അഖിലേഷ് യാദവ് ചായ കുടിക്കാൻ കയറി; പിന്നാലെ ടീസ്റ്റാളിൽ റെയ്ഡ്, മനംനൊന്ത് കട പൂട്ടി
ലഖ്നൗ: ഉത്തർപ്രദേശിലെ ഫത്തേപൂരിലെ പ്രശസ്തമായ ചായക്കട അധികൃതരുടെ നിരന്തരമായ പീഡനത്തെത്തുടർന്ന് അടച്ചുപൂട്ടി. ഭക്ഷ്യസുരക്ഷാ വകുപ്പും പ്രാദേശിക ഭരണകൂടവും തന്നെ വേട്ടയാടുന്നുവെന്ന് ആരോപിച്ചാണ് നടപടി. സമാജ്വാദി പാർട്ടി അധ്യക്ഷൻ അഖിലേഷ് യാദവ് കട സന്ദർശിച്ച് ചായ കുടിച്ചതിന് പിന്നാലെയാണ് ഉദ്യോഗസ്ഥരുടെ പ്രതികാര നടപടി തുടങ്ങിയതെന്ന് കടയുടമ ശേഷ്മാൻ യാദവ് ആരോപിച്ചു. രാഷ്ട്രീയ പകപോക്കലിന്റെ ഇരയാണ് താനെന്നും ഇനി കട നടത്താൻ കഴിയില്ലെന്നും വ്യക്തമാക്കിയാണ് ആര്യൻ യാദവ് തന്റെ സ്ഥാപനം അടച്ചത്.
ഏതാനും ദിവസങ്ങൾക്ക് മുമ്പാണ് അഖിലേഷ് യാദവ് ഫത്തേപൂർ സന്ദർശിച്ചത്. സന്ദർശന വേളയിൽ അദ്ദേഹം ശേഷ്മാൻ യാദവിന്റെ ചായക്കടയിൽ കയറുകയും അവിടെ ഇരുന്ന് ചായ കുടിക്കുകയും ചെയ്തിരുന്നു. ഇതിന്റെ ചിത്രങ്ങളും വീഡിയോകളും സോഷ്യൽ മീഡിയയിൽ വലിയ രീതിയിൽ പ്രചരിക്കുകയും ചെയ്തു. എന്നാൽ അഖിലേഷിന്റെ സന്ദർശനത്തിന് തൊട്ടുപിന്നാലെ സ്ഥിതിഗതികൾ മാറിമറിഞ്ഞു.
എന്നാൽ ഏപ്രിലിൽ, ചായയുടെ ഗുണനിലവാരം പരിശോധിക്കാനെന്ന പേരിൽ ഉദ്യോഗസ്ഥർ എത്തി. ചായ തിളപ്പിക്കാൻ എന്തിനാണ് അലുമിനിയം പാത്രങ്ങൾ ഉപയോഗിക്കുന്നത് എന്ന് ഉദ്യോഗസ്ഥർ ചോദിച്ചതായി ശേഷ്മാൻ ‘ദി ഇന്ത്യൻ എക്സ്പ്രസിനോട്’ പറഞ്ഞു. ‘വർഷങ്ങളായി തങ്ങൾ അലുമിനിയം പാത്രങ്ങളാണ് ഉപയോഗിക്കുന്നത്, അന്നൊന്നും ആർക്കും പരാതി ഉണ്ടായിരുന്നില്ല. ചായയുടെ സാമ്പിൾ പരിശോധനയ്ക്കായി കൊണ്ടുപോകുന്നത് എവിടെയെങ്കിലും കേട്ടു കേൾവിയുള്ളതാണോ?’ – അദ്ദേഹം ചോദിച്ചു. സാധാരണക്കാരനായ തന്നെ മാനസികമായി തകർക്കാനാണ് ഉദ്യോഗസ്ഥർ ശ്രമിക്കുന്നതെന്നും അദ്ദേഹം കൂട്ടിച്ചേർത്തു.
