ഹോർമുസ് പ്രതിസന്ധി: ‘ഊർജ സുരക്ഷ ഉറപ്പാക്കാൻ ഇന്ത്യ സജ്ജം’; ആശങ്കപ്പെടേണ്ടതില്ലെന്ന് പ്രധാനമന്ത്രി

ന്യൂഡൽഹി: പശ്ചിമേഷ്യയിലെ യുദ്ധസാഹചര്യവും ഹോർമുസ് കടലിടുക്കിലെ നിയന്ത്രണങ്ങളും സൃഷ്ടിക്കുന്ന വെല്ലുവിളികൾക്കിടയിലും രാജ്യത്തെ ഊർജ സുരക്ഷ ഉറപ്പാക്കാൻ സർക്കാർ സജ്ജമാണെന്ന് പ്രധാനമന്ത്രി നരേന്ദ്ര മോദി. ഗൾഫ് മേഖലയിലെ സംഘർഷം ആശങ്കാജനകമാണെങ്കിലും പെട്രോൾ, ഡീസൽ, പാചകവാതക വിതരണത്തിൽ തടസ്സമുണ്ടാകാതിരിക്കാൻ നയതന്ത്ര-സാമ്പത്തിക തലങ്ങളിൽ ശക്തമായ ഇടപെടലുകൾ നടത്തുന്നുണ്ടെന്ന് അദ്ദേഹം പാർലമെന്റിൽ വ്യക്തമാക്കി.

ഹോർമുസ് കടലിടുക്കിലൂടെയുള്ള ടാങ്കർ ഗതാഗതം തടസ്സപ്പെട്ടത് ആഗോളതലത്തിൽ ക്രൂഡ് ഓയിൽ വില നാല് വർഷത്തെ ഉയർന്ന നിലയിലെത്തിച്ചിട്ടുണ്ട്. ഇന്ത്യയുടെ എൽപിജി ഇറക്കുമതിയുടെ 90 ശതമാനവും ഈ പാതയെയാണ് ആശ്രയിക്കുന്നത്. ഈ സാഹചര്യത്തിൽ ആഭ്യന്തര ഉൽപ്പാദനം 25 ശതമാനം വർധിപ്പിക്കാൻ സർക്കാർ ഉത്തരവിട്ടതായി പ്രധാനമന്ത്രി അറിയിച്ചു. നിലവിൽ 33 കോടിയിലധികം കുടുംബങ്ങളാണ് രാജ്യത്ത് എൽപിജി ഉപയോഗിക്കുന്നത്.

കഴിഞ്ഞ ദശകത്തിൽ ഇന്ത്യ ഊർജ സ്രോതസ്സുകൾ വൈവിധ്യവൽക്കരിച്ചതായി പ്രധാനമന്ത്രി ചൂണ്ടിക്കാട്ടി. മുൻപ് 27 രാജ്യങ്ങളെ മാത്രം ആശ്രയിച്ചിരുന്ന ഇന്ത്യ ഇപ്പോൾ 41 രാജ്യങ്ങളിൽ നിന്ന് എണ്ണ ഇറക്കുമതി ചെയ്യുന്നുണ്ട്. നിലവിൽ 53 ലക്ഷം മെട്രിക് ടൺ തന്ത്രപരമായ എണ്ണ ശേഖരം രാജ്യത്തിനുണ്ട്. കൂടാതെ, പെട്രോളിൽ 20 ശതമാനം എത്തനോൾ കലർത്തുന്നതിലൂടെ ഏകദേശം 4.5 കോടി ബാരൽ ക്രൂഡ് ഓയിൽ ഇറക്കുമതി കുറയ്ക്കാൻ സാധിച്ചതായും അദ്ദേഹം അവകാശപ്പെട്ടു.

ഗൾഫ് മേഖലയിൽ ജോലി ചെയ്യുന്ന ഒരു കോടിയോളം വരുന്ന ഇന്ത്യക്കാരുടെ സുരക്ഷയ്ക്ക് മുൻഗണന നൽകുന്നുണ്ടെന്ന് പ്രധാനമന്ത്രി പറഞ്ഞു. യുദ്ധം ആരംഭിച്ച ശേഷം ഇതുവരെ 3.75 ലക്ഷം ഇന്ത്യക്കാർ സുരക്ഷിതമായി നാട്ടിലെത്തി. ഇറാനിൽ നിന്ന് 700 മെഡിക്കൽ വിദ്യാർത്ഥികളടക്കം ആയിരത്തോളം പേരെ തിരിച്ചെത്തിച്ചു. ഗൾഫ് രാജ്യങ്ങളിലെ സിബിഎസ്ഇ പരീക്ഷകൾ റദ്ദാക്കുന്നത് ഉൾപ്പെടെയുള്ള നടപടികൾ വിദ്യാർത്ഥികളുടെ സുരക്ഷ മുൻനിർത്തി സ്വീകരിച്ചിട്ടുണ്ട്.

വാണിജ്യ കപ്പലുകൾക്കും ഊർജ അടിസ്ഥാന സൗകര്യങ്ങൾക്കും നേരെയുള്ള ആക്രമണങ്ങളെ ഇന്ത്യ അപലപിച്ചു. ചർച്ചകളിലൂടെയും നയതന്ത്രത്തിലൂടെയും മാത്രമേ പ്രശ്നപരിഹാരം സാധ്യമാകൂ എന്നതാണ് ഇന്ത്യയുടെ നിലപാടെന്നും സമാധാനം പുനഃസ്ഥാപിക്കാൻ വിവിധ രാഷ്ട്രത്തലവന്മാരുമായി ആശയവിനിമയം നടത്തുന്നുണ്ടെന്നും പ്രധാനമന്ത്രി ലോക്സഭയെ അറിയിച്ചു.