കോൺഗ്രസ് ഓഫീസിലേക്ക് ബി.ജെ.പി മാർച്ച്; ‘വന്ദേമാതരം’ പാടിച്ച് കോൺഗ്രസ് പ്രവർത്തകർ; മുഴുവൻ പാടാനാവാതെ വിയർത്ത് യുവമോർച്ച നേതാവ് | Yuvamorcha Leader Vande Mataram Viral Video

ലഖ്‌നൗ: ‘വന്ദേമാതര’ത്തെ കോൺഗ്രസ് അപമാനിച്ചുവെന്ന് ആരോപിച്ച് പ്രതിഷേധിക്കാനെത്തിയ ബി.ജെ.പി യുവജന വിഭാഗം നേതാവ് ക്യാമറയ്ക്ക് മുന്നിൽ വന്ദേമാതരം പാടാനാവാതെ വിയർത്തു(Yuvamorcha Leader Vande Mataram Viral Video). ഉത്തർപ്രദേശിലെ വാരാണസിയിലെ മഹാനഗർ യുവമോർച്ച പ്രസിഡന്റ് രജത് ജയ്സ്വാളാണ് പ്രതിഷേധത്തിനിടെ നാണംകെട്ടോടിയത്.

കോൺഗ്രസ് ഓഫീസിലേക്കാണ് രജത് ജയ്സ്വാൾ പ്രവർത്തകരെ സംഘടിപ്പിച്ച് പ്രതിഷേധവുമായി എത്തിയത്. കോൺഗ്രസിനെതിരെ മുദ്രാവാക്യം വിളിച്ച് മുന്നേറുന്നതിനിടെ, സ്ഥലത്തുണ്ടായിരുന്ന കോൺഗ്രസ് പ്രവർത്തകർ ക്യാമറകൾക്ക് മുന്നിൽ വന്ദേമാതരം മുഴുവനായി ഒന്ന് പാടിക്കേൾപ്പിക്കാൻ ബി.ജെ.പി നേതാവിനെ വെല്ലുവിളിക്കുകയായിരുന്നു. എന്നാൽ, വരികൾ കൃത്യമായി പാടാനാവാതെ പരുങ്ങിയ നേതാവ്, കോൺഗ്രസുകാരോട് കയർക്കാൻ ശ്രമിക്കുകയും ഒടുവിൽ പന്തിയല്ലെന്ന് കണ്ട് അണികളോടൊപ്പം വേഗത്തിൽ സ്ഥലംവിടുകയും ചെയ്തു. ഇതിന്റെ വീഡിയോ സമൂഹമാധ്യമങ്ങളിൽ വൈറലായതോടെ വലിയ പരിഹാസവും വിമർശനവുമാണ് ബി.ജെ.പിക്കെതിരെ ഉയരുന്നത്.

പ്രതിഷേധിക്കാൻ വന്നു നാണംകെട്ടു! | Yuvamorcha Leader Vande Mataram Viral Video

സ്വാതന്ത്ര്യദിനാഘോഷ ചടങ്ങുകൾക്കിടെ കോൺഗ്രസ് നേതാക്കൾ വന്ദേമാതരത്തോട് അനാദരവ് കാണിച്ചുവെന്ന് ആരോപിച്ച് രാജ്യവ്യാപകമായി ബി.ജെ.പിയും യുവമോർച്ചയും പ്രതിഷേധ പ്രകടനങ്ങൾ നടത്തിവരികയായിരുന്നു. ഇതിന്റെ ഭാഗമായാണ് വാരാണസിയിലും യുവമോർച്ച മഹാനഗർ പ്രസിഡന്റ് രജത് ജയ്സ്വാളിന്റെ നേതൃത്വത്തിൽ പ്രവർത്തകർ സംഘടിച്ച് പ്രകടനം നടത്തിയത്.

പ്രതിഷേധം നടക്കുന്ന സ്ഥലത്ത് കോൺഗ്രസ് പ്രവർത്തകരും മാധ്യമപ്രവർത്തകരും തടിച്ചുകൂടിയിരുന്നു. കോൺഗ്രസ് ദേശവിരുദ്ധമാണെന്നും ദേശീയഗീതത്തെ അവഹേളിച്ചുവെന്നും ബി.ജെ.പി നേതാക്കൾ ആരോപിച്ചതോടെയാണ് കാര്യങ്ങൾ മാറിമറിഞ്ഞത്.

നിങ്ങൾ ഇത്രയധികം ദേശസ്‌നേഹം പറയുന്നവരാണെങ്കിൽ, മാധ്യമങ്ങൾക്ക് മുന്നിൽ വെച്ച് ഇപ്പോൾ വന്ദേമാതരം മുഴുവനായി പാടി കേൾപ്പിക്കാമോ എന്ന് കോൺഗ്രസ് പ്രവർത്തകർ രജത് ജയ്സ്വാളിനോട് ആവശ്യപ്പെട്ടു. ആദ്യമൊന്ന് പതറിയ നേതാവ് വരികൾ ഓർത്തെടുക്കാൻ ശ്രമിച്ചെങ്കിലും പാടാൻ സാധിച്ചില്ല.

