ഇസ്രയേൽ ഡിമോണ ആണവ കേന്ദ്രത്തിൽ ഇറാൻ ആക്രമണം; ഞെട്ടിത്തരിച്ച് ഇസ്രയേൽ: വൻ നാശം, പരിക്ക് 100 കടന്നു

തെൽ അവീവ്: ഇസ്രയേലിന്റെ അതിശക്തമായ വ്യോമ പ്രതിരോധ കവചങ്ങളെ നിഷ്പ്രഭമാക്കി ഡിമോണ ആണവ കേന്ദ്രത്തിന് നേരെ ഇറാൻ നടത്തിയ മിസൈൽ ആക്രമണത്തിൽ വൻ നാശനഷ്ടങ്ങൾ. ലോകത്തെ തന്നെ ഏറ്റവും ആധുനികമായ പ്രതിരോധ സംവിധാനങ്ങൾ നോക്കുകുത്തിയായത് ഇസ്രയേലിനെ ഞെട്ടിച്ചിരിക്കുകയാണ്. ഡിമോണ ആണവ നഗരത്തെ ലക്ഷ്യമിട്ടെത്തിയ ഇറാന്റെ മിസൈലുകൾ ജനവാസ മേഖലകളിൽ പതിച്ചതിനെത്തുടർന്ന് നൂറോളം പേർക്ക് പരിക്കേറ്റതായാണ് പുതിയ റിപ്പോർട്ടുകൾ.
ലോകം കണ്ടിട്ടുള്ളതിൽ വെച്ച് ഏറ്റവും സുരക്ഷിതമെന്ന് വിശ്വസിക്കപ്പെട്ടിരുന്ന ഇസ്രയേൽ വ്യോമ പ്രതിരോധ സംവിധാനങ്ങളെ മറികടന്നാണ് ഇറാന്റെ അത്യാധുനിക ബാലസ്റ്റിക് മിസൈലുകൾ ഡിമോണയിൽ പതിച്ചത്. പതിവ് പോലെ അയേൺ ഡോം മിസൈലുകളെ പ്രതിരോധിക്കുമെന്ന് കരുതിയെങ്കിലും, ഇറാന്റെ ഒരേസമയമുള്ള മിസൈൽ വർഷത്തിന് മുന്നിൽ സംവിധാനങ്ങൾ പരാജയപ്പെടുകയായിരുന്നു. ഇത് ഇസ്രയേലിൽ വലിയ ആശങ്കയ്ക്കും ചർച്ചകൾക്കും വഴിതുറന്നിട്ടുണ്ട്.

ആണവ ഗവേഷണ കേന്ദ്രത്തിന് തൊട്ടടുത്തുള്ള നഗര മേഖലകളിലാണ് മിസൈലുകൾ പതിച്ചത്. നൂറോളം പേർക്ക് ആക്രമണത്തിൽ പരിക്കേറ്റതായും ഇവരിൽ പലരുടെയും നില ഗുരുതരമാണെന്നും അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. മിസൈൽ വീണതിനെത്തുടർന്നുണ്ടായ തീപിടിത്തത്തിൽ നിരവധി കെട്ടിടങ്ങളും വാഹനങ്ങളും പൂർണമായും തകർന്നു. നതാൻസിലെ ആക്രമണത്തിന് തിരിച്ചടിയായി ഇറാൻ നടത്തിയ ഈ നീക്കം പശ്ചിമേഷ്യയെ സമ്പൂർണ യുദ്ധത്തിന്റെ വക്കിലെത്തിച്ചിരിക്കുകയാണ്.

ഇറാന്റെ പരമോന്നത നേതാവ് ആയത്തുല്ല അലി ഖാംനഇ നേരത്തെ നൽകിയ മുന്നറിയിപ്പുകൾ അക്ഷരംപ്രതി നടപ്പിലാക്കുന്ന രീതിയിലാണ് ആക്രമണം നടന്നത്. ഡിമോണയിലെ ആണവ കേന്ദ്രത്തിന് സമീപം മിസൈലുകൾ എത്തിയത് മേഖലയിലെ റേഡിയേഷൻ ഭീഷണി ഉൾപ്പെടെയുള്ള വലിയ അപകടങ്ങളെക്കുറിച്ചുള്ള ചർച്ചകൾക്കും കാരണമായിട്ടുണ്ട്. ഫലസ്തീൻ മേഖലകളിലെ സംഘർഷങ്ങൾക്കപ്പുറം, രണ്ട് ആണവ ശക്തികൾ നേരിട്ട് ഏറ്റുമുട്ടുന്നത് ലോകരാഷ്ട്രങ്ങളെയും ആശങ്കയിലാക്കുന്നു.
നിലവിൽ ഡിമോണയിൽ രക്ഷാപ്രവർത്തനം തുടരുകയാണ്. ഇതിനിടെ, പരിക്കേറ്റവരിൽ വിദേശികളുണ്ടോ എന്ന കാര്യത്തിൽ ഔദ്യോഗിക സ്ഥിരീകരണം വന്നിട്ടില്ല.

ഇറാന്റെ ഓരോ നീക്കത്തിനും കനത്ത വില നൽകേണ്ടി വരുമെന്ന് ഇസ്രയേൽ പ്രധാനമന്ത്രി ആവർത്തിക്കുമ്പോഴും, തങ്ങളുടെ പ്രതിരോധ കോട്ടകൾ തകർന്നതിന്റെ ഞെട്ടലിലാണ് ഭരണകൂടം.