പാചകവാതക ക്ഷാമം: കോഴിക്കോട്ടെ ഹോട്ടലുകളിൽ വിഭവങ്ങൾ വെട്ടിക്കുറച്ചു; വിതരണം മുടങ്ങിയാൽ അടച്ചുപൂട്ടലിലേക്ക്

കോഴിക്കോട്: അന്താരാഷ്ട്ര തലത്തിലെ സംഘർഷങ്ങളെത്തുടർന്നുണ്ടായ പാചകവാതക വിതരണ പ്രതിസന്ധി കോഴിക്കോട്ടെ ഹോട്ടൽ മേഖലയെ കനത്ത ആഘാതത്തിലാഴ്ത്തുന്നു. സിലിണ്ടറുകളുടെ ലഭ്യത കുറഞ്ഞതോടെ ജില്ലയിലെ ഭൂരിഭാഗം ഹോട്ടലുകളും തങ്ങളുടെ മെനുവിൽ നിന്ന് ഗ്യാസ് കൂടുതൽ ആവശ്യമായ വിഭവങ്ങൾ ഒഴിവാക്കിത്തുടങ്ങി. പ്രതിസന്ധി ഇതേപോലെ തുടർന്നാൽ വരുംദിവസങ്ങളിൽ ഹോട്ടലുകൾ അടച്ചുപൂട്ടേണ്ടി വരുമെന്ന ആശങ്കയിലാണ് ഉടമകൾ.

ഇറാൻ-ഇസ്രയേൽ-യു.എസ് സംഘർഷം പാചകവാതക വില വർധിക്കാനും വിതരണം തടസ്സപ്പെടാനും കാരണമായതാണ് ഈ പ്രതിസന്ധിക്ക് പിന്നിൽ. ജില്ലയിലെ ഹോട്ടലുകളിൽ 99 ശതമാനവും വിറകടുപ്പുകൾ ഉപേക്ഷിച്ചു പാചകവാതകത്തിലേക്ക് മാറിയവരാണ്. ചൈനീസ് വിഭവങ്ങൾക്കും തത്സമയം തയ്യാറാക്കുന്ന ഭക്ഷണങ്ങൾക്കും സിലിണ്ടറുകൾ അനിവാര്യമായതിനാൽ, നിലവിലെ ക്ഷാമം ഇവയുടെ നിർമ്മാണത്തെ പൂർണ്ണമായും ബാധിച്ചു. ആവശ്യപ്പെടുന്ന സിലിണ്ടറുകളുടെ പകുതി പോലും നിലവിൽ വിതരണ ഏജൻസികളിൽ നിന്ന് ലഭിക്കുന്നില്ലെന്ന് ഹോട്ടൽ ആൻഡ് റസ്റ്ററന്റ് അസോസിയേഷൻ ജില്ലാ പ്രസിഡന്റ് യു.എസ്. സന്തോഷ് കുമാർ പറഞ്ഞു.

ഓർഡർ അനുസരിച്ച് ഭക്ഷണം തയ്യാറാക്കുന്ന രീതി മാറ്റി, കറികളെല്ലാം ഒന്നിച്ച് ഉണ്ടാക്കി വെക്കേണ്ട അവസ്ഥയാണെന്ന് ഹോട്ടലുടമകൾ പറയുന്നു. ഗാർഹിക ആവശ്യങ്ങൾക്കുള്ള സിലിണ്ടറുകൾക്ക് നൽകുന്ന മുൻഗണന ഹോട്ടൽ മേഖലയ്ക്കും നൽകണമെന്ന ആവശ്യം സർക്കാരിന് മുന്നിൽ അവതരിപ്പിക്കാനാണ് സംഘടനയുടെ തീരുമാനം. ഈ ആഴ്ച അവസാനത്തോടെ സിലിണ്ടറുകളുടെ ലഭ്യത പൂർണ്ണമായും നിലച്ചേക്കുമെന്ന മുന്നറിയിപ്പും മേഖലയിലുണ്ട്.