ഷേയ്ഖ് ഹസീനയെ വിട്ടുനല്കണം; ഇന്ത്യയോട് ബംഗ്ലാദേശ്
ഡാക്ക: മനുഷ്യത്വത്തിനെതിരായ കുറ്റകൃത്യങ്ങൾക്ക് ധാക്കയിലെ പ്രത്യേക ട്രൈബ്യൂണൽ വധശിക്ഷക്ക് വിധിച്ച മുൻ പ്രധാനമന്ത്രി ഷെയ്ഖ് ഹസീനയെ ഇന്ത്യ കൈമാറണമെന്ന് ബംഗ്ലാദേശ്. ഹസീനയ്ക്കും അസദുസ്സമാൻ ഖാനും എതിരെ ട്രൈബ്യൂണൽ വിധി പ്രസ്താവിച്ചതിന്റെ പശ്ചാത്തലത്തിൽ, ശിക്ഷിക്കപ്പെട്ട ഈ പ്രതികളെ ഉടൻ തിരികെ അയച്ച് ബംഗ്ലാദേശിലെ കോടതികളിൽ ഹാജരാക്കാൻ സഹായിക്കണമെന്ന് വിദേശകാര്യ മന്ത്രാലയം പുറത്തിറക്കിയ പ്രസ്താവനയിൽ ഇടക്കാല സർക്കാർ ഇന്ത്യയോട് അഭ്യർത്ഥിച്ചു.
അടുത്ത സുഹൃദ് രാജ്യം എന്ന നിലയിൽ ഇന്ത്യ പൂർണ്ണ സഹകരണം നൽകുമെന്നും ഗുരുതരമായ കുറ്റകൃത്യങ്ങൾക്ക് ശിക്ഷിക്കപ്പെട്ട വ്യക്തികൾക്ക് അഭയം നൽകില്ലെന്നും ബംഗ്ലാദേശ് പ്രതീക്ഷ പ്രകടിപ്പിച്ചു.
2024-ലെ വിദ്യാർത്ഥി പ്രക്ഷോഭം അടിച്ചമർത്തിയതിൽ ഹസീനയുടെ പങ്കിനാണ് ട്രൈബ്യൂണൽ വധശിക്ഷ വിധിച്ചത്. 2013-ലെ കൈമാറ്റ ഉടമ്പടി പ്രകാരം, ഈ കുറ്റങ്ങൾ രാഷ്ട്രീയ സ്വഭാവമുള്ളതല്ലെന്നും അതിനാൽ കൈമാറ്റത്തിന് നിയമതടസ്സങ്ങളില്ലെന്നും ബംഗ്ലാദേശ് വാദിക്കുന്നു.
നേരത്തെ കുറഞ്ഞ കുറ്റങ്ങൾക്ക് ഹസീനയെ കൈമാറണമെന്ന് ആവശ്യപ്പെട്ട് 2024 അവസാനവും 2025 ആദ്യവും സമർപ്പിച്ച ഔദ്യോഗിക അഭ്യർത്ഥനകളോട് ഇന്ത്യ പ്രതികരിച്ചിരുന്നില്ല. 2024 ഓഗസ്റ്റ് 5 മുതൽ ഇന്ത്യയിൽ പ്രവാസ ജീവിതം നയിക്കുന്ന 77-കാരിയായ ഷെയ്ഖ് ഹസീനയെ പ്രതിഷേധക്കാർ വസതി വളഞ്ഞപ്പോൾ ഇന്ത്യൻ വ്യോമസേനയാണ് ധാക്കയിൽ നിന്ന് രക്ഷപ്പെടുത്തിയത്. പുതിയ കൈമാറ്റ അപേക്ഷയിൽ കേന്ദ്ര സർക്കാർ ഇതുവരെ ഔദ്യോഗികമായി പ്രതികരിച്ചിട്ടില്ല.
