അതിസമ്പന്നര്ക്കുള്ള നികുതിയില് പ്രതിഷേധം; യുകെ ജീവിതം മതിയാക്കി ശതകോടീശ്വരന് ലക്ഷ്മി മിത്തല് ഇനി താമസം ദുബൈയിലും സ്വിറ്റ്സര്ലന്ഡിലും
ലണ്ടൻ: പതിറ്റാണ്ടുകളായി യുകെയിലെ അതിസമ്പന്നരുടെ പട്ടികയിൽ മുന്നിരയിലുണ്ടായിരുന്ന ഇന്ത്യൻ വംശജനായ സ്റ്റീൽ വ്യവസായി ലക്ഷ്മി മിത്തൽ രാജ്യം വിട്ടു. സമ്പന്നരെ ലക്ഷ്യമിട്ട് ലേബർ സർക്കാർ കൂടുതൽ നികുതി പരിഷ്കാരങ്ങൾ കൊണ്ടുവരാൻ ഒരുങ്ങുന്നതിനിടയിലാണ് അദ്ദേഹം യുകെ ജീവിതം മതിയാക്കിയിരിക്കുന്നത്. ദുബൈയിലേക്കും സ്വിറ്റ്സര്ലന്ഡിലുമായിരിക്കും ഇനി അദ്ദേഹം കഴിയുക. ദി സൺഡേ ടൈംസ് അതിസമ്പന്ന പട്ടികയില് എട്ട് തവണ ഒന്നാം സ്ഥാനക്കാരനായിരുന്നു മിത്തൽ.
മുപ്പത് വർഷത്തിലേറെയായി മിത്തൽ യുകെയിലെ ബിസിനസ് രംഗത്തും സാമൂഹിക മേഖലയിലും സജീവമായിരുന്നു. ഈ കാലയളവിൽ അദ്ദേഹം ലണ്ടനിൽ ആഡംബര വസതികൾ സ്വന്തമാക്കി. ഫുട്ബോൾ ക്ലബ്ബായ ക്വീൻസ് പാർക്ക് റേഞ്ചേഴ്സിൽ നിക്ഷേപം നടത്തി.
സര്ക്കാര് നീക്കത്തില് പ്രതിഷേധിച്ച് മിത്തല് നാടുവിടുന്നത്. ലേബർ പാർട്ടിക്ക് അഞ്ചു മില്യൺ പൗണ്ടിലധികം സംഭാവനയും നൽകിയയാളാണ് അദ്ദേഹം എന്നതാണു ശ്രദ്ധേയം. 2008-ൽ അദ്ദേഹത്തിന്റെ സ്വകാര്യ ആസ്തി ഏകദേശം 27.7 ബില്യൺ പൗണ്ടായി ഉയർന്നിരുന്നതായി ദി സൺഡേ ടൈംസ് റിപ്പോര്ട്ട് ചെയ്തിരുന്നു.
വിദേശ പൗരന്മാർക്ക് പ്രാദേശിക വരുമാനത്തിന് മാത്രം യുകെ നികുതി അടയ്ക്കാൻ അനുവദിച്ചിരുന്ന ‘നോൺഡോം'(Non-dom) നികുതി പദവി നിർത്തലാക്കാനുള്ള ലേബർ സർക്കാരിന്റെ നീക്കമാണ് മിത്തലിന്റെ രാജ്യം വിടാനുള്ള തീരുമാനത്തിന് പിന്നിലെ പ്രധാന കാരണം എന്ന് അടുത്ത വൃത്തങ്ങൾ സ്ഥിരീകരിക്കുന്നു. ഇതിനു പുറമെ, യുകെയിലെ 40% വരെയുള്ള അനന്തരാവകാശ നികുതിയും (Inheritance Tax) തീരുമാനത്തിന് ആക്കം കൂട്ടി. ദുബൈയില് ഈ നികുതി ഇല്ലാത്തതും സ്വിറ്റ്സർലൻഡിൽ ഇളവുകൾ ലഭ്യമായതുമായ സാഹചര്യത്തിലാണ് അവിടേക്ക് താമസം മാറാൻ തീരുമാനിച്ചത്.
