ഇനി ബുര്ജ് ഖലീഫയും മാറിനില്ക്കും; 1 കിലോമീറ്റര് ഉയരത്തില് വരുന്നു, സൗദിയുടെ ജിദ്ദ ടവര്! നിര്മാണം പുരോഗമിക്കുന്നു
ജിദ്ദ: ലോകത്തിലെ ഏറ്റവും ഉയരം കൂടിയ കെട്ടിടം എന്ന റെക്കോര്ഡ് ഇനി സൗദി അറേബ്യ സ്വന്തമാകാന് പോകുന്നു. ദുബൈയിലെ ബുര്ജ് ഖലീഫയുടെ (828 മീറ്റര്) റെക്കോര്ഡ് തകര്ത്ത് കൊണ്ട്, കൃത്യം ഒരു കിലോമീറ്റര് (1,000 മീറ്റര്) ഉയരത്തില് നിര്മ്മിക്കുന്ന ‘ജിദ്ദ ടവര്’ പദ്ധതി സൗദി പുനരാരംഭിച്ചു. ചെങ്കടല് തീരത്ത് ഒരുങ്ങുന്ന മഹാത്ഭുതം യാഥാര്ത്ഥ്യമാകുന്നതോടെ നിര്മ്മാണ ചരിത്രത്തിലെ പുതിയൊരു അധ്യായത്തിനാകും ലോകം സാക്ഷ്യം വഹിക്കുക.
ആകാശത്തിലെ അത്ഭുതമെന്ന് അറിയപ്പെടുന്ന ഷാങ്ഹായ് ടവറിനെയും ബുര്ജ് ഖലീഫയെയും പിന്നിലാക്കുന്ന ഗോപുരം വെറുമൊരു കെട്ടിടമല്ല, മറിച്ച് ആകാശത്ത് പണിതുയര്ത്തിയ ഒരു നഗരമാണെന്നാണ് അവകാശപ്പെടുന്നത്. മൂന്ന് ഈഫല് ടവറുകള് ഒന്നിനു മുകളില് ഒന്നായി വെച്ചാലുള്ള അത്രയും ഉയരം ഇതിനുണ്ടാകും. ഏകദേശം 2 ബില്യണ് ഡോളര് ചെലവ് പ്രതീക്ഷിക്കുന്ന ടവറില് ലോകത്തിലെ ഏറ്റവും ഉയര്ന്ന ഒബ്സര്വേഷന് ഡെക്കുകള്, അത്യാഡംബര ഹോട്ടലുകള്, ഓഫീസുകള് എന്നിവയുണ്ടാകും.
വിഷന് 2030ന്റെ കരുത്ത്
സൗദി കിരീടാവകാശി മുഹമ്മദ് ബിന് സല്മാന്റെ ‘വിഷന് 2030’ പദ്ധതിയുടെ പ്രധാന ആകര്ഷണങ്ങളിലൊന്നാണ് ജിദ്ദ ടവര്. എണ്ണയെ മാത്രം ആശ്രയിക്കാതെ ടൂറിസം, സാങ്കേതികവിദ്യ എന്നീ മേഖലകളില് ലോകത്തിന്റെ ശ്രദ്ധാകേന്ദ്രമാകാനാണ് സൗദി ലക്ഷ്യമിടുന്നത്. 2010ല് നിര്മ്മാണം ആരംഭിച്ചെങ്കിലും ചില സാങ്കേതികസാമ്പത്തിക കാരണങ്ങളാല് ഇടക്കാലത്ത് നിര്ത്തിവെച്ചിരുന്ന പദ്ധതി ഇപ്പോള് അതിവേഗം പുരോഗമിക്കുകയാണ്.
എഞ്ചിനീയറിംഗ് വെല്ലുവിളികള്
മണല്ക്കാറ്റിനെയും ഉപ്പുകാറ്റിനെയും അതിജീവിച്ച് ഇത്രയും വലിയ ഉയരത്തില് കെട്ടിടം ഉറപ്പിച്ചു നിര്ത്തുന്നത് എഞ്ചിനീയര്മാര്ക്ക് വലിയ വെല്ലുവിളിയാണ്. കാറ്റിന്റെ വേഗത കുറയ്ക്കാന് പ്രത്യേകമായ സര്പ്പിള ആകൃതിയിലാണ് ടവര് രൂപകല്പ്പന ചെയ്തിരിക്കുന്നത്. കൂടാതെ, ഉയരങ്ങളിലേക്ക് ആളുകളെ എത്തിക്കാന് അതിവേഗ ‘സ്കൈ ട്രെയിനുകള്’ പോലുള്ള ലിഫ്റ്റ് സംവിധാനങ്ങളും ഇവിടെയുണ്ടാകും.
സോഷ്യല് മീഡിയ പ്ലാറ്റ്ഫോമുകളിലും വാര്ത്തകളിലും ഇതിനോടകം തന്നെ ജിദ്ദ ടവര് തരംഗമായിക്കഴിഞ്ഞു. നിര്മ്മാണം പൂര്ത്തിയാകുന്നതോടെ ലോകത്തിലെ വിസ്മയിപ്പിക്കുന്ന ടൂറിസ്റ്റ് കേന്ദ്രമായി ജിദ്ദ മാറുമെന്നാണ് കരുതപ്പെടുന്നത്.