ഭക്ഷ്യസുരക്ഷാ വകുപ്പിലെ ഉദ്യോഗസ്ഥർ കടയിൽ തുടർച്ചയായി പരിശോധനകൾ നടത്താൻ തുടങ്ങിയെന്ന് ശേഷ്മാൻ പറയുന്നു. ‘അഖിലേഷ് ജി വന്നതിന് ശേഷം അധികൃതർ എന്നെ ലക്ഷ്യമിടുകയാണ്. മുമ്പ് ഒരിക്കലും ഉണ്ടാകാത്ത തരത്തിലുള്ള പരിശോധനകളാണ് ഇപ്പോൾ നടക്കുന്നത്. നിയമങ്ങൾ ലംഘിക്കുന്നുവെന്ന് പറഞ്ഞ് അവർ എന്നെ മാനസികമായി പീഡിപ്പിക്കുന്നു,’ ശേഷ്മാൻ യാദവ് മാധ്യമങ്ങളോട് പറഞ്ഞു.
അതേസമയം, ആരോപണങ്ങൾ ജില്ലാ ഭരണകൂടം നിഷേധിച്ചു. ഐജിആർഎസ് പോർട്ടൽ വഴി ചായയുടെ ഗുണനിലവാരത്തെക്കുറിച്ച് ലഭിച്ച പരാതിയുടെ അടിസ്ഥാനത്തിലാണ് പരിശോധന നടത്തിയതെന്നാണ് ഭക്ഷ്യസുരക്ഷാ വകുപ്പിന്റെ വാദം. ഇത് സ്വാഭാവികമായ നടപടി മാത്രമാണെന്നും ആരെയും ലക്ഷ്യം വെച്ചിട്ടില്ലെന്നും അധികൃതർ അറിയിച്ചു.
വർഷങ്ങളായി താൻ ഈ ചായക്കട നടത്തിവരികയാണെന്നും ഇതുവരെ യാതൊരുവിധ പരാതികളും ഉയർന്നിട്ടില്ലെന്നും ശേഷ്മാൻ ചൂണ്ടിക്കാട്ടി. അധികൃതരുടെ ഭാഗത്തുനിന്നുള്ള സമ്മർദം താങ്ങാനാവില്ലെന്നും തനിക്ക് ജീവിക്കാൻ മറ്റ് വഴികൾ തേടേണ്ടി വരുമെന്നും അദ്ദേഹം കൂട്ടിച്ചേർത്തു. കടയുടെ ഷട്ടർ താഴ്ത്തുന്ന വീഡിയോ സോഷ്യൽ മീഡിയയിൽ വൈറലായിട്ടുണ്ട്. ‘ഞാൻ എന്റെ കട അടയ്ക്കുകയാണ്. എനിക്ക് ഇനിയും ഇത് സഹിക്കാൻ വയ്യ,’ എന്ന് അദ്ദേഹം വീഡിയോയിൽ വികാരാധീനനായി പറയുന്നത് കാണാം.
സംഭവം ഉത്തർപ്രദേശിൽ വലിയ രാഷ്ട്രീയ വിവാദത്തിന് തിരികൊളുത്തിയിരിക്കുകയാണ്. ബിജെപി സർക്കാർ പ്രതിപക്ഷത്തോട് ആഭിമുഖ്യം കാണിക്കുന്ന സാധാരണക്കാരെ പോലും വേട്ടയാടുകയാണെന്ന് സമാജ്വാദി പാർട്ടി കുറ്റപ്പെടുത്തി. ഒരു ചായക്കടക്കാരൻ മുൻ മുഖ്യമന്ത്രിക്ക് ചായ നൽകുന്നത് എങ്ങനെയാണ് കുറ്റകരമാകുകയെന്ന് പാർട്ടി വക്താക്കൾ ചോദിച്ചു. സാധാരണക്കാരുടെ ഉപജീവനമാർഗം ഇല്ലാതാക്കുന്ന നടപടിയാണ് ഇതെന്ന് സോഷ്യൽ മീഡിയയിലും കടുത്ത വിമർശനം ഉയരുന്നുണ്ട്.
