പാക്കറ്റ് പാല്തിളപ്പിക്കാറുണ്ടോ നിങ്ങള്? ഇക്കാര്യം ശ്രദ്ധിക്കുക!
ഇന്ത്യൻ അടുക്കളകളിൽ പതിറ്റാണ്ടുകളായി പിന്തുടരുന്ന ഒരു ശീലമാണ് പാക്കറ്റ് പാൽ വീട്ടിലെത്തിയാൽ ഉടൻ തിളപ്പിക്കുന്നത്. എന്നാൽ, ഈ രീതി അനാവശ്യമാണെന്നും പാലിന്റെ പോഷകഗുണങ്ങൾ കുറയാൻ സാധ്യതയുണ്ടെന്നും അഭിപ്രായപ്പെട്ട് ഓര്ത്തോപീഡിക്, സ്പോര്ട്സ് മെഡിസിന് വിദഗ്ധനായ ഡോ. മനന് വോറ രംഗത്തെത്തിയതോടെ ദേശീയതലത്തിൽ ഇത് വലിയ ചർച്ചയായി.
വിപണിയിൽ ലഭ്യമാകുന്ന പാക്കറ്റ് പാൽ, ദോഷകരമായ ബാക്ടീരിയകളെ പൂർണ്ണമായും നശിപ്പിക്കുന്നതിനായി ഉയർന്ന താപനിലയിൽ പാസ്ചറൈസ് ചെയ്താണ് എത്തുന്നത്. അതുകൊണ്ടുതന്നെ സുരക്ഷിതത്വത്തിനായി വീണ്ടും തിളപ്പിക്കേണ്ട ആവശ്യമില്ലെന്നാണ് ഡോ. വോറയുടെ പ്രധാന വാദം. കാൽസ്യം, വിറ്റാമിൻ ഡി, സമ്പൂർണ്ണ പ്രോട്ടീൻ എന്നിവയുടെ കലവറയായ പാൽ വീണ്ടും ചൂടാക്കുമ്പോൾ പ്രധാനപ്പെട്ട പോഷകഘടകങ്ങൾ നഷ്ടപ്പെടാം.
വിറ്റാമിൻ ബി12, ഫോളേറ്റ്, വേ പ്രോട്ടീനുകൾ തുടങ്ങിയ പോഷകങ്ങൾ ഇത്തരത്തിൽ നശിച്ചുപോകാൻ സാധ്യതയുണ്ടെന്നും അദ്ദേഹം ചൂണ്ടിക്കാട്ടുന്നു. വീണ്ടും തിളപ്പിക്കുന്നത് ശാസ്ത്രീയമായി അനാവശ്യമാണെങ്കിലും, ഈ ശീലം ഉപേക്ഷിക്കാൻ ഭൂരിഭാഗം ഇന്ത്യക്കാരും തയ്യാറല്ല. പാലിന്റെ ഗുണനിലവാരത്തെക്കുറിച്ചുള്ള ആശങ്കകളും, വിതരണ ശൃംഖലയിലെ പ്രശ്നങ്ങളും, പാൽപ്പാട ശേഖരിക്കുന്നതിനുള്ള പരമ്പരാഗത രീതികളുമാണ് ഇതിന് പ്രധാന കാരണം. പാസ്ചറൈസേഷൻ നിലവാരമുണ്ടെങ്കിലും ഉൽപ്പന്നത്തിന്റെ കാലഹരണപ്പെട്ട തീയതിയെക്കുറിച്ചുള്ള അറിവില്ലായ്മയും ആളുകളിൽ വിശ്വാസമില്ലായ്മ ഉണ്ടാക്കുന്നു.
പാക്കറ്റ് കേടുകൂടാതെ, തണുപ്പുള്ള അവസ്ഥയിലാണെങ്കിൽ അമിതമായി തിളപ്പിക്കുന്നത് ഒഴിവാക്കണം. സുരക്ഷിതമായ ബ്രാൻഡുകളെ വിശ്വസിക്കാനും പാക്കറ്റിലെ ലേബലുകൾ മനസ്സിലാക്കാനും ഡോ. വോറ പൊതുജനങ്ങളെ ഉപദേശിക്കുന്നു.
