2,000 രൂപാ നോട്ടുകൾ പിൻവലിച്ചിട്ട് 3 വർഷം; ഇനിയും തിരിച്ചെത്താൻ 5,551 കോടിയുടെ കറൻസികൾ ബാക്കി
മുംബൈ: രാജ്യത്ത് 2,000 രൂപ നോട്ടുകൾ പിൻവലിക്കാനുള്ള നടപടി ആരംഭിച്ച് മൂന്ന് വർഷം പിന്നിടുമ്പോൾ, വിപണിയിലുണ്ടായിരുന്ന നോട്ടുകളുടെ 98.44 ശതമാനവും ബാങ്കുകളിൽ തിരിച്ചെത്തിയതായി റിസർവ് ബാങ്ക് ഓഫ് ഇന്ത്യ അറിയിച്ചു. കഴിഞ്ഞ മാസം 28-ലെ കണക്കനുസരിച്ച് 5,551 കോടി രൂപയുടെ നോട്ടുകൾ കൂടി ഇനി പൊതുജനങ്ങളുടെ കൈവശമുണ്ടെന്നാണ് ആർബിഐ വ്യക്തമാക്കുന്നത്.
2023 മെയ് 19-നാണ് 2,000 രൂപ നോട്ടുകൾ പ്രചാരത്തിൽ നിന്ന് പിൻവലിക്കുന്നതായി ആർബിഐ പ്രഖ്യാപിച്ചത്. അന്ന് 3.56 ലക്ഷം കോടി രൂപയുടെ നോട്ടുകളായിരുന്നു വിപണിയിലുണ്ടായിരുന്നത്. നിലവിൽ ഇവ നിയമപരമായ സാധുത നിലനിർത്തുന്നുണ്ടെങ്കിലും ദൈനംദിന ഇടപാടുകൾക്കായി ഉപയോഗിക്കാൻ കഴിയില്ല.
എന്തുകൊണ്ട് പിൻവലിച്ചു?
2016-ലെ നോട്ട് നിരോധനത്തിന് പിന്നാലെ കറൻസി ക്ഷാമം പരിഹരിക്കാനാണ് 2,000 രൂപ നോട്ടുകൾ അവതരിപ്പിച്ചത്. എന്നാൽ മറ്റ് മൂല്യങ്ങളിലുള്ള നോട്ടുകൾ ആവശ്യത്തിന് ലഭ്യമായതോടെ 2018-19 കാലയളവിൽ തന്നെ ഇവയുടെ അച്ചടി നിർത്തിവെച്ചിരുന്നു. നോട്ടുകളുടെ ആയുസ്സ് (4-5 വർഷം) അവസാനിച്ചതും, സാധാരണ ഇടപാടുകൾക്ക് ഇവ ഉപയോഗിക്കാത്തതും കണക്കിലെടുത്ത് ‘ക്ലീൻ നോട്ട് പോളിസി’യുടെ ഭാഗമായാണ് പിൻവലിക്കൽ തീരുമാനമെടുത്തത്.
നോട്ടുകൾ മാറ്റിയെടുക്കാൻ ഇനിയും അവസരം
ബാങ്ക് ശാഖകൾ വഴി നോട്ടുകൾ മാറ്റിയെടുക്കാനുള്ള സൗകര്യം 2023 ഒക്ടോബർ 7-ന് അവസാനിച്ചിരുന്നു. എങ്കിലും, ആർബിഐയുടെ ഇഷ്യൂ ഓഫീസുകൾ വഴി ഇപ്പോഴും നോട്ടുകൾ കൈമാറാവുന്നതാണ്. നേരിട്ട് എത്താൻ കഴിയാത്തവർക്ക് ഇന്ത്യ പോസ്റ്റ് വഴി ആർബിഐ ഓഫീസുകളിലേക്ക് നോട്ടുകൾ അയച്ച് തത്തുല്യമായ തുക സ്വന്തം ബാങ്ക് അക്കൗണ്ടുകളിൽ ലഭ്യമാക്കാനും സൗകര്യമുണ്ട്.
2018 മാർച്ചിൽ 6.73 ലക്ഷം കോടി രൂപയുടെ 2,000 നോട്ടുകൾ വിപണിയിലുണ്ടായിരുന്നു. ഘട്ടംഘട്ടമായുള്ള നടപടികളിലൂടെയാണ് ഇത് നിലവിലെ 5,551 കോടി രൂപയിലേക്ക് കുറഞ്ഞത്.
