കോട്ടയത്ത് സ്വകാര്യ ബസ് കയറിയിറങ്ങി രണ്ട് യുവതികൾക്ക് ദാരുണാന്ത്യം
കോട്ടയം: പാമ്പാടി പതിമൂന്നാം മൈലിൽ സ്വകാര്യ ബസ് ഇടിച്ച് മീനടം സ്വദേശികളായ രണ്ട് യുവതികൾക്ക് ദാരുണാന്ത്യം. മീനടം സ്വദേശിനികളായ ആഷ്‌ലി (25), കൃപ (24) എന്നിവരാണ് മരിച്ചത്. കട്ടപ്പനയിൽ നിന്ന് കോട്ടയം ഭാഗത്തേക്ക് വരികയായിരുന്ന ‘സിഎംഎസ്’ എന്ന സ്വകാര്യ ബസിനടിയിൽപ്പെട്ടാണ് അപകടമുണ്ടായത്.
യുവതികൾ സഞ്ചരിച്ച സ്കൂട്ടറിന് തൊട്ടുമുൻപിൽ പോയ കാർ പെട്ടെന്ന് ബ്രേക്ക് ചെയ്തതാണ് അപകടത്തിന് കാരണമായത്. തുടർന്ന് പിന്നാലെ വന്ന സ്‌കൂട്ടർ പെട്ടെന്ന് ബ്രേക്ക് ചെയ്തതോടെ നിയന്ത്രണം തെറ്റി മറിയുകയും, യുവതികൾ റോഡിലേക്ക് തെറിച്ചുവീഴുകയുമായിരുന്നു. ഈ സമയം എതിർദിശയിൽ വന്ന ‘സിഎംഎസ്’ സ്വകാര്യ ബസ് ഇവരുടെ ശരീരത്തിലൂടെ കയറിയിറങ്ങുകയായിരുന്നു. ഇരുവരും സംഭവസ്ഥലത്തുതന്നെ അന്ത്യശ്വാസം വലിച്ചു.
അപകടത്തെ തുടർന്ന് സ്ഥലത്ത് ചെറിയ തോതിൽ ഗതാഗത തടസ്സമുണ്ടായി. പൊലീസെത്തി മേൽനടപടികൾ സ്വീകരിച്ച ശേഷം, മൃതദേഹങ്ങൾ പോസ്റ്റ്‌മോർട്ടത്തിനായി കോട്ടയം മെഡിക്കൽ കോളേജ് ആശുപത്രിയിലേക്ക് മാറ്റി.
