ഒരു ബിജെപി എംപി ബാക്കിയുണ്ടായാല് മതി, ഒറ്റ പോപ്പുലര് ഫ്രണ്ടുകാരനെയും വെറുതെവിടില്ല-അമിത് ഷാ
പാട്ന: കോണ്ഗ്രസിന്റെ ഭരണകാലത്താണ് രാജ്യത്ത് പോപ്പുലര് ഫ്രണ്ട് രൂപംകൊണ്ടതെന്നും, അന്ന് ആരും അവരെ നിരോധിച്ചില്ലെന്നും കേന്ദ്ര ആഭ്യന്തരമന്ത്രി അമിത് ഷാ. പ്രധാനമന്ത്രി നരേന്ദ്ര മോദി ഒറ്റ രാത്രി കൊണ്ടാണ് പോപ്പുലര് ഫ്രണ്ട് നിരോധിച്ചത്. ഒരു ബിജെപി എംപി മാത്രമാണ് അവശേഷിക്കുന്നതെങ്കിലും ഒരൊറ്റ പോപ്പുലര് ഫ്രണ്ടുകാരനെയും വെറുതെവിടില്ലെന്നും അദ്ദേഹം വ്യക്തമാക്കി.
ബിഹാറിലെ ദര്ഭംഗയില് തെരഞ്ഞെടുപ്പ് റാലിയില് സംസാരിക്കുകയായിരുന്നു അമിത് ഷാ. ”പോപ്പുലര് ഫ്രണ്ടിനെ നിരോധിക്കാനുള്ള ചങ്കുറപ്പ് കോണ്ഗ്രസിനുണ്ടായിരുന്നില്ല. എന്നാല്, മോദി സര്ക്കാര് നിരോധിക്കുക മാത്രമല്ല, നൂറിലധികം സ്ഥലങ്ങളില് റെയ്ഡ് നടത്തുകയും ചെയ്തു. മുഴുവന് പോപ്പുലര് ഫ്രണ്ടുകാരെയും ജയിലിലടച്ചു.”-ഒറ്റ ബിജെപി എംപി എങ്കിലും ഉള്ളിടത്തോളം, ഒരു പോപ്പുലര് ഫ്രണ്ട് അംഗത്തെയും ജയിലില്നിന്ന് പുറത്തിറക്കില്ലെന്നും വെറുതെ വിടില്ലെന്നും അമിത് ഷാ പറഞ്ഞു.
