അമേരിക്കയ്ക്ക് മുന്നറിയിപ്പുമായി ഇറാന്; യുദ്ധഭീതിക്കിടെ ചൈനയ്ക്കും റഷ്യയ്ക്കുമൊപ്പം സംയുക്ത പടയൊരുക്കം
ജൊഹാനസ്ബര്ഗ്: അമേരിക്കയുടെ ഭീഷണികള്ക്കിടെ ബ്രിക്സ് രാജ്യങ്ങളുമായി വമ്പന് പടയൊരുക്കവുമായി ഇറാന്. ചൈനയുമായും റഷ്യയുമായും ദക്ഷിണാഫ്രിക്കയുമായി ചേര്ന്ന് സംയുക്ത നാവികാഭ്യാസം ആരംഭിച്ചു. ‘വില് ഫോര് പീസ് 2026’ എന്ന് പേരിട്ടിരിക്കുന്ന ഒരാഴ്ച നീണ്ടുനില്ക്കുന്ന അഭ്യാസം ശനിയാഴ്ച ദക്ഷിണാഫ്രിക്കന് തീരത്താണ് തുടങ്ങിയത്.
ബ്രിക്സ് പ്ലസ് കൂട്ടായ്മയുടെ ഭാഗമായാണ് ഈ അഭ്യാസം സംഘടിപ്പിച്ചിരിക്കുന്നത്. സമുദ്രസുരക്ഷ ഉറപ്പാക്കുക, കടല്ക്കൊള്ള തടയുക, സമുദ്രവ്യാപാര പാതകളുടെ സുരക്ഷ വര്ധിപ്പിക്കുക എന്നിവയാണ് അഭ്യാസത്തിന്റെ ഔദ്യോഗിക ലക്ഷ്യങ്ങളായി ദക്ഷിണാഫ്രിക്കന് സൈന്യം വ്യക്തമാക്കുന്നത്. ചൈനയാണ് അഭ്യാസപ്രകടനത്തിന് നേതൃത്വം നല്കുന്നത്.
സൈമണ്സ് ടൗണിലെ നാവിക താവളത്തിന് സമീപം നടക്കുന്ന അഭ്യാസത്തില് ചൈനയുടെ ഗൈഡഡ് മിസൈല് ഡിസ്ട്രോയറായ ‘ടാങ്ഷാന്’, റഷ്യയുടെ ‘സ്റ്റോയിക്കി’ കോര്വെറ്റ്, ഇറാന്റെ യുദ്ധക്കപ്പലുകള് എന്നിവ പങ്കെടുക്കുന്നുണ്ട്. ബ്രസീല്, ഈജിപ്ത്, എത്യോപ്യ, ഇന്തോനേഷ്യ തുടങ്ങിയ രാജ്യങ്ങള് നിരീക്ഷകരായി പങ്കെടുക്കുന്നു.
അമേരിക്കയുമായി ബ്രിക്സ് രാജ്യങ്ങള്ക്കുള്ള അഭിപ്രായവ്യത്യാസങ്ങള് രൂക്ഷമായിരിക്കുന്ന സാഹചര്യത്തില് നടക്കുന്ന നാവിക അഭ്യാസം ശക്തിപ്രകടനമായാണ് വിലയിരുത്തപ്പെടുന്നത്. അതിലേറെ, ഇറാനെതിരെ യുഎസ് നടത്തുന്ന യുദ്ധസമാനമായ നീക്കങ്ങള്ക്കിടെ നാവികാഭ്യാസത്തിന് രാഷ്ട്രീയ പ്രാധാന്യമേറെയാണ്.
