വിവരാവകാശ കമ്മീഷണർ നിയമനത്തില് കടുപ്പിച്ച് രാഹുൽ ഗാന്ധി; പ്രധാനമന്ത്രിയുടെ വസതിയില് ചേര്ന്ന യോഗം ഒന്നര മണിക്കൂര് നീണ്ടു
ന്യൂഡൽഹി: കേന്ദ്ര മുഖ്യ വിവരാവകാശ കമ്മീഷണറെയും (CIC) മറ്റ് വിവരാവകാശ കമ്മീഷണർമാരെയും തിരഞ്ഞെടുക്കുന്നതിനായി പ്രധാനമന്ത്രി നരേന്ദ്ര മോദിയുടെ വസതിയിൽ ചേർന്ന ഉന്നതാധികാര സമിതി യോഗത്തിൽ ശക്തമായ വിയോജിപ്പുമായി പ്രതിപക്ഷ നേതാവ് രാഹുൽ ഗാന്ധി. ഷോർട്ട്ലിസ്റ്റ് ചെയ്യപ്പെട്ട പട്ടികയിൽ ദലിത്, ആദിവാസി, ഒബിസി, ന്യൂനപക്ഷ വിഭാഗങ്ങളിൽ നിന്നുള്ളവർക്ക് മതിയായ പ്രാതിനിധ്യം നൽകിയില്ലെന്ന് ചൂണ്ടിക്കാട്ടിയാണ് രാഹുൽ ഗാന്ധി വിയോജിപ്പ് രേഖപ്പെടുത്തിയത്.
പ്രധാനമന്ത്രിയെക്കൂടാതെ ആഭ്യന്തര മന്ത്രി അമിത് ഷാ, ലോക്സഭാ പ്രതിപക്ഷ നേതാവ് രാഹുൽ ഗാന്ധി എന്നിവരാണ് സമിതിയിലെ അംഗങ്ങൾ. ഏകദേശം 88 മിനിറ്റോളം നീണ്ടുനിന്ന യോഗത്തിൽ കമ്മീഷണർ സ്ഥാനങ്ങളിലേക്കുള്ള നിയമനങ്ങളെ രാഹുൽ ഗാന്ധി എതിർത്തതായാണ് വിവരം.
രാഹുൽ ഗാന്ധിയുടെ പ്രധാന വിമർശനങ്ങൾ: രാജ്യത്തെ ജനസംഖ്യയുടെ 90 ശതമാനത്തോളം വരുന്ന ദലിത്, ആദിവാസി, ഒബിസി, ന്യൂനപക്ഷ വിഭാഗങ്ങളിൽ നിന്നുള്ളവർ അന്തിമ പട്ടികയിൽ പൂർണമായും അപ്രത്യക്ഷമായിരിക്കുന്നുവെന്ന് രാഹുൽ ഗാന്ധി വിമര്ശിച്ചതായാണു വിവരം. ഈ തസ്തികകളിലേക്കുള്ള അപേക്ഷകരിൽ ഏഴ് ശതമാനത്തിൽ താഴെ മാത്രമാണ് ബഹുജൻ വിഭാഗങ്ങളിൽ നിന്നുള്ളവരെന്നും, പാർശ്വവൽക്കരിക്കപ്പെട്ട വിഭാഗങ്ങൾക്ക് സുതാര്യത ഉറപ്പാക്കുന്ന ഇത്തരം സ്ഥാപനങ്ങളിലേക്ക് കടന്നുവരാൻ ഘടനാപരമായ തടസ്സങ്ങളുണ്ടെന്നും അദ്ദേഹം ചൂണ്ടിക്കാട്ടി. ജാതി തിരിച്ചുള്ള അപേക്ഷകരുടെ കണക്കുകൾ രാഹുൽ ഗാന്ധി യോഗത്തിൽ ആവശ്യപ്പെട്ടതായും റിപ്പോർട്ടുകളുണ്ട്.
നിലവിലെ സാഹചര്യം: സെപ്റ്റംബർ 13-ന് ഹീരാലാൽ സമരിയ (Hiralal Samariya) വിരമിച്ചതിനെത്തുടർന്ന് മുഖ്യ വിവരാവകാശ കമ്മീഷണറുടെ പദവി ഒഴിഞ്ഞുകിടക്കുകയാണ്. നിലവിൽ ആനന്ദി രാമലിംഗം, വിനോദ് കുമാർ തിവാരി എന്നീ രണ്ട് കമ്മീഷണർമാർ മാത്രമാണ് കമ്മീഷനിലുള്ളത്. വെബ്സൈറ്റിലെ കണക്കുകൾ പ്രകാരം 30,838 കേസുകൾ തീർപ്പാക്കാതെ കെട്ടിക്കിടക്കുന്നുണ്ട്.
ആർടിഐ നിയമത്തിലെ സെക്ഷൻ 12(3) പ്രകാരം പ്രധാനമന്ത്രി അധ്യക്ഷനായ സമിതിയാണ് നിയമനങ്ങൾ നടത്തേണ്ടത്. സമിതി അംഗീകരിച്ച പേരുകൾ ഉടൻ തന്നെ ഔദ്യോഗികമായി പ്രഖ്യാപിക്കുമെന്നാണ് കരുതുന്നത്. രാഹുൽ ഗാന്ധിയുടെ വിയോജിപ്പ് രേഖാമൂലം സമിതിക്ക് കൈമാറിയിട്ടുണ്ട്.
