‘മരിച്ചവരുടെ ബാങ്ക് അക്കൗണ്ട് വിവരങ്ങൾ അവകാശികൾക്ക് എന്തുകൊണ്ട് നൽകിക്കൂടാ?’; കേന്ദ്രത്തോടും ആർബിഐയോടും സുപ്രീം കോടതി
ന്യൂഡൽഹി: മരിച്ച വ്യക്തികളുടെ ബാങ്ക് അക്കൗണ്ട് വിവരങ്ങൾ അവരുടെ നിയമപരമായ അവകാശികൾക്ക് ലഭ്യമാക്കുന്നതിൽ നിലനിൽക്കുന്ന തടസ്സങ്ങളെക്കുറിച്ച് സുപ്രീം കോടതി കേന്ദ്ര സർക്കാരിനോടും റിസർവ് ബാങ്കിനോടും (RBI) വിശദീകരണം തേടി. അവകാശികളില്ലാതെ ബാങ്കുകളിൽ കെട്ടിക്കിടക്കുന്ന കോടിക്കണക്കിന് രൂപയുടെ നിക്ഷേപങ്ങൾ സംബന്ധിച്ച് വ്യക്തമായ ഒരു നയരൂപീകരണം നടത്തണമെന്ന് കോടതി നിർദ്ദേശിച്ചു. പ്രമുഖ മാധ്യമപ്രവർത്തക സുചേത ദലാൽ സമർപ്പിച്ച പൊതുതാൽപ്പര്യ ഹർജി പരിഗണിക്കവെയാണ് ജസ്റ്റിസുമാരായ വിക്രം നാഥ്, സന്ദീപ് മേത്ത എന്നിവരടങ്ങിയ ബെഞ്ച് ഈ നിരീക്ഷണം നടത്തിയത്.
ഒരാൾക്ക് വിവിധ ബാങ്കുകളിൽ അക്കൗണ്ടുകൾ ഉണ്ടെങ്കിൽ, അദ്ദേഹം മരണപ്പെട്ടാൽ ആ വിവരങ്ങൾ എങ്ങനെ അവകാശികൾക്ക് ലഭിക്കുമെന്ന് കോടതി ചോദിച്ചു. പലപ്പോഴും കെവൈസി (KYC) നടപടികൾ പൂർത്തിയാക്കാത്തതോ അല്ലെങ്കിൽ രഹസ്യമായി സൂക്ഷിച്ചതോ ആയ അക്കൗണ്ടുകളെക്കുറിച്ച് കുടുംബാംഗങ്ങൾക്ക് അറിവുണ്ടാകാറില്ല. ഇത്തരം സാഹചര്യങ്ങളിൽ അർഹതപ്പെട്ട പണം അവകാശികളിലേക്ക് എത്തുന്നില്ല എന്നത് ഗൗരവകരമായ നയപരമായ പ്രശ്നമാണെന്നും കോടതി ചൂണ്ടിക്കാട്ടി.
അവകാശികളില്ലാത്ത അക്കൗണ്ടുകളുടെ വിശദാംശങ്ങൾ പൊതുജനങ്ങൾക്ക് ലഭ്യമാക്കണമെന്ന് ഹർജിക്കാരിക്ക് വേണ്ടി ഹാജരായ അഭിഭാഷകൻ പ്രശാന്ത് ഭൂഷൺ വാദിച്ചു. നിയമപരമായ അവകാശികൾക്ക് വിവരങ്ങൾ കൈമാറുന്നതിൽ എന്ത് തെറ്റാണുള്ളതെന്നും ഇതിനായി വ്യക്തമായ ഒരു സംവിധാനം സർക്കാർ വികസിപ്പിക്കണമെന്നും കോടതി കർശനമായി ആവശ്യപ്പെട്ടു.
