‘ഗസ്സയിൽ ചെയ്തത് വെസ്റ്റ് ബാങ്കിലും ആവർത്തിക്കണം’; സമ്പൂർണ യുദ്ധത്തിന് ആഹ്വാനം ചെയ്ത് ഇസ്രയേൽ ധനമന്ത്രി
തെൽഅവീവ്: ഗസ്സയിൽ നടപ്പിലാക്കിയതിന് സമാനമായ സൈനിക നടപടികൾ വെസ്റ്റ് ബാങ്കിലും സ്വീകരിക്കണമെന്ന് ഇസ്രയേൽ ധനമന്ത്രി ബോസലേൽ സ്മോട്രിച്ച് ആവശ്യപ്പെട്ടു. ഇസ്രയേലി മാധ്യമമായ വൈനെറ്റിന് നൽകിയ അഭിമുഖത്തിലാണ് അദ്ദേഹം ഈ പ്രസ്താവന നടത്തിയത്.
ഗസ്സയിലെയും ലെബനനിലെയും ഇസ്രയേൽ അധീനതയിലുള്ള പ്രദേശങ്ങൾ രാജ്യത്തോട് കൂട്ടിച്ചേർക്കണമെന്നും ഫലസ്തീൻ അതോറിറ്റിയെ പിരിച്ചുവിടണമെന്നും അദ്ദേഹം ആഹ്വാനം ചെയ്തു. വെസ്റ്റ് ബാങ്കിലെ ആയുധങ്ങളും തുരങ്കങ്ങളും ഉൾപ്പെടെയുള്ള ഭീകരവാദ അടിസ്ഥാന സൗകര്യങ്ങൾ പൂർണ്ണമായും ഇല്ലാതാക്കാൻ അവിടെ ഒരു സമ്പൂർണ യുദ്ധം അനിവാര്യമാണെന്നാണ് 1967 മുതൽ ഇസ്രയേൽ കൈവശം വെച്ചിരിക്കുന്ന വെസ്റ്റ് ബാങ്ക് മുഴുവനായും രാജ്യത്തോട് ചേർക്കണമെന്ന് വാദിക്കുന്ന തീവ്ര വലതുപക്ഷ നേതാവായ സ്മോട്രിച്ചിന്റെ നിലപാട്.
ഇതിനിടെ, വെസ്റ്റ് ബാങ്കിൽ ഇസ്രയേൽ കുടിയേറ്റക്കാരുടെ ആക്രമണങ്ങൾ വലിയ തോതിൽ വർധിക്കുന്നതായി ഐക്യരാഷ്ട്രസഭയുടെ റിപ്പോർട്ടുകൾ വ്യക്തമാക്കുന്നുണ്ട്. കഴിഞ്ഞ ജനുവരി മുതൽ ജൂലൈ അവസാനം വരെ ഫലസ്തീനികൾക്കെതിരെ 1,330-ലധികം ആക്രമണങ്ങളാണ് നടന്നതെന്നും പ്രതിദിനം ശരാശരി ആറ് ആക്രമണങ്ങൾ ഉണ്ടാകുന്നുണ്ടെന്നും യു.എൻ മാനവികകാര്യ ഏകോപന ഓഫീസ് അറിയിച്ചു.
അതേസമയം, ധനമന്ത്രിയുടെ ഈ വിവാദ പ്രസ്താവനയ്ക്കെതിരെ ഫലസ്തീൻ വിദേശകാര്യ മന്ത്രാലയം രംഗത്തെത്തി. സ്വതന്ത്ര ഫലസ്തീൻ രാഷ്ട്ര രൂപീകരണത്തിനുള്ള സാധ്യതകൾ ഇല്ലാതാക്കാനും പ്രദേശത്ത് പുതിയ സാഹചര്യങ്ങൾ ബലപ്രയോഗത്തിലൂടെ അടിച്ചേൽപ്പിക്കാനുമുള്ള ഗൂഢപദ്ധതികളുടെ സൂചനയാണ് മന്ത്രിയുടെ പ്രസ്താവനയെന്ന് ഫലസ്തീൻ വിദേശകാര്യ മന്ത്രാലയം കുറ്റപ്പെടുത്തി.
