിന്തിച്ചിട്ടുണ്ടോ? ഒരു ഡിസൈൻ ഭംഗിക്കോ അല്ലെങ്കിൽ സ്റ്റൂൾ കൈയിലെടുക്കാൻ എളുപ്പത്തിനോ വേണ്ടിയാണ് ഈ ദ്വാരം എന്ന് കരുതുന്നതെങ്കിൽ തെറ്റി. ഈ ചെറിയ അപ്പർച്ചറിന് പിന്നിൽ ലളിതവും എന്നാൽ അതിശയകരവുമായ നിരവധി പ്രായോഗിക കാരണങ്ങളുണ്ട്.
വാക്വം തടയുന്നു: സ്ഥലം ലാഭിക്കുന്നതിനായി സ്റ്റൂളുകൾ ഒന്നന്നിനു മുകളിൽ ഒന്നായി അടുക്കി വെക്കുക സാധാരണമാണ്. എന്നാൽ പ്രതലം പൂർണമായും അടഞ്ഞ രീതിയിലാണെങ്കിൽ, ഇവയ്ക്കിടയിൽ വായു കുടുങ്ങി വാക്വം അല്ലെങ്കിൽ സക്ഷൻ പ്രഭാവം ഉണ്ടാകാൻ സാധ്യതയുണ്ട്. ഇത് സ്റ്റൂളുകൾ വേർപെടുത്തിയെടുക്കുന്നത് ബുദ്ധിമുട്ടാക്കും. മധ്യത്തിലെ ദ്വാരം വായു സഞ്ചാരം സാധ്യമാക്കുന്നതിലൂടെ സക്ഷൻ ഇല്ലാതാക്കുകയും ഇവ എളുപ്പത്തിൽ വേർപെടുത്താൻ സഹായിക്കുകയും ചെയ്യുന്നു.
ഭാരവും സമ്മർദ്ദവും കുറയ്ക്കുന്നു: സ്റ്റൂളിലിരിക്കുന്ന ആളുടെ ഭാരം സീറ്റ് വഴി കാലുകളിലേക്ക് കൃത്യമായി വിഭജിച്ചു പോകാൻ ഇതിന്റെ ലേഔട്ട് സഹായിക്കുന്നു. മധ്യത്തിൽ നൽകാറുള്ള ഇത്തരം ദ്വാരങ്ങൾ നിർമ്മാണ വേളയിലെ സമ്മർദ്ദം ഒഴിവാക്കാനും രൂപകൽപ്പനയ്ക്ക് ആവശ്യമായ ഘടനാപരമായ പിന്തുണ നൽകാനും സഹായിക്കും.
വെള്ളം കെട്ടിക്കിടക്കില്ല: ബാത്ത്റൂമുകളിലോ തുറസ്സായ സ്ഥലങ്ങളിലോ ഉപയോഗിക്കുമ്പോഴും കഴുകി വൃത്തിയാക്കുമ്പോഴും വെള്ളം സീറ്റിന് മുകളിൽ കെട്ടിക്കിടക്കാതെ എളുപ്പത്തിൽ ഒഴുകിപ്പോകാൻ ഈ ദ്വാരം ഉപകരിക്കുന്നു. ഇത് സ്റ്റൂൾ വേഗത്തിൽ ഉണങ്ങി ലഭിക്കാനും ശുചിത്വം ഉറപ്പാക്കാനും സഹായിക്കും.
മെറ്റീരിയൽ കാര്യക്ഷമതയും ഉത്പാദനവും: ഇൻജക്ഷൻ മോൾഡിങ് രീതിയിലാണ് പ്ലാസ്റ്റിക് സ്റ്റൂളുകൾ നിർമ്മിക്കുന്നത്. ഉരുകിയ പ്ലാസ്റ്റിക് അച്ചിൽ ഒഴിച്ച് തണുപ്പിക്കുമ്പോൾ അസമമായി ചുരുങ്ങുന്നതും വശങ്ങൾ വളഞ്ഞുപോകുന്നതും തടയാൻ ഇത്തരം ദ്വാരങ്ങൾ സഹായിക്കും. കൂടാതെ, വൻതോതിൽ ഉത്പാദനം നടത്തുമ്പോൾ ആവശ്യമായ ദൃഢത നിലനിർത്തിക്കൊണ്ടുതന്നെ പ്ലാസ്റ്റിക്കിന്റെ അളവ് കുറയ്ക്കാനും, അതുവഴി ഉത്പാദനച്ചെലവ് ഗണ്യമായി ലാഭിക്കാനും നിർമ്മാതാക്കൾക്ക് ഇതിലൂടെ സാധിക്കുന്നു.
