ഷാർജയിലും ബൈക്കുകൾക്ക് സ്പീഡ് ലൈനുകളിൽ വിലക്ക്; നവംബർ 1 മുതൽ പ്രാബല്യത്തില്
ഷാർജ: ദുബായ്ക്ക് പിന്നാലെ ഷാർജയിലും മോട്ടോർസൈക്കിളുകൾക്ക് (ബൈക്കുകൾ) അതിവേഗ പാതകളിൽ (സ്പീഡ് ലൈനുകൾ) വിലക്ക് ഏർപ്പെടുത്തി. നവംബർ 1 മുതൽ ഈ പുതിയ നിയമം പ്രാബല്യത്തിൽ വരും.
ഷാർജ പോലീസ് റോഡ് ട്രാൻസ്പോർട്ട് അതോറിറ്റിയുമായി (RTA) ചേർന്നാണ് ഈ നിയമം നടപ്പാക്കുന്നത്.
പ്രധാന നിയമങ്ങൾ:
- വിലക്ക്: ഡെലിവറി ബൈക്കുകൾ ഉൾപ്പെടെയുള്ള ഇരുചക്ര വാഹനങ്ങൾ സ്പീഡ് ലൈനുകളിൽ പ്രവേശിക്കാൻ പാടില്ല.
- നാല് ലൈൻ റോഡുകൾ: മോട്ടോർബൈക്കുകൾക്ക് വലതുവശത്തെ മൂന്നാമത്തെയും നാലാമത്തെയും ലൈനുകളിലൂടെ മാത്രമേ സഞ്ചരിക്കാൻ അനുവാദമുള്ളൂ.
- മൂന്ന് ലൈൻ റോഡുകൾ: നടുവിലെ പാതയിലൂടെയും വലതുവശത്തെ ലൈനിലൂടെയും ബൈക്കുകൾക്ക് ഓടിക്കാം.
- രണ്ട് ലൈൻ റോഡുകൾ: വലതുവശത്തെ ലൈനിൽ മാത്രമേ ബൈക്കുകൾക്ക് സഞ്ചരിക്കാൻ അനുവാദമുള്ളൂ.
- ഭാരവാഹനങ്ങൾ: ബസുകൾ ഉൾപ്പെടെയുള്ള ഭാരവാഹനങ്ങൾ റോഡിന്റെ ഏറ്റവും വലതുവശത്തെ ലൈനിൽ മാത്രമേ സഞ്ചരിക്കാൻ പാടുള്ളൂ.
പിഴകൾ:
- ലൈൻ നിയമങ്ങൾ കൃത്യമായി പാലിക്കുന്നുണ്ടോ എന്ന് ഉറപ്പാക്കാൻ റഡാർ നിരീക്ഷണം കർശനമാക്കും.
- നിയമം ലംഘിക്കുന്ന ഹെവി വാഹനങ്ങൾക്ക് 1500 ദിർഹം പിഴയും 12 ബ്ലാക്ക് പോയിന്റുകളും ലഭിക്കും.
- ലൈൻ നിയമം പാലിക്കാത്ത ഡ്രൈവർമാർക്ക് 500 ദിർഹം പിഴയാണ് ചുമത്തുക.
