വെറും വയറ്റിൽ ഒരു നെല്ലിക്കകഴിച്ചു നോക്കൂ…അറിയാം അമ്പരപ്പിക്കുന്ന 3 ഗുണങ്ങൾ

ദഹനപ്രശ്നങ്ങളും അകാരണമായ ക്ഷീണവും ഇടയ്ക്കിടെയുള്ള ജലദോഷവും നിങ്ങളെ ബുദ്ധിമുട്ടിക്കുന്നുണ്ടെങ്കിൽ, അതിനുള്ള പരിഹാരം നിങ്ങളുടെ അടുക്കളയിൽ തന്നെയുണ്ട്. ദിവസവും രാവിലെ വെറും വയറ്റിൽ നെല്ലിക്ക കഴിക്കുന്നത് ആരോഗ്യത്തിൽ അത്ഭുതകരമായ മാറ്റങ്ങൾ കൊണ്ടുവരുമെന്ന് ഫങ്ഷണൽ മെഡിസിൻ ന്യൂട്രീഷ്യനിസ്റ്റായ കരിഷ്മ ചൗള പറയുന്നു.

നെല്ലിക്ക വെറും വയറ്റിൽ കഴിക്കുന്നത് കൊണ്ടുള്ള മൂന്ന് പ്രധാന ഗുണങ്ങൾ ഇവയാണ്:

പ്രതിരോധശേഷിയുടെ പവർഹൗസ്: വൈറ്റമിൻ സി-യുടെ ഏറ്റവും മികച്ച പ്രകൃതിദത്ത ഉറവിടമാണ് നെല്ലിക്ക. വെറും വയറ്റിൽ കഴിക്കുമ്പോൾ ശരീരം വൈറ്റമിൻ സി വേഗത്തിൽ ആഗിരണം ചെയ്യുകയും, ഇത് പ്രതിരോധ കോശങ്ങളെ ശക്തിപ്പെടുത്തി അണുബാധകളെ തടയുകയും ചെയ്യുന്നു.

വീക്കം (Inflammation) കുറയ്ക്കുന്നു: ശരീരത്തിലുണ്ടാകുന്ന വിട്ടുമാറാത്ത വീക്കം പ്രതിരോധശേഷിയെ തകർക്കും. നെല്ലിക്കയിലെ ആന്റി-ഓക്സിഡന്റുകളും മറ്റ് സംയുക്തങ്ങളും ഇത്തരം വീക്കം കുറയ്ക്കാൻ സഹായിക്കുന്നു.

ദഹനം മെച്ചപ്പെടുത്തുന്നു: ദഹനത്തിന് സഹായിക്കുന്ന ഗ്യാസ്ട്രിക് ജ്യൂസുകളുടെ ഉത്പാദനം വർദ്ധിപ്പിക്കാൻ നെല്ലിക്കയ്ക്ക് കഴിയും. ഇത് പോഷകങ്ങൾ ശരീരം വലിച്ചെടുക്കുന്നത് എളുപ്പമാക്കുകയും മലബന്ധം പോലുള്ള പ്രശ്നങ്ങൾ പരിഹരിക്കുകയും ചെയ്യുന്നു.

ആരെല്ലാം സൂക്ഷിക്കണം? എല്ലാവർക്കും നെല്ലിക്ക ഒരുപോലെ ഗുണം ചെയ്യണമെന്നില്ല. താഴെ പറയുന്നവർ നെല്ലിക്ക കഴിക്കുമ്പോൾ ജാഗ്രത പാലിക്കുകയോ വിദഗ്‌ധോപദേശം തേടുകയോ ചെയ്യണം:

അസിഡിറ്റി, അൾസർ, ഗ്യാസ് സംബന്ധമായ (Reflux) പ്രശ്നങ്ങൾ ഉള്ളവർ.

രക്തസമ്മർദ്ദം കുറഞ്ഞവർ (Low BP).

പ്രമേഹത്തിന് മരുന്ന് കഴിക്കുന്നവർ (ഷുഗർ ലെവൽ പെട്ടെന്ന് കുറയാൻ സാധ്യതയുണ്ട്).

നിർജ്ജലീകരണം (Dehydration) വരാൻ സാധ്യതയുള്ളവർ.

നെല്ലിക്ക ജ്യൂസായോ, പച്ചയ്ക്കോ അല്ലെങ്കിൽ സ്മൂത്തികളിൽ ചേർത്തോ കഴിക്കാവുന്നതാണ്.