21/11/2026
[fontresizer_tawhidurrahmandear_widget]

‘എന്റെ ജീവിതത്തിൽ ഇരുട്ട് പരത്തിയവർ ഇന്ന് രാജ്യം മുഴുവൻ അന്ധകാരത്തിലാഴ്ത്തുന്നു’: നീതി തേടി അലയുകയാണെന്ന് ബിൽക്കീസ് ബാനു

 ‘എന്റെ ജീവിതത്തിൽ ഇരുട്ട് പരത്തിയവർ ഇന്ന് രാജ്യം മുഴുവൻ അന്ധകാരത്തിലാഴ്ത്തുന്നു’: നീതി തേടി അലയുകയാണെന്ന് ബിൽക്കീസ് ബാനു

കൊച്ചി: തന്റെ ജീവിതത്തിൽ ഇരുട്ട് പരത്തിയവർ ഇന്ന് രാജ്യം മുഴുവൻ അന്ധകാരത്തിലാഴ്ത്താൻ ശ്രമിക്കുകയാണെന്ന് ഗുജറാത്ത് വംശഹത്യയുടെ ജീവിക്കുന്ന രക്തസാക്ഷി ബിൽക്കീസ് ബാനു. കൊച്ചിയിൽ വെൽഫെയർ പാർട്ടി സംസ്ഥാന സമ്മേളനത്തിൽ മുഖ്യാതിഥിയായി പങ്കെടുത്ത് സംസാരിക്കുകയായിരുന്നു അവർ.

ഒരു ദിവസം താനും കുടുംബവും ഉറക്കമുണർന്നത് ഭയാനകമായൊരു ദുഃസ്വപ്നത്തിലേക്കായിരുന്നുവെന്ന് ബിൽക്കീസ് ബാനു ഓർത്തെടുത്തു. ആ ദുരന്തത്തിന് ഉത്തരവാദികളായവർ ഇന്നും തങ്ങളെ വേട്ടയാടിക്കൊണ്ടിരിക്കുകയാണ്. ഗുജറാത്തിൽ തങ്ങൾ കണ്ടതും അനുഭവിച്ചതുമായ ക്രൂരതകൾ ഇന്ന് രാജ്യത്തിന്റെ വിവിധ ഭാഗങ്ങളിൽ ആവർത്തിക്കപ്പെടുകയാണ്. നീതി തേടി രാജ്യത്തുടനീളം അലയേണ്ടിവരുന്ന സാഹചര്യമാണ് തനിക്കുള്ളതെന്നും അവർ പറഞ്ഞു.

ഈ കാലയളവിനിടെ നിരവധി വീടുകൾ മാറിത്താമസിക്കേണ്ടിവന്നു. തങ്ങളെ ആക്രമിച്ച കാലത്ത് ഗുണ്ടകളും ക്രിമിനലുകളുമായിരുന്നു അക്രമികൾക്കൊപ്പമുണ്ടായിരുന്നതെങ്കിൽ, ഇന്ന് പൊലീസും ഉദ്യോഗസ്ഥരും ഭരണസംവിധാനവും ചേർന്നാണ് അവരുടെ താൽപ്പര്യങ്ങൾ നടപ്പാക്കിക്കൊടുക്കുന്നത്. തന്നെ ആക്രമിച്ച കേസിലെ രണ്ട് പ്രതികളുടെ ശിക്ഷ സുപ്രീംകോടതി കഴിഞ്ഞ ദിവസം സസ്‌പെൻഡ് ചെയ്തത് വലിയ ഞെട്ടലുണ്ടാക്കിയ അനുഭവമായിരുന്നു. അവസാന പ്രതീക്ഷയായ നീതിന്യായ സംവിധാനത്തിൽനിന്നുപോലും നിരാശ നേരിടേണ്ടിവരുന്നത് ഏറെ വേദനാജനകമാണെന്നും ബിൽക്കീസ് ബാനു വ്യക്തമാക്കി.

അതേസമയം, ഈ അന്ധകാരകാലത്തും കേരളത്തെ വലിയ പ്രതീക്ഷയോടെയാണ് കാണുന്നതെന്ന് അവർ പറഞ്ഞു. കേരളത്തിലെത്തിയതു മുതൽ ലഭിച്ച സ്നേഹവും പരിഗണനയും ഏറെ സന്തോഷം പകരുന്നതാണ്. ജീവിതത്തിൽ സംഭവിച്ചതെല്ലാം ഒരു ദുഃസ്വപ്നമായി മാത്രം കാണാനാണ് ആഗ്രഹിക്കുന്നത്. ആരോടും പ്രതികാരം ചെയ്യണമെന്ന് ഒരിക്കലും തോന്നിയിട്ടില്ലെന്നും, തനിക്ക് വേണ്ടത് പ്രതികാരമല്ല, സ്വാഭാവിക നീതിയാണെന്നും അവർ കൂട്ടിച്ചേർത്തു. നീതിക്കായുള്ള ഈ പോരാട്ടത്തിൽ എല്ലാവരും ഒപ്പമുണ്ടാകണമെന്നും ബിൽക്കീസ് ബാനു അഭ്യർത്ഥിച്ചു.

Also read: