അജിത് പവാറിന്റെ മരണം: പേഴ്സണൽ സെക്രട്ടറിയെ സിഐഡി ചോദ്യം ചെയ്തു
മുംബൈ: അജിത് പവാറിന്റെ മരണത്തിൽ സുതാര്യത ഉറപ്പാക്കണമെന്ന രാഷ്ട്രീയ ആവശ്യങ്ങൾ ശക്തമാകുന്നതിനിടെ അദ്ദേഹത്തിന്റെ പേഴ്സണൽ സെക്രട്ടറിയെ സിഐഡി ചോദ്യം ചെയ്തു. കഴിഞ്ഞ മാസം നടന്ന ദാരുണമായ വിമാനാപകടത്തിൽ പവാർ കൊല്ലപ്പെട്ടതിനെത്തുടർന്ന് ഉയർന്ന രാഷ്ട്രീയ വിവാദങ്ങളുടെ പശ്ചാത്തലത്തിലാണ് സംസ്ഥാന ക്രിമിനൽ ഇൻവെസ്റ്റിഗേഷൻ ഡിപ്പാർട്ട്മെന്റ് (സിഐഡി) അന്വേഷണം വിപുലീകരിച്ചത്. പൂനെ യൂണിറ്റിലെ ഉദ്യോഗസ്ഥർ ബുധനാഴ്ച മന്ത്രാലയത്തിലെത്തി പവാറിന്റെ ദീർഘകാല സഹായിയായ അവിനാശ് സോൾവത്തിനെ നാല് മണിക്കൂറിലധികം ചോദ്യം ചെയ്തു.
പതിനഞ്ച് വർഷത്തിലേറെയായി അജിത് പവാറിന്റെ വിശ്വസ്ത സഹായിയായി പ്രവർത്തിക്കുന്ന സോൾവത്തിനോട് ജനുവരി 28ലെ യാത്രാ വിവരങ്ങളും വിമാനത്തിന്റെ സാങ്കേതികാവസ്ഥയെക്കുറിച്ചുള്ള വിവരങ്ങളും ഉദ്യോഗസ്ഥർ ആരാഞ്ഞു. അപകടത്തിന് തൊട്ടുമുമ്പുള്ള ദിവസങ്ങളിൽ പവാർ എന്തെങ്കിലും അസ്വാഭാവികത ശ്രദ്ധിച്ചിരുന്നോ എന്നും അന്വേഷണസംഘം പരിശോധിക്കുന്നുണ്ട്. മുംബൈയിൽ നിന്ന് ബാരാമതിയിലേക്ക് പോകുകയായിരുന്ന വിമാനം റൺവേയിൽ നിയന്ത്രണം നഷ്ടപ്പെട്ടാണ് തകർന്നു വീണത്. സംഭവത്തിൽ പവാർ ഉൾപ്പെടെ അഞ്ച് പേർ തൽക്ഷണം മരിച്ചിരുന്നു. തുടക്കത്തിൽ ഇതൊരു സാധാരണ അപകടമായി കണക്കാക്കിയെങ്കിലും രാഷ്ട്രീയ വൃത്തങ്ങളിൽ ദുരൂഹതയുണ്ടെന്ന ആരോപണം ശക്തമാണ്.
അപകടത്തിൽ ഉന്നതതല അന്വേഷണം വേണമെന്ന് ശിവസേന (യുബിടി) നേതാക്കളും അജിത് പവാർ പക്ഷത്തെ ചില നേതാക്കളും ആവശ്യപ്പെട്ടു. വിമാനത്താവളത്തിലെ സിസിടിവി ദൃശ്യങ്ങൾ ഉടൻ പുറത്തുവിടണമെന്ന് എൻസിപി എംഎൽഎ അമോൽ മിത്കാരി ആവശ്യപ്പെട്ടിട്ടുണ്ട്. വിമാനത്തിലുണ്ടായിരുന്ന യാത്രക്കാരുടെ എണ്ണത്തിലെ പൊരുത്തക്കേടുകളും സ്ഥലത്ത് കത്തിനശിച്ച രേഖകളുടെ അഭാവവും അദ്ദേഹം ചൂണ്ടിക്കാട്ടി. ആറ് പേർ യാത്രയിലുണ്ടെന്ന് റിപ്പോർട്ട് വന്നിട്ടും അഞ്ച് മൃതദേഹങ്ങൾ മാത്രം കണ്ടെത്തിയത് എന്തുകൊണ്ടാണെന്ന ഗൗരവകരമായ ചോദ്യവും മിത്കാരി ഉന്നയിച്ചു. സമാനമായ ആശങ്ക പ്രകടിപ്പിച്ച സഞ്ജയ് റാവത്ത്, പവാറിന്റെ മരണം സംശയാസ്പദമാണെന്നും സത്യം പുറത്തുവരണമെന്നും ആവശ്യപ്പെട്ടു.
അതേസമയം, പവാറിന്റെ സ്മരണാർത്ഥം സർക്കാരിന്റെ ‘മാഝി ലഡ്കി ബഹിൻ’ പദ്ധതിയുടെ പേര് മാറ്റുന്ന കാര്യം പരിഗണനയിലാണെന്ന് മുഖ്യമന്ത്രി ദേവേന്ദ്ര ഫഡ്നാവിസ് വ്യക്തമാക്കി. പവാറിന്റെ സേവനങ്ങളെ മുൻനിർത്തി അദ്ദേഹത്തിനുള്ള ഉചിതമായ ആദരമായിരിക്കും ഇതെന്നും അദ്ദേഹം കൂട്ടിച്ചേർത്തു. സുരക്ഷാ മുൻകരുതലിന്റെ ഭാഗമായി അജിത് പവാറിന്റെ കുടുംബാംഗങ്ങൾക്ക് ഇസഡ് പ്ലസ് സുരക്ഷ ഏർപ്പെടുത്തിക്കൊണ്ട് സർക്കാർ ഉത്തരവിറക്കിയിട്ടുണ്ട്.
