“ഇംഗ്ലീഷിൽ എഴുതുന്ന ഹിന്ദി പേരുകൾ വായിക്കാൻ പ്രയാസം” കേന്ദ്ര സർക്കാരിൻ്റെ ഹിന്ദിവൽക്കരണത്തിനെതിരെ പി. ചിദംബരം
ന്യൂഡല്ഹി: പാർലമെന്റിൽ അവതരിപ്പിക്കുന്ന ബില്ലുകൾക്ക് ഇംഗ്ലീഷ് ലിപിയിൽ ഹിന്ദി പേരുകൾ നൽകുന്ന കേന്ദ്രസർക്കാർ നടപടിക്കെതിരെ രൂക്ഷവിമർശനവുമായി മുതിർന്ന കോൺഗ്രസ് നേതാവ് പി. ചിദംബരം രംഗത്തെത്തി. ബില്ലുകളുടെ ഇംഗ്ലീഷ് പതിപ്പുകൾക്ക് ഇംഗ്ലീഷിലും ഹിന്ദി പതിപ്പുകൾക്ക് ഹിന്ദിയിലും പേര് നൽകുന്ന 75 വർഷത്തെ കീഴ്വഴക്കം ലംഘിക്കപ്പെടുകയാണെന്നും, ഇത് ഭരണഘടനാപരമായ വാഗ്ദാനങ്ങളുടെ ലംഘനമാണെന്നും അദ്ദേഹം ചൂണ്ടിക്കാട്ടി.
സഹ ഔദ്യോഗിക ഭാഷയെന്ന നിലയിലുള്ള ഇംഗ്ലീഷിന്റെ പദവി അപകടത്തിലാണെന്നും, ഈ നീക്കം ഹിന്ദി ഇതര സംസ്ഥാനങ്ങളിലെ ജനങ്ങളെ അപമാനിക്കുന്നതിന് തുല്യമാണെന്നും അദ്ദേഹം എക്സ് പ്ലാറ്റ്ഫോമിൽ കുറിച്ചു.
തൊഴിലുറപ്പ് പദ്ധതിക്ക് (MGNREGA) പകരമായി കൊണ്ടുവരുന്ന ‘വികസിത് ഭാരത് ഗ്യാരണ്ടി ഫോർ റോസ്ഗാർ ഔർ ആജീവിക മിഷൻ (ഗ്രാമീൺ) – വി.ബി.ഐ.ജി റാംജി’ ബിൽ തുടങ്ങിയ ഹിന്ദി-ഇംഗ്ലീഷ് സങ്കര പേരുകൾ ഉദാഹരണമായി ചൂണ്ടിക്കാട്ടിയാണ് വിമർശനം. ഹിന്ദി സംസാരിക്കാത്ത ജനവിഭാഗങ്ങൾക്ക് ഇത്തരം പേരുകൾ ഉച്ചരിക്കാനോ തിരിച്ചറിയാനോ കഴിയില്ലെന്ന് ചിദംബരം വാദിച്ചു.
ക്രിമിനൽ നിയമങ്ങൾക്ക് ഭാരതീയ ന്യായ് സംഹിത ഉൾപ്പെടെയുള്ള പേരുകൾ നൽകിയതിനെതിരെ നേരത്തെയും അദ്ദേഹം വിയോജനക്കുറിപ്പ് രേഖപ്പെടുത്തിയിരുന്നു.
ശീതകാല സമ്മേളനത്തിൽ പ്രതിപക്ഷം ഈ വിഷയം ശക്തമായി ഉന്നയിക്കുന്നുണ്ട്.
ബില്ലുകളുടെ പേരുകൾ പൂർണ്ണമായി ഇംഗ്ലീഷിലോ ഹിന്ദിയിലോ അല്ലാത്ത ഈ രീതിയെ കാർത്തി ചിദംബരവും ഡി.എം.കെ എം.പി തമിഴച്ചി തങ്കപാണ്ഡ്യനും ലോക്സഭയിൽ പരിഹസിച്ചിരുന്നു. ഇത് ഹിന്ദി അടിച്ചേൽപ്പിക്കാനുള്ള സൂക്ഷ്മമായ നീക്കമാണെന്നാണ് പ്രതിപക്ഷത്തിന്റെ ആരോപണം. നിഷ്പക്ഷമായിരിക്കേണ്ട നിയമപരമായ ശീർഷകങ്ങളിൽ ഭാഷാപരമായ രാഷ്ട്രീയം കലർത്തുകയാണെന്ന് ഡി.എം.കെയും കുറ്റപ്പെടുത്തി.
ചിദംബരത്തിന്റെ പ്രസ്താവന സമൂഹമാധ്യമങ്ങളിൽ വലിയ ചർച്ചകൾക്കാണ് വഴിവെച്ചിരിക്കുന്നത്. ദക്ഷിണേന്ത്യൻ സംസ്ഥാനങ്ങളിൽ നിന്ന് ഈ നിലപാടിന് വലിയ പിന്തുണ ലഭിക്കുമ്പോൾ, യു.പി.എ സർക്കാരിന്റെ കാലത്തെ ‘ഗ്രാമീണ ന്യായാലയ ആക്ട്’ പോലുള്ള ഉദാഹരണങ്ങൾ ചൂണ്ടിക്കാട്ടി ബി.ജെ.പി അനുകൂലികൾ ഇതിനെ പ്രതിരോധിക്കുന്നു.
ഇംഗ്ലീഷ് സഹ ഔദ്യോഗിക ഭാഷയായി തുടരുമെന്ന വാഗ്ദാനം ലംഘിക്കപ്പെടുകയാണെന്ന ചിദംബരത്തിന്റെ മുന്നറിയിപ്പ്, വരാനിരിക്കുന്ന നിയമസഭാ തിരഞ്ഞെടുപ്പുകളിലും ഭാഷാപരമായ രാഷ്ട്രീയ ചർച്ചകൾക്ക് വഴിമരുന്നിട്ടേക്കും.
