പ്രവാസികൾക്ക് ആശ്വാസം; ‘എക്സ്പാറ്റ് ലെവി’ പൂർണമായും നിര്ത്തലാക്കി സൗദി അറേബ്യ
റിയാദ്: സൗദി അറേബ്യയിലെ വ്യാവസായിക മേഖലയ്ക്ക് കരുത്തുപകരുന്ന പുതിയ നിര്ണ്ണായക തീരുമാനവുമായി ഭരണകൂടം. പ്രവാസി തൊഴിലാളികളുടെ മേലുള്ള ലേവി (Expat Fee) സർക്കാർ പൂർണ്ണമായും നിർത്തലാക്കി. കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാന്റെ അധ്യക്ഷതയിൽ ചേർന്ന മന്ത്രിസഭാ യോഗത്തിലാണ് ഈ നിർണ്ണായക തീരുമാനമുണ്ടായത്. വ്യാവസായിക ലൈസൻസുള്ള സ്ഥാപനങ്ങളിലെ തൊഴിലാളികൾക്കാണ് ഈ ഇളവ് ലഭിക്കുക.
സൗദി വിഷൻ 2030-ന്റെ ഭാഗമായി രാജ്യത്തെ എണ്ണ ഇതര വരുമാനം വർദ്ധിപ്പിക്കാനാണ് സർക്കാർ ലക്ഷ്യമിടുന്നത്. ഈ പുതിയ നീക്കം വ്യാവസായിക മേഖലയിലെ പ്രവർത്തനച്ചെലവ് കുറയ്ക്കുമെന്നും ആഗോള വിപണിയിൽ സൗദി ഉൽപ്പന്നങ്ങളുടെ മത്സരശേഷി വർദ്ധിപ്പിക്കുമെന്നും വ്യവസായ-ധാതു വിഭവ മന്ത്രി ബന്ദർ അൽഖൊറൈഫ് പറഞ്ഞു.
പ്രധാന മാറ്റങ്ങൾ ഒറ്റനോട്ടത്തിൽ:
നിക്ഷേപ സൗഹൃദം: ഫാക്ടറികളുടെ പ്രവർത്തനച്ചെലവ് കുറയുന്നതോടെ കൂടുതൽ വിദേശ നിക്ഷേപങ്ങൾ രാജ്യത്തേക്ക് എത്തും.
തൊഴിൽ വിപണിയിലെ വളർച്ച: കഴിഞ്ഞ ആറ് വർഷത്തിനിടെ വ്യാവസായിക മേഖലയിലെ തൊഴിലാളികളുടെ എണ്ണം 74 ശതമാനം വർദ്ധിച്ച് 8.47 ലക്ഷത്തിലെത്തിയിട്ടുണ്ട്. പുതിയ തീരുമാനം ഇത് ഇനിയും ഉയർത്തും.
സാങ്കേതിക മുന്നേറ്റം: ആർട്ടിഫിഷ്യൽ ഇന്റലിജൻസ്, ഓട്ടോമേഷൻ തുടങ്ങിയ ആധുനിക സാങ്കേതികവിദ്യകൾ ഫാക്ടറികളിൽ നടപ്പിലാക്കാൻ ഈ സാമ്പത്തിക ഇളവ് ഉടമകൾക്ക് സഹായകമാകും.
2019-ൽ 8,822 ആയിരുന്ന ഫാക്ടറികളുടെ എണ്ണം നിലവിൽ 12,000 കടന്നിരിക്കുകയാണ്. പുതിയ ഇളവുകളിലൂടെ 2035-ഓടെ വ്യാവസായിക ജിഡിപി (Industrial GDP) 895 ബില്യൺ റിയാലായി ഉയർത്താനാണ് സൗദി അറേബ്യ ലക്ഷ്യമിടുന്നത്.
