റിപ്പോര്ട്ടര് ടിവിക്കെതിരെ 100 കോടി രൂപയുടെ മാനനഷ്ടക്കേസ് നല്കി രാജീവ് ചന്ദ്രശേഖര്
തിരുവനന്തപുരം: റിപ്പോര്ട്ടര് ടിവിക്കെതിരെ മാനനഷ്ടക്കേസ് നല്കി ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്. ബിപിഎല് ഭൂമിയിടപാടുമായി ബന്ധപ്പെട്ട് വ്യാജവാര്ത്ത നല്കി എന്ന് ആരോപിച്ചാണു നടപടി. റിപ്പോര്ട്ടര് ഉടമ ആന്റോ അഗസ്റ്റിന്, കണ്സല്ട്ടിങ് എഡിറ്റര് അരുണ് കുമാര്, കോര്ഡിനേറ്റിങ് എഡിറ്റര് സ്മൃതി പരുത്തിക്കാട്, ന്യൂസ് കോര്ഡിനേറ്റര് ജിമ്മി ജയിംസ്, തിരുവനന്തപുരം ബ്യൂറോ ചീഫ് ടി.വി പ്രസാദ് എന്നിവരടക്കം ഒമ്പത് പേര്ക്കെതിരെയാണ് കേസ്.
100 കോടി രൂപ മാനനഷ്ടമായി നല്കണമെന്നാണ് ആവശ്യപ്പെട്ടിരിക്കുന്നത്. രാജീവ് ചന്ദ്രശേഖറിന് ബന്ധമില്ലാത്ത ബിപിഎല് കമ്പനിയുടെ ഭൂമിയിടപാടില്, തന്റെ പേര് ദുരുപയോഗം ചെയ്ത് തുടര്ച്ചയായി വ്യാജവാര്ത്തകള് സംപ്രേക്ഷണം ചെയ്യുന്നുവെന്നാണ് കേസില് ആരോപിക്കുന്നത്. മുംബൈ ആസ്ഥാനമായ ആര്എച്ച്പി പാര്ട്ട്ണേഴ്സ് എന്ന നിയമസ്ഥാപനം മുഖേനയാണ് നോട്ടീസ് നല്കിയത്. ഏഴ് ദിവസത്തിനുള്ളില് വ്യാജവാര്ത്ത പിന്വലിച്ച് മാപ്പുപറയണമെന്നും ആവശ്യപ്പെട്ടിട്ടുണ്ട്.
