ക്ഷേത്രത്തിൽ നിന്നും ആഭരണങ്ങൾ കവർന്നു; കോട്ടയത്ത് ബിജെപി നേതാവ് അറസ്റ്റിൽ

കോട്ടയം: നീണ്ടൂർ മൂഴിക്കുളങ്ങര ഭഗവതി ക്ഷേത്രത്തിൽ നിന്നും സ്വർണാഭരണങ്ങളും വെള്ളിയങ്കിയും മോഷ്ടിച്ച കേസിൽ ബിജെപി പ്രാദേശിക നേതാവ് അറസ്റ്റിലായി. നീണ്ടൂർ സ്വദേശിയായ സനൽ നമ്പൂതിരിപ്പാടിനെയാണ് ഏറ്റുമാനൂർ പോലീസ് പിടികൂടിയത്.

കഴിഞ്ഞ ദിവസം പുലർച്ചെ പൂജാരി ശ്രീകോവിലിൽ നിന്നും പുറത്തിറങ്ങിയ സമയത്താണ് പ്രതി അകത്തുകയറി മോഷണം നടത്തിയത്. ഒന്നര ലക്ഷം രൂപ വിലമതിക്കുന്ന സ്വർണമാല, വെള്ളി അങ്കി, വെള്ളിമാല എന്നിവയാണ് ഇയാൾ കവർന്നത്. മുൻപ് തദ്ദേശ തെരഞ്ഞെടുപ്പിൽ ബിജെപി സ്ഥാനാർത്ഥിയായിരുന്ന സനൽ മണ്ഡലം പ്രസിഡന്റ് ചുമതലയും വഹിച്ചിട്ടുണ്ട്. അറസ്റ്റ് രേഖപ്പെടുത്തിയ പ്രതിയെ കോടതിയിൽ ഹാജരാക്കി റിമാൻഡ് ചെയ്തു.