മിത്തലിന് ദുബൈയില് ഇതിനകം വസതിയുണ്ട്. അടുത്തിടെ നയ ദ്വീപിലെ ഷെവൽ ബ്ലാങ്ക് ഡെവലപ്മെന്റിൽ മികച്ച പ്ലോട്ടുകൾ അദ്ദേഹം വാങ്ങുകയും ചെയ്തിരുന്നു. 2029-ൽ പൂർത്തിയാകുന്ന ഈ ആഡംബര വസതിക്കു പുറമെ, എമിറേറ്റ്സ് ഹിൽസിൽ 200 മില്യൺ ഡോളറിന്റെ ഒരു ബംഗ്ലാവും മിത്തൽ സ്വന്തമാക്കിയിട്ടുണ്ട്.
2025-ലെ സൺഡേ ടൈംസ് റിച്ച് ലിസ്റ്റ് പ്രകാരം 15.444 ബില്യൺ പൗണ്ട് ആസ്തിയുള്ള മിത്തൽ, സമ്പന്നരായ താമസക്കാരുടെ തുടർച്ചയായ കൂടുമാറ്റത്തിനിടെ യുകെ വിട്ടുപോയ ഏറ്റവും സമ്പന്നനായ വ്യക്തിയായി മാറി. ടെക് ഭീമന്മാരായ ഇംപ്രോബബിളിലെ ഹെർമൻ നരുല, റെവോളട്ടിലെ നിക്ക് സ്റ്റോറോൺസ്കി എന്നിവരുൾപ്പെടെ മറ്റ് പ്രമുഖരും ഭാവിയിലെ നികുതി അനിശ്ചിതത്വത്തെക്കുറിച്ചുള്ള ആശങ്കകൾ ചൂണ്ടിക്കാട്ടി ദുബൈയിലേക്ക് താമസം മാറിയവരുടെ കൂട്ടത്തിലുണ്ട്.
ചാൻസലർ റേച്ചൽ റീവ്സ് ബജറ്റ് പ്രഖ്യാപിക്കുന്നതിന് ദിവസങ്ങൾക്ക് മുമ്പാണ് ഈ നീക്കം. മൂലധന നേട്ട നികുതി വർധന, സംരംഭകർക്കുള്ള ഇളവ് കുറയ്ക്കൽ, കുടുംബ ഉടമസ്ഥതയിലുള്ള സ്ഥാപനങ്ങൾക്ക് ഉയർന്ന ലെവികൾ എന്നിവ ഉൾപ്പെടെയുള്ള നികുതി വർധനകൾ മുൻ ബജറ്റുകളിൽ ഉൾപ്പെടുത്തിയിരുന്നു.
രാജസ്ഥാനിലെ ഒരു സ്റ്റീൽ നിർമാണ കുടുംബത്തിലാണ് മിത്തൽ ജനിച്ചത്. കൊൽക്കത്ത സർവകലാശാലയിൽ നിന്ന് കൊമേഴ്സ് ബിരുദം നേടിയ ശേഷം പിതാവിന്റെ സ്ഥാപനത്തിൽ ചേർന്നു. 1976-ൽ ഇന്തോനേഷ്യയിൽ സ്വന്തമായി ആദ്യത്തെ സ്റ്റീൽ പ്ലാന്റ് സ്ഥാപിച്ചു. ഇത് പിന്നീട് ആർസെലർ മിത്തൽ എന്ന പേരിൽ ലോകത്തിലെ രണ്ടാമത്തെ വലിയ ഉരുക്ക് ഉൽപ്പാദക കമ്പനിയായി വളർന്നു. 125,000-ൽ അധികം ആളുകൾക്ക് തൊഴിൽ നൽകുന്ന സ്ഥാപനമാണിത്. 2006-ൽ യൂറോപ്യൻ കമ്പനിയായ ആർസെലറിനെ ഏറ്റെടുത്തതിനുശേഷം യുകെയിൽ താമസമാക്കിയ മിത്തലും ഭാര്യ ഉഷയും ജീവകാരുണ്യ പ്രവർത്തനങ്ങൾക്ക് പേരുകേട്ടവരാണ്.
