‘എന്തുകൊണ്ട് കേരളം ഗുജറാത്ത് ആയിക്കൂടാ?’; എസ്ഡിപിഐയും വെൽഫെയർ പാർട്ടിയും ഇല്ലാതാക്കാൻ ശ്രമിച്ചതുകൊണ്ടാണ് എൻഡിഎയിൽ ചേർന്നതെന്ന് സാബു എം ജേക്കബ്

കൊച്ചി: എസ്ഡിപിഐ, വെൽഫെയർ പാർട്ടി, പിഡിപി തുടങ്ങിയ പാർട്ടികൾ ചേർന്ന് തങ്ങളെ ഇല്ലാതാക്കാൻ ശ്രമിച്ച സാഹചര്യത്തിലാണ് ഇന്ത്യയിലെ ഏറ്റവും ശക്തമായ മുന്നണിയായ എൻഡിഎയ്‌ക്കൊപ്പം ചേരാൻ തീരുമാനിച്ചതെന്ന് സാബു എം ജേക്കബ് പറഞ്ഞു. കൊച്ചിയിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം. ആധുനിക തലമുറയ്ക്കും നാടിനും ആവശ്യമായ മാറ്റമാണ് ഇതിലൂടെ പാർട്ടി സ്വീകരിച്ചതെന്ന് അദ്ദേഹം വ്യക്തമാക്കി.

കേരളത്തിന്റെ വികസനത്തിന് പുത്തൻ കുതിപ്പേകാനാണ് എൻഡിഎയുമായുള്ള സഖ്യമെന്ന് അദ്ദേഹം പറഞ്ഞു. കേന്ദ്ര ഭരണത്തിന്റെ ഭാഗമായതോടെ ലക്ഷക്കണക്കിന് വിദേശനിക്ഷേപം ഒഴുകുന്ന ആന്ധ്രാപ്രദേശിന്റെ മാതൃക അദ്ദേഹം ചൂണ്ടിക്കാട്ടി. സമാനമായ രീതിയിൽ എന്തുകൊണ്ട് കേരളത്തിന് ഗുജറാത്തോ ആന്ധ്രയോ ആയിക്കൂടാ എന്നും അദ്ദേഹം ചോദിച്ചു. ഏഴ് പതിറ്റാണ്ടായി മാറിമാറി ഭരിച്ച ഇടത്-വലത് മുന്നണികൾ കേരളത്തെ 50 വർഷം പുറകോട്ട് കൊണ്ടുപോയെന്നും അദ്ദേഹം കുറ്റപ്പെടുത്തി.

പാർട്ടി സമിതികളിൽ കൃത്യമായ ചർച്ചകൾ നടത്തിയ ശേഷമാണ് എൻഡിഎയിൽ ചേരാൻ തീരുമാനിച്ചത്. എൽഡിഎഫിലേക്ക് പോകണമെന്ന അഭിപ്രായം ആരും പ്രകടിപ്പിച്ചില്ല. വികസനം കൈവരിക്കുന്ന മറ്റ് ഇന്ത്യൻ സംസ്ഥാനങ്ങളെപ്പോലെ കേരളത്തെയും മാറ്റാനാണ് തങ്ങൾ ലക്ഷ്യമിടുന്നതെന്നും, മുന്നണി മാറ്റത്തിൽ ഇടത്-വലത് പാർട്ടികൾ ഒഴുക്കുന്നത് മുതലക്കണ്ണീരാണെന്നും അദ്ദേഹം കൂട്ടിച്ചേർത്തു.