ആക്രമിച്ച പുള്ളിപ്പുലിയെ കർഷകൻ കോടാലികൊണ്ടു വെട്ടിക്കൊന്നു; കേസെടുത്ത് വനംവകുപ്പ്
ജയ്പൂർ: സ്വയം പ്രതിരോധിക്കുന്നതിനിടെ കർഷകൻ പുള്ളിപ്പുലിയെ വെട്ടിക്കൊന്നു. രാജസ്ഥാനിലെ കോട്പുട്ലി-ബെഹ്റോർ ജില്ലയിലെ ഖാർകാഡി ഗ്രാമത്തിലാണ് സംഭവം നടന്നത്.ഇന്നലെ വയലിൽ ജോലി ചെയ്തുകൊണ്ടിരുന്ന ശ്രാവൺ ഗുർജാർ (48) എന്ന കർഷകനാണ് പുള്ളിപ്പുലിയുടെ ആക്രമണത്തിന് ഇരയായത്.
ആടുകൾക്കായി തീറ്റ ശേഖരിക്കുകയായിരുന്നു ശ്രാവൺ. ഇതിനിടെ സമീപത്തെ കുറ്റിക്കാട്ടിൽ ഒളിച്ചിരുന്ന പുള്ളിപ്പുലി പെട്ടെന്ന് ഇദ്ദേഹത്തിന് നേരെ ചാടിവീഴുകയായിരുന്നു. മരക്കൊമ്പുകൾ മുറിക്കുന്നതിനിടെയുണ്ടായ അപ്രതീക്ഷിത ആക്രമണത്തിൽ കർഷകന് നഖങ്ങൾ കൊണ്ടും പല്ലുകൾ കൊണ്ടും മാരകമായി പരിക്കേറ്റു. ജീവൻ രക്ഷിക്കാനുള്ള തീവ്രശ്രമത്തിനിടെ കൈവശമുണ്ടായിരുന്ന കോടാലി ഉപയോഗിച്ച് ഇദ്ദേഹം പുള്ളിപ്പുലിയെ നേരിട്ടു. ആക്രമണത്തിൽ പരിക്കേറ്റ പുള്ളിപ്പുലി സംഭവസ്ഥലത്ത് തന്നെ ചത്തു.
ഗുരുതരമായി പരിക്കേറ്റ ഗുർജാറിനെ ഉടൻ തന്നെ അൽവാറിലെ സർക്കാർ ആശുപത്രിയിൽ പ്രവേശിപ്പിച്ചു. ഇദ്ദേഹം നിലവിൽ ചികിത്സയിലാണ്. ചത്ത പുള്ളിപ്പുലിയുടെ ജഡം വനംവകുപ്പ് ഉദ്യോഗസ്ഥർ കസ്റ്റഡിയിലെടുത്തു. വന്യജീവി സംരക്ഷണ നിയമപ്രകാരം വകുപ്പുതല നടപടികൾ ആരംഭിച്ചതായും സംഭവത്തിന്റെ കൂടുതൽ സാഹചര്യങ്ങൾ വ്യക്തമാക്കാൻ അന്വേഷണം തുടരുകയാണെന്നും ഫോറസ്റ്റർ മനോജ് നാഗ അറിയിച്ചു.
രാജസ്ഥാന്റെ വിവിധ ഭാഗങ്ങളിൽ മനുഷ്യരും വന്യമൃഗങ്ങളും തമ്മിലുള്ള ഏറ്റുമുട്ടലുകൾ വർദ്ധിച്ചുവരുന്നത് വലിയ ആശങ്കയ്ക്കാണ് വഴിതുറക്കുന്നത്. വനത്തോടു ചേർന്നുള്ള ഗ്രാമങ്ങളിലെ സുരക്ഷയെക്കുറിച്ചും വന്യമൃഗങ്ങളുടെ കടന്നുകയറ്റം തടയാനുള്ള ഗ്രാമീണരുടെ തയ്യാറെടുപ്പുകളെക്കുറിച്ചും വലിയ ചർച്ചകൾക്കാണ് ഈ സംഭവം സോഷ്യൽ മീഡിയയിൽ തുടക്കമിട്ടിരിക്കുന്നത്.
