ഇന്ത്യ രണ്ടാമത്തെ യുദ്ധവിമാന നിർമാണം ആരംഭിക്കുന്നു; ആകാശ് മിസൈൽ ഓർഡറുകൾ 38,000 കോടിയിൽ
ന്യൂഡൽഹി: ഒറ്റ ഉൽപ്പാദന കേന്ദ്രത്തെ ആശ്രയിക്കുന്നത് കുറയ്ക്കുന്നതിനും ആഭ്യന്തര പ്രതിരോധ ഉൽപ്പാദനം ശക്തമാക്കുന്നതിനുമായി രാജ്യത്ത് രണ്ടാമത്തെ യുദ്ധവിമാന ഉൽപ്പാദന ലൈൻ സ്ഥാപിക്കാൻ ഇന്ത്യ പദ്ധതിയിടുന്നു. ഒരു നിർമാണ ശൃംഖലയെ മാത്രം ആശ്രയിക്കുന്ന സാഹചര്യം ഒഴിവാക്കാനാണ് ഈ നീക്കമെന്ന് പ്രതിരോധ സെക്രട്ടറി രാജേഷ് സിങ് പിഎഎഫ്‌ഐ പരിപാടിയിൽ പറഞ്ഞു.
AMCA പ്രോഗ്രാമിനായുള്ള ബദൽ യുദ്ധവിമാന ഉൽപ്പാദന നിരകൾക്കായി ഷോർട്ട്‌ലിസ്റ്റ് ചെയ്ത മൂന്ന് കമ്പനികളുടെ നിർദ്ദേശങ്ങൾ സർക്കാർ നിലവിൽ വിലയിരുത്തുകയാണ്. കൂടാതെ, മിസൈൽ ഉൽപ്പാദന രംഗത്ത് ഒരു പൊതുമേഖലാ സ്ഥാപനത്തെ മാത്രം ആശ്രയിക്കാതെ, സ്കെയിലും ഉൽപ്പാദന ശേഷിയും വർധിപ്പിക്കുന്നതിനായി ഒന്നിലധികം നിർമ്മാതാക്കളെ ഉൾപ്പെടുത്താനും സർക്കാർ ഉദ്ദേശിക്കുന്നു.
കര സംവിധാനങ്ങൾ, പീരങ്കികൾ, ചെറു ആയുധങ്ങൾ, വാഹനങ്ങൾ എന്നിവയിൽ ഇന്ത്യ ഗണ്യമായ സ്വയംപര്യാപ്തത കൈവരിച്ചിട്ടുണ്ട്. എങ്കിലും എയ്‌റോസ്‌പേസ് അടക്കമുള്ള ചില സാങ്കേതിക മേഖലകളിൽ വിദേശ ആശ്രയത്വം തുടരുന്നുണ്ട്. വരുംനാളുകളിൽ പ്രമുഖ വിദേശ സാങ്കേതിക സംഭരണങ്ങളിൽ പ്രബലമായ ‘മേക്ക്-ഇൻ-ഇന്ത്യ’ ഘടകം ഉറപ്പാക്കും. പ്രതിരോധ മൂലധന ചെലവിന്റെ 75 ശതമാനവും ആഭ്യന്തരമായി ചെലവഴിക്കാനാണ് ലക്ഷ്യമിടുന്നത്.
2014-ൽ ₹46,000 കോടിയായിരുന്ന പ്രതിരോധ വ്യവസായ വിറ്റുവരവ് ഇപ്പോൾ ₹1.8 ലക്ഷം കോടിയായി ഉയർന്നു. സായുധ സേനയ്ക്ക് വിദേശത്തുനിന്ന് നേരിട്ടുള്ള ആയുധ സംഭരണം ബുദ്ധിമുട്ടാക്കിയിട്ടുണ്ടെന്നും ഇറക്കുമതിക്ക് വ്യക്തമായ ന്യായീകരണം ആവശ്യമാണെന്നും അദ്ദേഹം വ്യക്തമാക്കി.
ഇന്ത്യൻ നിർമ്മിത മിസൈലുകളുടെ നിർമ്മാണച്ചെലവ് കുറവാണെന്നത് വലിയ കയറ്റുമതി സാധ്യത നൽകുന്നുണ്ട്. ആകാശ് മിസൈൽ സംവിധാനത്തിന്റെ ഓർഡറുകൾ ഇതിനകം ₹38,000 കോടിയിൽ എത്തിയിട്ടുണ്ട്. 2030-ഓടെ ഇത് ₹50,000 കോടിയാക്കാനാണ് സർക്കാരിന്റെ ലക്ഷ്യമെങ്കിലും, നിലവിലെ താത്പര്യം കണക്കിലെടുത്ത് 2028-2029 ഓടെ തന്നെ ഈ നേട്ടം കൈവരിക്കാനാകുമെന്ന് പ്രതീക്ഷിക്കുന്നു.
രണ്ടാം ലോക മഹായുദ്ധത്തിനുശേഷം ആഗോളതലത്തിൽ സംഘർഷങ്ങൾ ഏറ്റവും ഉയർന്ന നിലയിലാണ്. ഭാവി യുദ്ധങ്ങളിൽ ഡ്രോണുകൾ, ദീർഘദൂര ആയുധങ്ങൾ, വ്യോമ പ്രതിരോധം എന്നിവ പ്ര പ്രധാന ഘടകങ്ങളാകും. ആളില്ലാ സംവിധാനങ്ങൾ ഉൾപ്പെടുത്തിയ ടാങ്കുകൾ വാങ്ങാനുള്ള നിർദ്ദേശം അടുത്തിടെ പ്രഖ്യാപിച്ചതായും പ്രതിരോധ സെക്രട്ടറി വ്യക്തമാക്കി.
