വെള്ള, പച്ച, മഞ്ഞ, നീല..; നമ്പര് പ്ലേറ്റിലെ ഈ നിറങ്ങൾ ഈ നിറങ്ങൾ എന്താണെന്ന് അറിയാമോ?
ന്യൂഡൽഹി: ഇന്ത്യൻ നിരത്തുകളിൽ പല നിറത്തിലുള്ള നമ്പർ പ്ലേറ്റുകൾ നിങ്ങൾ ശ്രദ്ധിച്ചിട്ടുണ്ടാകും. വെള്ളയും മഞ്ഞയും മാത്രമല്ല, പച്ചയും നീലയും കറുപ്പും മുതൽ മുകളിലേക്ക് അമ്പടയാളമുള്ളവ വരെ അക്കൂട്ടത്തിലുണ്ട്. ഈ നിറങ്ങൾ വെറുതെ ഭംഗിക്കായി നൽകുന്നതല്ല; മറിച്ച് ഓരോന്നും കൃത്യമായ നിയമങ്ങളെയും ആ വാഹനം ഏത് വിഭാഗത്തിൽപ്പെടുന്നു എന്നതിനെയുമാണ് സൂചിപ്പിക്കുന്നത്. ഇന്ത്യൻ മോട്ടോർ വാഹന നിയമപ്രകാരം നമ്പർ പ്ലേറ്റുകളിലെ നിറവ്യത്യാസങ്ങൾ അറിഞ്ഞിരിക്കേണ്ടത് അത്യാവശ്യമാണ്.
ഇന്ത്യയിലെ വിവിധ തരം നമ്പർ പ്ലേറ്റുകളെക്കുറിച്ച് കൂടുതൽ അറിയാം:
- വെള്ള പ്ലേറ്റിൽ കറുത്ത അക്ഷരം (White Plate) നമ്മുടെ നിരത്തുകളിൽ ഏറ്റവും സാധാരണയായി കാണുന്നതാണിത്. സ്വകാര്യ ആവശ്യങ്ങൾക്കുള്ള വാഹനങ്ങളാണിവ. ഇത്തരം വാഹനങ്ങൾ വാണിജ്യാവശ്യങ്ങൾക്കോ ടാക്സിയായി ഓടാനോ (ചരക്ക് കടത്താനോ യാത്രക്കാരെ കൊണ്ടുപോകാനോ) ഉപയോഗിക്കാൻ പാടില്ല.
- മഞ്ഞ പ്ലേറ്റിൽ കറുത്ത അക്ഷരം (Yellow Plate) ടാക്സികൾ, ബസുകൾ, ട്രക്കുകൾ, ഓട്ടോറിക്ഷകൾ തുടങ്ങിയ വാണിജ്യ വാഹനങ്ങളെയാണ് (Commercial Vehicles) ഇത് സൂചിപ്പിക്കുന്നത്. ഇത്തരം വാഹനങ്ങൾ ഓടിക്കാൻ ഡ്രൈവർക്ക് ബാഡ്ജ് ഉള്ള ലൈസൻസ് നിർബന്ധമാണ്.
- പച്ച പ്ലേറ്റ് (Green Plate – EV) ഇലക്ട്രിക് വാഹനങ്ങളെ (EV) തിരിച്ചറിയാനാണ് പച്ച നിറം ഉപയോഗിക്കുന്നത്. ഇതിൽ തന്നെ രണ്ട് വകഭേദങ്ങളുണ്ട്:
പച്ച പ്ലേറ്റിൽ വെള്ള അക്ഷരം: സ്വകാര്യ ഇലക്ട്രിക് വാഹനങ്ങൾ.
പച്ച പ്ലേറ്റിൽ മഞ്ഞ അക്ഷരം: വാണിജ്യ ആവശ്യത്തിനുള്ള (ടാക്സി/ബസ്) ഇലക്ട്രിക് വാഹനങ്ങൾ.
- കറുത്ത പ്ലേറ്റിൽ മഞ്ഞ അക്ഷരം (Black Plate) ഇത് താരതമ്യേന പുതിയൊരു വിഭാഗമാണ്. ഡ്രൈവറില്ലാതെ വാടകയ്ക്ക് എടുക്കാവുന്ന (Self-drive rental cars) വാഹനങ്ങളാണിവ. ആഡംബര ഹോട്ടലുകളിലും മറ്റും ഇത്തരം വാഹനങ്ങൾ കൂടുതലായി കണ്ടുവരുന്നു. ഇതിന് കൊമേഴ്സ്യൽ ഡ്രൈവിംഗ് പെർമിറ്റ് ആവശ്യമില്ല.
- നീല പ്ലേറ്റിൽ വെള്ള അക്ഷരം (Blue Plate) വിദേശ നയതന്ത്രജ്ഞർക്ക് (Foreign Diplomats/Consulates) അനുവദിച്ചിട്ടുള്ള വാഹനങ്ങളാണിവ. വിദേശ എംബസികളുടെ വാഹനങ്ങളായതിനാൽ ഇവയ്ക്ക് ഇന്ത്യൻ നിയമങ്ങളിൽ നിന്ന് ചില ഇളവുകളുണ്ട്. സംസ്ഥാനത്തിന്റെ കോഡിന് പകരം (ഉദാഹരണത്തിന് KL), ആ രാജ്യത്തിന്റെ കോഡായിരിക്കും (CC – Consular Corps, UN – United Nations തുടങ്ങിയവ) ഇതിൽ ഉണ്ടാവുക.
- ചുവപ്പ് പ്ലേറ്റ് (Red Plate)
താൽക്കാലിക രജിസ്ട്രേഷൻ: ഷോറൂമിൽ നിന്ന് ഇറക്കുന്ന പുതിയ വാഹനങ്ങൾക്ക് സ്ഥിരമായ രജിസ്ട്രേഷൻ നമ്പർ ലഭിക്കുന്നത് വരെ ചുവന്ന പ്ലേറ്റിൽ വെള്ള അക്ഷരത്തിലുള്ള നമ്പർ ഉപയോഗിക്കുന്നു. ഇതിന്റെ കാലാവധി ഒരു മാസമാണ്.
ഇന്ത്യൻ രാഷ്ട്രപതി, ഗവർണർമാർ തുടങ്ങിയ അതിവിശിഷ്ട വ്യക്തികളുടെ ഔദ്യോഗിക വാഹനങ്ങളിലും ചിലപ്പോൾ എംബ്ലം പതിച്ച ചുവന്ന പ്ലേറ്റ് ഉപയോഗിക്കാറുണ്ട്.
- അമ്പടയാളമുള്ള പ്ലേറ്റ് (Broad Arrow) ഇന്ത്യൻ സൈന്യത്തിന്റെ (കര, വ്യോമ, നാവിക സേനകൾ) വാഹനങ്ങളാണിവ. പ്രതിരോധ മന്ത്രാലയത്തിന് കീഴിലുള്ള ഈ വാഹനങ്ങളുടെ നമ്പറിന്റെ തുടക്കത്തിലോ അവസാനത്തിലോ മുകളിലേക്ക് ചൂണ്ടുന്ന ഒരു അമ്പടയാളം ഉണ്ടായിരിക്കും.
വാഹന പരിശോധന വേളയിലും ടോൾ ബൂത്തുകളിലും ഉദ്യോഗസ്ഥർക്ക് വാഹനങ്ങളെ എളുപ്പത്തിൽ തിരിച്ചറിയാൻ ഈ കളർകോഡുകൾ സഹായിക്കുന്നു.
