ഇസ്ലാമാബാദ് ചർച്ചകൾ ഫലം കണ്ടില്ല; അമേരിക്കയും ഇറാനും തമ്മിൽ ധാരണയായില്ല, പാകിസ്ഥാനിൽ നിന്ന് മടങ്ങി ജെ.ഡി വാൻസ്
ഇസ്ലാമാബാദ്: പതിറ്റാണ്ടുകൾക്ക് ശേഷം അമേരിക്കയും ഇറാനും തമ്മിൽ നടന്ന ആദ്യത്തെ നേരിട്ടുള്ള ഉന്നതതല ചർച്ചകൾ കരാറില്ലാതെ പിരിഞ്ഞു. യുഎസ് വൈസ് പ്രസിഡന്റ് ജെ.ഡി വാൻസും ഇറാന്റെ മുതിർന്ന പ്രതിനിധികളും തമ്മിൽ ഇസ്ലാമാബാദിൽ വെച്ച് നടന്ന മാരത്തോൺ ചർച്ചകളിൽ പ്രധാന വിഷയങ്ങളിൽ സമവായത്തിലെത്താൻ കഴിഞ്ഞില്ലെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. ഇതേ തുടർന്ന് ജെ.ഡി വാൻസിൻ്റെ നേതൃത്വത്തിലുള്ള യുഎസ് സംഘം പാകിസ്ഥാൻ വിട്ടു.
രണ്ടാഴ്ചത്തെ വെടിനിർത്തൽ നിലനിൽക്കുന്നുണ്ടെങ്കിലും, സ്ഥിരമായ ഒരു സമാധാന കരാറിലേക്ക് നീങ്ങാൻ ഇരുരാജ്യങ്ങളും മുന്നോട്ടുവെച്ച കർശന നിബന്ധനകളാണ് ചർച്ചകൾക്ക് തടസ്സമായത്. ഹോർമുസ് കടലിടുക്ക് ഉടനടി കപ്പൽ ഗതാഗതത്തിനായി തുറന്നുകൊടുക്കുക, ഇറാന്റെ ആണവ കേന്ദ്രങ്ങളിലെ അവശിഷ്ടങ്ങൾ നീക്കം ചെയ്യാൻ അമേരിക്കയെ അനുവദിക്കുക തുടങ്ങിയ ആവശ്യങ്ങളാണ് അമേരിക്കൻ സംഘം ഉയർത്തിയത്. അതേസമയം, തങ്ങൾക്കെതിരെയുള്ള എല്ലാ സാമ്പത്തിക ഉപരോധങ്ങളും നീക്കുക, മേഖലയിൽ നിന്നുള്ള യുഎസ് സൈനിക പിന്മാറ്റം തുടങ്ങിയ ഉപാധികളിൽ വിട്ടുവീഴ്ച ചെയ്യാൻ ഇറാനും തയ്യാറായില്ല. ഇരുപക്ഷവും തങ്ങളുടെ ഉപാധികളിൽ ഉറച്ചുനിന്നതോടെ ചർച്ചകൾ തീരുമാനമാകാതെ അവസാനിക്കുകയായിരുന്നു.
ചർച്ചകൾക്ക് ശേഷം ജെ.ഡി വാൻസ് കരാറിൽ എത്താനായില്ലെന്ന് വ്യക്തമാക്കിയതായി റിപ്പോർട്ടുകൾ സൂചിപ്പിക്കുന്നു. ഇറാന്റെ ഭാഗത്തുനിന്ന് വ്യക്തമായ ഉറപ്പുകൾ ലഭിക്കാതെ ഉപരോധങ്ങൾ നീക്കാനാവില്ലെന്ന കടുത്ത നിലപാടിലാണ് ട്രംപ് ഭരണകൂടം. എന്നാൽ, ചർച്ചകൾ പൂർണമായും പരാജയപ്പെട്ടുവെന്ന് പറയാനാകില്ലെന്നും, നയതന്ത്ര ചാനലുകൾ വഴി സംഭാഷണങ്ങൾ തുടരുമെന്നും പാക് വൃത്തങ്ങൾ സൂചിപ്പിക്കുന്നുണ്ട്.
ചർച്ചകൾ ഫലം കാണാത്തത് മേഖലയിലെ വെടിനിർത്തലിനെ ബാധിക്കുമോ എന്ന ആശങ്ക ഉയർത്തുന്നു. ഇസ്രയേൽ അതിർത്തികളിൽ സംഘർഷം ഇപ്പോഴും നിലനിൽക്കുന്ന സാഹചര്യത്തിൽ, ഇസ്ലാമാബാദിലെ പരാജയം യുദ്ധം വീണ്ടും ആരംഭിക്കുന്നതിലേക്ക് നയിച്ചേക്കാമെന്ന് രാഷ്ട്രീയ നിരീക്ഷകർ ഭയപ്പെടുന്നു. വരും ദിവസങ്ങളിൽ മധ്യസ്ഥ രാജ്യങ്ങൾ ഇടപെട്ട് പുതിയൊരു ഫോർമുല അവതരിപ്പിക്കാനാണ് സാധ്യത.
