വിമാനത്തിലിരുന്നും വീട്ടിലേക്ക് വീഡിയോകോൾ ചെയ്യാം; വിമാനത്തിൽ അതിവേഗ ഇന്റർനെറ്റുമായി ഖത്തർ എയർവേസ്
ദോഹ: ആകാശയാത്രയിൽ അതിവേഗ ഇന്റർനെറ്റ് വിപ്ലവത്തിന് തുടക്കമിട്ട് ഖത്തർ എയർവേയ്സ്. ലോകത്തിലാദ്യമായി സ്റ്റാർലിങ്ക് വൈഫൈ സംവിധാനം സജ്ജീകരിച്ച ബോയിംഗ് 787-8 വിമാനം ഖത്തർ എയർവേയ്സ് പുറത്തിറക്കി. ഇതോടെ ലോകത്തിലെ ഏറ്റവും വലിയ സ്റ്റാർലിങ്ക് സജ്ജീകൃത വൈഡ്ബോഡി വിമാനശേഖരമുള്ള എയർലൈൻ എന്ന പദവി ഖത്തർ എയർവേയ്സ് സ്വന്തമാക്കി.
റെക്കോർഡ് വേഗത്തിൽ നവീകരണം
വെറും എട്ടുമാസത്തിനുള്ളിൽ തങ്ങളുടെ എയർബസ് A350 വിമാനങ്ങളിൽ മുഴുവൻ സ്റ്റാർലിങ്ക് ഇൻസ്റ്റലേഷൻ പൂർത്തിയാക്കി ഖത്തർ എയർവേയ്സ് ചരിത്രം കുറിച്ചിരിക്കുന്നത്. നിലവിൽ മൂന്ന് ഡ്രീംലൈനറുകൾ ഉൾപ്പെടെ 120ഓളം വിമാനങ്ങളിൽ ഈ സേവനം ലഭ്യമാണ്. വരും മാസങ്ങളിൽ കൂടുതൽ ബോയിംഗ് 787 വിമാനങ്ങളിലേക്ക് ഈ അതിവേഗ കണക്റ്റിവിറ്റി വ്യാപിപ്പിക്കാനാണ് എയർലൈനിന്റെ തീരുമാനം. 2024 ഒക്ടോബറിൽ സേവനം ആരംഭിച്ചത് മുതൽ ഇതുവരെ 11 ദശലക്ഷത്തിലധികം യാത്രക്കാരാണ് വിമാനത്തിനുള്ളിലെ സൗജന്യ വൈഫൈ സേവനം പ്രയോജനപ്പെടുത്തിയത്.
യാത്രക്കാർക്ക് സെക്കൻഡിൽ 500 എംബിപിഎസ് (500Mbps) വരെ വേഗതയിലുള്ള ഇന്റർനെറ്റാണ് വിമാനത്തിൽ ലഭിക്കുന്നത്. ഇതിലൂടെ തടസ്സമില്ലാത്ത സ്ട്രീമിംഗ്, വീഡിയോ കോളുകൾ, ഗെയിമിംഗ് എന്നിവ സാധ്യമാകും. അമേരിക്ക, ഓസ്ട്രേലിയ, ഏഷ്യ, യൂറോപ്പ് തുടങ്ങിയ പ്രധാന റൂട്ടുകളിലെല്ലാം ഇപ്പോൾ ഈ സേവനം ലഭ്യമാണ്. ഒൻപത് തവണ ലോകത്തിലെ മികച്ച എയർലൈനുള്ള സ്കൈട്രാക്സ് അവാർഡ് നേടിയ ഖത്തർ എയർവേയ്സ്, സാങ്കേതിക മികവിലും തങ്ങൾ ബഹുദൂരം മുന്നിലാണെന്ന് ഒരിക്കൽ കൂടി തെളിയിച്ചിരിക്കുകയാണ്.
പ്രവർത്തനക്ഷമതയിലും വൻ മാറ്റം
യാത്രക്കാർക്ക് മാത്രമല്ല, വിമാനത്തിലെ ജീവനക്കാർക്കും സ്റ്റാർലിങ്ക് സേവനം വലിയ സഹായമാകുന്നുണ്ട്. തത്സമയ ഡാറ്റാ കൈമാറ്റം സാധ്യമാകുന്നതോടെ പൈലറ്റുമാർക്കും ക്യാബിൻ ക്രൂവിനും വിമാനത്തിന്റെ റൂട്ട് മാറ്റങ്ങളെക്കുറിച്ചും ഷെഡ്യൂളുകളെക്കുറിച്ചും തൽക്ഷണം വിവരങ്ങൾ ലഭിക്കും. മെഡിക്കൽ അടിയന്തരാവസ്ഥകളിലോ മറ്റ് സാങ്കേതിക പ്രശ്നങ്ങളിലോ ഭൂമിയിലുള്ള വിദഗ്ധരുമായി തത്സമയം വീഡിയോ കോളിലൂടെ ബന്ധപ്പെടാൻ പുതിയ സംവിധാനം സഹായിക്കും.
വിമാനം ലാൻഡ് ചെയ്യുന്നതിന് മുൻപ് തന്നെ സാങ്കേതിക പ്രശ്നങ്ങൾ വിശകലനം ചെയ്യാൻ എഞ്ചിനീയറിംഗ് ടീമിന് സാധിക്കുന്നത് വിമാനങ്ങളുടെ ടേൺഅറൗണ്ട് സമയം കുറയ്ക്കാനും കൃത്യനിഷ്ഠ പാലിക്കാനും എയർലൈനിനെ സഹായിക്കുന്നുണ്ട്. 2026ഓടെ മെന (MENA) മേഖലയിൽ ഈ സാങ്കേതികവിദ്യ പൂർണ്ണമായും നടപ്പിലാക്കുന്ന ആദ്യ എയർലൈനായി ഖത്തർ എയർവേയ്സ് മാറും.
