ശബരിമല സ്വർണക്കൊള്ള: തന്ത്രി കണ്ഠര് രാജീവർക്ക് ജാമ്യം

കൊല്ലം: ശബരിമല സ്വർണക്കൊള്ള കേസിൽ തന്ത്രി കണ്ഠര് രാജീവർക്ക് ജാമ്യം. അറസ്റ്റിലായി 41ാം ദിവസമാണ് കൊല്ലം വിജിലൻസ് കോടതി ജാമ്യം അനുവദിച്ചത്. കേസിൽ ഏറ്റവും വേഗത്തിൽ ജാമ്യം ലഭിക്കുന്ന ആദ്യ പ്രതിയാണ് തന്ത്രി.

ശ്രീകോവിലിന് മുന്നിലെ കട്ടിളപ്പാളി, ദ്വാരപാലക ശിൽപം എന്നിവയിൽ നിന്നും സ്വർണം അപഹരിച്ച കേസുകളിലാണ് കോടതി നടപടി. തന്ത്രി എന്ന നിലയിലുള്ള ഇടപെടലുകൾ മാത്രമാണ് ശബരിമലയിൽ നടത്തിയതെന്നും സ്വർണാപഹരണത്തിൽ തനിക്ക് പങ്കില്ലെന്നുമാണ് കണ്ഠര് രാജീവർ കോടതിയിൽ വാദിച്ചത്.

എന്നാൽ, സ്വർണക്കൊള്ളയിൽ തന്ത്രിക്ക് മുഖ്യപങ്കുണ്ടെന്നാണ് പ്രത്യേക അന്വേഷണ സംഘം കോടതിയിൽ സമർപ്പിച്ച റിപ്പോർട്ടിൽ വ്യക്തമാക്കുന്നത്. ഇതിന് തെളിവായി തന്ത്രിയുടെയും കുടുംബാംഗങ്ങളുടെയും പേരിലുള്ള ബാങ്ക് നിക്ഷേപ രേഖകളും അന്വേഷണസംഘം ഹാജരാക്കിയിരുന്നു. വാദപ്രതിവാദങ്ങൾക്കൊടുവിലാണ് ഇപ്പോൾ കോടതി ജാമ്യം അനുവദിച്ചിരിക്കുന്നത്.