തുടർന്ന് വിഷയത്തിൽനിന്ന് തെന്നിമാറാനായി അദ്ദേഹം കോൺഗ്രസ് പ്രവർത്തകരോട് മറ്റ് കാര്യങ്ങൾ പറഞ്ഞ് തർക്കിക്കാൻ തുടങ്ങി. എന്നാൽ, പ്രതിഷേധക്കാർ ചോദ്യത്തിൽ ഉറച്ചുനിൽക്കുകയും ക്യാമറകൾ മുഴുവൻ തനിക്ക് നേരെ തിരിയുകയും ചെയ്തതോടെ, പരുങ്ങലിലായ രജത് ജയ്സ്വാൾ പ്രവർത്തകർക്കൊപ്പം അവിടെനിന്ന് വേഗത്തിൽ പിൻവാങ്ങുകയായിരുന്നു.

വീഡിയോ സോഷ്യൽ മീഡിയയിൽ വൈറൽ | Yuvamorcha Leader Vande Mataram Viral Video

സംഭവസ്ഥലത്തുണ്ടായിരുന്നവർ മൊബൈൽ ഫോണിൽ പകർത്തിയ 44 സെക്കൻഡ് ദൈർഘ്യമുള്ള വീഡിയോ ദൃശ്യങ്ങളാണ് എക്‌സ് ഉൾപ്പെടെയുള്ള പ്ലാറ്റ്ഫോമുകളിൽ കാട്ടുതീ പോലെ പടർന്നത്. ദേശീയ മാധ്യമപ്രവർത്തകരും പ്രമുഖ സോഷ്യൽ മീഡിയ അക്കൗണ്ടുകളും ഈ വീഡിയോ വ്യാപകമായി പങ്കുവെച്ചു.

പ്രമുഖ മാധ്യമപ്രവർത്തകൻ നരേന്ദ്ര പ്രതാപ് എക്‌സിൽ കുറിച്ചത് ഇങ്ങനെയാണ്: ”യു.പിയിലെ വാരാണസിയിൽ ബി.ജെ.പി യുവമോർച്ച മഹാനഗർ അധ്യക്ഷൻ രജത് ജയ്സ്വാളിന് വന്ദേമാതരം പാടാൻ കഴിഞ്ഞില്ല. കോൺഗ്രസ് വന്ദേമാതരത്തെ അപമാനിച്ചുവെന്ന് ആരോപിച്ച് സ്വന്തം പ്രവർത്തകർക്കൊപ്പം പ്രതിഷേധിക്കാൻ എത്തിയതായിരുന്നു അദ്ദേഹം. എന്നാൽ, ഗാനം പാടാൻ ആവശ്യപ്പെട്ടപ്പോൾ കോൺഗ്രസ് പ്രവർത്തകരെത്തന്നെ വെല്ലുവിളിക്കാൻ ശ്രമിക്കുകയും, ഒടുവിൽ സംഗതി കുടുക്കിലാകുമെന്ന് കണ്ടതോടെ അവിടെനിന്ന് സ്ഥലംവിടുകയുമായിരുന്നു.”

ദേശീയതലത്തിലെ വിവാദവും ബി.ജെ.പിയുടെ പ്രതിരോധവും | Yuvamorcha Leader Vande Mataram Viral Video

സ്വാതന്ത്ര്യദിനത്തിൽ എ.ഐ.സി.സി ആസ്ഥാനത്ത് നടന്ന പതാക ഉയർത്തൽ ചടങ്ങിനിടെ സോണിയാ ഗാന്ധിയും മറ്റ് മുതിർന്ന നേതാക്കളും വന്ദേമാതരത്തോട് അനാദരവ് കാട്ടിയെന്ന് ആരോപിച്ച് ബി.ജെ.പി വലിയ പ്രചാരണം നടത്തിവരുന്ന പശ്ചാത്തലത്തിലാണ് സംഭവം നടക്കുന്നത്. വിവിധ സംസ്ഥാനങ്ങളിൽ സോണിയാ ഗാന്ധിക്കും രാഹുൽ ഗാന്ധിക്കുമെതിരെ പോലീസിൽ പരാതി നൽകാൻ ബി.ജെ.പി ആഹ്വാനം ചെയ്തിരുന്നു.

എന്നാൽ, പ്രധാനമന്ത്രിയുടെ സ്വന്തം മണ്ഡലമായ വാരാണസിയിൽ തന്നെ യുവമോർച്ചയുടെ പ്രധാന നേതാവ് വന്ദേമാതരം പാടാനാവാതെ പതറിപ്പോയത് കോൺഗ്രസിനും പ്രതിപക്ഷ പാർട്ടികൾക്കും വലിയ രാഷ്ട്രീയ ആയുധമായി മാറിയിരിക്കുകയാണ്. ബി.ജെ.പിയുടെ ‘ദേശസ്‌നേഹ സർട്ടിഫിക്കറ്റ് വിതരണ’ത്തിന്റെ സത്യാവസ്ഥ ഇതോടെ വെളിച്ചത്തായെന്ന് കോൺഗ്രസ് വൃത്തങ്ങൾ പരിഹസിച്ചു.