‘ഇറാൻ കപ്പലിനെ കുറിച്ചുള്ള ഇന്റലിജൻസ് വിവരങ്ങൾ അമേരിക്കയ്ക്ക് ചോർത്തിയോ?’ ആരോപണങ്ങൾക്ക് ശക്തമായ മറുപടിയുമായി ഇന്ത്യ

ന്യൂഡൽഹി: ശ്രീലങ്കൻ തീരത്ത് ഇറാനിയൻ യുദ്ധക്കപ്പലായ ‘ഐറിസ് ദേന’യ്ക്ക് (IRIS Dena) നേരെ നടന്ന അമേരിക്കൻ ആക്രമണത്തിൽ ഇന്ത്യ സഹായം നൽകിയെന്ന റിപ്പോർട്ടുകൾ കേന്ദ്ര സർക്കാർ ശക്തമായി നിഷേധിച്ചു. ഇത്തരം വാദങ്ങൾ തീർത്തും അടിസ്ഥാനരഹിതവും അസംബന്ധവുമാണെന്ന് മുതിർന്ന നാവികസേനാ ഉദ്യോഗസ്ഥർ വ്യക്തമാക്കി. ഇന്ത്യ-യുഎസ് പ്രതിരോധ കരാറുകൾ ഇത്തരം സൈനിക നടപടികൾക്ക് യാന്ത്രികമായി ബാധകമല്ലെന്നും ഇന്ത്യ വിശദീകരിച്ചു.

ഇന്ത്യ ആതിഥേയത്വം വഹിച്ച ‘മിലാൻ’ ബഹുരാഷ്ട്ര നാവികാഭ്യാസത്തിൽ പങ്കെടുത്ത ശേഷം മടങ്ങുകയായിരുന്നു ഇറാനിയൻ കപ്പൽ. ബുധനാഴ്ച ശ്രീലങ്കൻ സമുദ്രാതിർത്തിയിൽ വെച്ച് യുഎസ് അന്തർവാഹിനി നടത്തിയ ടോർപ്പിഡോ ആക്രമണത്തിൽ കപ്പൽ തകരുകയും 87 ഇറാനിയൻ നാവികർ കൊല്ലപ്പെടുകയും ചെയ്തു. നാവികാഭ്യാസത്തിന്റെ ഭാഗമായി നിരായുധമായി സഞ്ചരിക്കുകയായിരുന്ന കപ്പലിന് നേരെ നടന്ന നീക്കം വലിയ ‘ക്രൂരത’യാണെന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി പ്രതികരിച്ചു.

പേർഷ്യൻ ഗൾഫിന് പുറത്ത് യുഎസും ഇറാനും തമ്മിലുള്ള സംഘർഷം പുതിയ തലത്തിലെത്തിയിരിക്കുകയാണ്. മിലാൻ അഭ്യാസപ്രകടനത്തിന് ശേഷം മടങ്ങിയ കപ്പലിനെ ലക്ഷ്യമിടാൻ ഇന്ത്യ വിവരങ്ങൾ കൈമാറിയെന്ന പ്രചാരണം നയതന്ത്ര ബന്ധങ്ങളെ ബാധിക്കുമെന്ന് കണ്ടാണ് ഇന്ത്യയുടെ ഔദ്യോഗിക വിശദീകരണം. മേഖലയിൽ സമാധാനം നിലനിർത്താനാണ് ഇന്ത്യ ആഗ്രഹിക്കുന്നതെന്നും സൈനിക വൃത്തങ്ങൾ കൂട്ടിച്ചേർത്തു.