അമ്മയും കുഞ്ഞും കിണറ്റിൽ വീണു, രക്ഷിക്കാൻ ചാടി അയൽവാസി; മൂന്നുപേരെയും രക്ഷപ്പെടുത്തി അഗ്നിരക്ഷാസേന
തൃശൂർ: ചാലക്കുടി മേലൂരിൽ കിണറ്റിൽ വീണ അമ്മയെയും ആറുവയസ്സുകാരിയായ മകളെയും, ഇവരെ രക്ഷിക്കാനിറങ്ങിയ അയൽവാസിയെയും അഗ്നിരക്ഷാസേനയും നാട്ടുകാരും ചേർന്ന് രക്ഷപ്പെടുത്തി. മേലൂർ കുന്ന് സ്വദേശി പുതുശ്ശേരി വീട്ടിൽ സൈന സന്തോഷ്, മകൾ അന്ന സന്തോഷ് എന്നിവരാണ് അപകടത്തിൽപ്പെട്ടത്.
അമ്മയും കുഞ്ഞും കിണറ്റിൽ വീണതറിഞ്ഞ് രക്ഷപ്പെടുത്താനായി അയൽവാസിയായ ജോഷി ഉടൻ തന്നെ കിണറ്റിലിറങ്ങിയെങ്കിലും മൂവർക്കും മുകളിലേക്ക് കയറാനായില്ല. തുടർന്ന് മൂവരും കയറിൽ പിടിച്ച് കിടക്കുകയായിരുന്നു. വിവരമറിഞ്ഞ് സ്ഥലത്തെത്തിയ ചാലക്കുടി ഫയർ സ്റ്റേഷനിലെ അസിസ്റ്റന്റ് സ്റ്റേഷൻ ഓഫീസർ ആർ.കെ രമേശ്, സീനിയർ ഫയർ ആൻഡ് റെസ്ക്യൂ ഓഫീസർ സനൽ ജ്യോതി എന്നിവരുടെ നേതൃത്വത്തിലുള്ള സംഘം മൂവരെയും സുരക്ഷിതമായി പുറത്തെത്തിച്ചു.
ഫയർ ആൻഡ് റെസ്ക്യൂ ഓഫീസർ അനിൽ മോഹൻ കിണറ്റിലിറങ്ങി നെറ്റ് ഉപയോഗിച്ചാണ് മൂവരെയും മുകളിലേക്ക് കയറ്റിയത്. സേനാംഗങ്ങളായ രതീഷ് പി.ആർ, ആദർശ് എസ്.എ, അരുൺ കെ, അഖിൽ ആർ നായർ, അരുൺ വി.എൻ, സൂരജ് കുമാർ, വിൻസി ഡേവിസ് എന്നിവരും രക്ഷാപ്രവർത്തനത്തിൽ പങ്കാളികളായി.
