ശബരിമല സ്വര്ണക്കൊള്ളയില് വഴിത്തിരിവ്; സ്മാര്ട്ട് ക്രിയേഷന്സ് സിഇഒ പങ്കജ് ഭണ്ഡാരിയും ഗോവര്ധനും അറസ്റ്റില്
തിരുവനന്തപുരം: ശബരിമലയിലെ സ്വര്ണക്കൊള്ള കേസില് നിര്ണായക വഴിത്തിരിവ്. സംഭവവുമായി ബന്ധപ്പെട്ട് സ്മാര്ട്ട് ക്രിയേഷന്സ് സിഇഒ പങ്കജ് ഭണ്ഡാരി, തട്ടിയെടുത്ത സ്വര്ണംവാങ്ങിയ ബെല്ലാരി സ്വദേശിയായ ജ്വല്ലറി ഉടമ ഗോവര്ധന് എന്നിവരെ പോലീസ് അറസ്റ്റ് ചെയ്തു.
ശബരിമലയിലെ സ്വര്ണപ്പാളികള് പൊതിയുന്നതിനായി കരാര് ഏറ്റെടുത്തത് ചെന്നൈ ആസ്ഥാനമായുള്ള സ്മാര്ട്ട് ക്രിയേഷന്സ് കമ്പനിയാണ്. ദ്വാരപാലക ശില്പത്തില്നിന്ന് സ്വര്ണം വേര്തിരിച്ചത് ഭണ്ഡാരിയുടെ കമ്പനിയാണ്. ശില്പങ്ങളില്നിന്ന് വേര്തിരിച്ച സ്വര്ണം വാങ്ങിയത് ഗോവര്ധനനുമായിരുന്നു. ഉണ്ണികൃഷ്ണന് പോറ്റിയും ഭണ്ഡാരിയും തമ്മില് അടുത്ത ബന്ധമാണെന്നാണ് വിവരം. കേസില് ഇവര്ക്കുള്ള പങ്കിനെക്കുറിച്ച് നിര്ണായക വിവരങ്ങള് അന്വേഷണ സംഘത്തിന് ലഭിച്ചതായാണ് സൂചന.
ശബരിമലയില് നിന്നും കടത്തിക്കൊണ്ടുപോയ സ്വര്ണപ്പാളികള് സ്മാര്ട്ട് ക്രിയേഷന്സിലേക്കാണ് കൊണ്ടുപോയത്. അവിടെ വെച്ചാണ് സ്വര്ണം വേര്തിരിച്ചെടുക്കുന്നത്. വേര്തിരിച്ച സ്വര്ണം കല്പേഷ് എന്ന ഇടനിലക്കാരന് വഴി ഗോവര്ധനു നല്കിയെന്നാണ് എസ്ഐടി കണ്ടെത്തിയിട്ടുള്ളത്.
ബെല്ലാരിയില് നടന്ന തെളിവെടുപ്പില് ഗോവര്ധന്റെ ജ്വല്ലറിയില്നിന്ന് 800 ഗ്രാമിലധികം സ്വര്ണം അന്വേഷണ സംഘം കണ്ടെത്തിയിരുന്നു. ഗോവര്ധനുമായി അടുത്ത പോറ്റിയാണ് പരിചയപ്പെടുത്തിയതെന്നും തന്ത്രി അന്വേഷണ സംഘത്തിനു മൊഴി നല്കിയിരുന്നു. ജ്വല്ലറിയില് പോയിട്ടുണ്ടെന്നും അദ്ദേഹം വെളിപ്പെടുത്തിയിരുന്നു.
