‘കെജ്രിവാൾ ദുരന്തർ സിനിമയിലെ റഹ്മാൻ ദകായത്ത്, ശീഷ്മഹലിൽ ആഡംബര ജീവിതം’; ചിത്രങ്ങൾ പുറത്തുവിട്ട്, രൂക്ഷ വിമർശനവുമായി ബിജെപി
ന്യൂഡൽഹി: ആം ആദ്മി പാർട്ടി നേതാവ് രാഘവ് ചദ്ദ പാർട്ടി വിട്ടതിന് പിന്നാലെ അരവിന്ദ് കെജ്രിവാളിനെതിരെ കടുത്ത ആക്രമണവുമായി ബിജെപി. കെജ്രിവാളിനെ ‘ഡൽഹിയിലെ റഹ്മാൻ ദകായത്ത്’എന്ന് വിശേഷിപ്പിച്ച ബിജെപി, കെജ്രിവാളിന്റെ ഔദ്യോഗിക വസതിയിലെ ആഡംബരങ്ങൾ വെളിപ്പെടുത്തുന്ന ‘ശീഷ്മഹൽ 2’ എന്ന പേരിലുള്ള പുതിയ ചിത്രങ്ങളും പുറത്തുവിട്ടു. ദുരന്തർ സിനിമയിലെ അധോലോക രാജാവായി അക്ഷയ് ഖന്ന അവതരിപ്പിച്ച കഥാപാത്രമാണ് റഹ്മാൻ ദകായത്. ഡൽഹി മന്ത്രിയും ബിജെപി നേതാവുമായ പർവേഷ് വർമ്മയാണ് കെജ്രിവാളിനെതിരെ ആരോപണങ്ങളുമായി രംഗത്തെത്തിയത്.
രാഘവ് ചദ്ദയുടെ അപ്രതീക്ഷിത വിടവാങ്ങൽ രാഷ്ട്രീയ കേന്ദ്രങ്ങളിൽ വലിയ ചർച്ചയായിരിക്കെയാണ് ബിജെപി ഈ പുതിയ നീക്കം നടത്തിയത്. കെജ്രിവാൾ തന്റെ ഔദ്യോഗിക വസതി നവീകരിക്കാൻ കോടിക്കണക്കിന് രൂപ ധൂർത്തടിച്ചുവെന്ന ആരോപണം ബിജെപി വീണ്ടും സജീവമാക്കിയിരിക്കുകയാണ്.
കെജ്രിവാളിന്റെ വസതിയിലെ അത്യാധുനിക സൗകര്യങ്ങളും വിദേശത്തുനിന്ന് ഇറക്കുമതി ചെയ്ത വിലകൂടിയ വസ്തുക്കളും ഉൾപ്പെടുന്നതാണ് പുതിയ ചിത്രങ്ങൾ. സാധാരണക്കാരന്റെ പാർട്ടിയെന്ന് അവകാശപ്പെടുന്നവർ പൊതുമുതൽ ഉപയോഗിച്ച് കൊട്ടാരതുല്യമായ സൗകര്യങ്ങൾ ഒരുക്കിയതിനെ ബിജെപി രൂക്ഷമായി വിമർശിച്ചു. ഡൽഹിയിലെ ജനങ്ങൾ അടിസ്ഥാന സൗകര്യങ്ങൾക്കായി ബുദ്ധിമുട്ടുമ്പോൾ മുഖ്യമന്ത്രി ആഡംബര ജീവിതം നയിക്കുകയാണെന്നും, ഇത് ജനങ്ങളോടുള്ള വെല്ലുവിളിയാണെന്നും ബിജെപി നേതാക്കൾ ആരോപിച്ചു.
രാഘവ് ചദ്ദയുടെ പാർട്ടി മാറ്റം ആം ആദ്മി പാർട്ടിയിൽ ആഭ്യന്തര കലഹം രൂക്ഷമാണെന്നതിന്റെ തെളിവാണെന്ന് ബിജെപി ചൂണ്ടിക്കാട്ടി. പാർട്ടിക്കുള്ളിലെ വിശ്വസ്തർ പോലും കെജ്രിവാളിനെ കൈവിടുകയാണെന്നും ബിജെപി വക്താക്കൾ പരിഹസിച്ചു. ഈ രാഷ്ട്രീയ സാഹചര്യത്തെ കെജ്രിവാളിന്റെ അഴിമതി മുഖം തുറന്നുകാട്ടാനുള്ള അവസരമായാണ് ബിജെപി ഉപയോഗിക്കുന്നത്. എന്നാൽ ഈ ആരോപണങ്ങൾ രാഷ്ട്രീയ പ്രേരിതമാണെന്നും വരാനിരിക്കുന്ന തെരഞ്ഞെടുപ്പുകൾ ലക്ഷ്യമിട്ടുള്ള ബിജെപിയുടെ തന്ത്രമാണിതെന്നും ആം ആദ്മി പാർട്ടി വൃത്തങ്ങൾ പ്രതികരിച്ചു.
ബിജെപി നേതാവ് പർവേഷ് വർമ്മ പുറത്തുവിട്ട ചിത്രങ്ങൾ പൂർണ്ണമായും വ്യാജമാണെന്ന് എഎപി നേതാവും എംഎൽഎയുമായ അതിഷി തിരിച്ചടിച്ചു. ബിജെപി പുറത്തുവിട്ട ദൃശ്യങ്ങൾ കെജ്രിവാളിന്റെ വസതിയിലേതല്ലെന്നും ജനങ്ങളെ തെറ്റിദ്ധരിപ്പിക്കാനുള്ള ശ്രമമാണെന്നും അവർ ആരോപിച്ചു. ആരുടെ വീടാണ് കൂടുതൽ ആഡംബരപൂർണ്ണമെന്ന് തീരുമാനിക്കാൻ ബിജെപി നേതാവ് രേഖ ഗുപ്തയും ഡൽഹി എൽജി വി.കെ. സക്സേനയും അവരുടെ വീടുകൾ പൊതുജനങ്ങൾക്കായി തുറന്നുനൽകാൻ തയ്യാറാകണമെന്ന് അതിഷി വെല്ലുവിളിച്ചു. അങ്ങനെ ചെയ്താൽ കെജ്രിവാളും തന്റെ വീട് തുറന്നുനൽകുമെന്നും ആരുടെ ജീവിതമാണ് ആഡംബരമെന്ന് പൊതുജനങ്ങൾ തീരുമാനിക്കട്ടെ എന്നും അതിഷി വ്യക്തമാക്കി.
