കങ്കണയും രാഹുലും വിവാഹിതരാകുന്നു? സത്യാവസ്ഥ വെളിപ്പെടുത്തി താരം

ന്യൂഡൽഹി: കോൺഗ്രസ് നേതാവ് രാഹുൽ ഗാന്ധിയെ താൻ വിവാഹം കഴിക്കാൻ തയ്യാറാണെന്ന തരത്തിൽ സോഷ്യൽ മീഡിയയിൽ പ്രചരിക്കുന്ന വാർത്തകൾ നിഷേധിച്ച് ബിജെപി എംപിയും നടിയുമായ കങ്കണ റണാവത്ത്. രാഷ്ട്രീയ ചർച്ചകളിൽ പോലും സ്ത്രീകൾക്ക് അർഹമായ മാന്യത നൽകുന്നില്ലെന്ന് ചൂണ്ടിക്കാട്ടിയ കങ്കണ, വ്യാജവാർത്തകൾ പ്രചരിപ്പിക്കുന്നവർക്കെതിരെ രൂക്ഷമായ ഭാഷയിലാണ് പ്രതികരിച്ചത്.

‘രാഹുൽ ഗാന്ധി ബിജെപിയിൽ ചേരുകയാണെങ്കിൽ അദ്ദേഹത്തെ വിവാഹം കഴിക്കാൻ ഞാൻ തയ്യാറാണ്’ എന്ന വാചകത്തോടെ കങ്കണയുടെയും രാഹുലിന്റെയും ചിത്രം ഇൻസ്റ്റാഗ്രാമിലെ ഒരു മീം പേജാണ് ആദ്യം പ്രചരിപ്പിച്ചത്. ഇത് പിന്നീട് വലിയ രീതിയിലുള്ള ചർച്ചകൾക്കും ട്രോളുകൾക്കും വഴിവെച്ചു. എന്നാൽ മെയ് 4-ന് തന്റെ ഇൻസ്റ്റാഗ്രാം സ്റ്റോറിയിലൂടെ താരം വാർത്ത പൂർണമായും തള്ളി.

“ഈ വ്യാജ വാർത്ത എത്രത്തോളം ദയനീയമാണ്. രാഷ്ട്രീയത്തിൽ പോലും സ്ത്രീകൾക്ക് മാന്യത നൽകുന്നില്ല. ഇത്തരം കള്ളങ്ങൾ പ്രചരിപ്പിക്കുന്നവർ ലജ്ജിക്കണം,” കങ്കണ കുറിച്ചു. വിശ്വസനീയമായ യാതൊരു ഉറവിടവുമില്ലാതെയാണ് ഇത്തരം വ്യാജ ഉദ്ധരണികൾ പ്രചരിക്കുന്നതെന്ന് സോഷ്യൽ മീഡിയയിലെ ഒരു വിഭാഗം കങ്കണയെ പിന്തുണച്ച് രംഗത്തെത്തിയിരുന്നു.

നേരത്തെയും രാഹുൽ ഗാന്ധിയുടെ നിലപാടുകളെയും പ്രസംഗങ്ങളെയും കങ്കണ പരസ്യമായി വിമർശിച്ചിട്ടുണ്ട്. ഒരു രാഷ്ട്രീയ നേതാവ് എന്ന നിലയിൽ തനിക്കെതിരെ നടക്കുന്ന വ്യക്തിഹത്യയെയും സ്ത്രീവിരുദ്ധമായ ഇത്തരം വ്യാജ പ്രചരണങ്ങളെയും ശക്തമായി നേരിടുമെന്ന നിലപാടിലാണ് കങ്കണ റണാവത്ത്.