ട്രംപിന് സ്വർണം പൂശിയ തോക്ക് നൽകി റജബ് ത്വയ്യിബ് ഉർദുഗാൻ
അങ്കാറ: നാറ്റോ ഉച്ചകോടിക്കിടെ അമേരിക്കൻ പ്രസിഡന്റ് ഡൊണാൾഡ് ട്രംപിന് സ്വർണ്ണം പൂശിയ ഒരു റിവോൾവർ സമ്മാനമായി നൽകി തുർക്കി പ്രസിഡന്റ് റജബ് ത്വയ്യിബ് ഉർദുഗാൻ. ഉച്ചകോടിയിൽ പങ്കെടുത്ത എല്ലാ നാറ്റോ നേതാക്കൾക്കും ഉർദുഗാൻ അവരുടെ പേര് കൊത്തിയ റിവോൾവറുകൾ സമ്മാനിച്ചിരുന്നെങ്കിലും, ട്രംപിന് നൽകിയതിൽ മാത്രമാണ് പ്രത്യേകമായി സ്വർണ്ണം പൂശിയ പിടി ഉണ്ടായിരുന്നത്. തുർക്കിയിൽ നിർമ്മിച്ച ‘ഗുമുഷായ് .357 മാഗ്നം’ മോഡൽ തോക്കാണ് ട്രംപിന് ലഭിച്ചത്. തുർക്കിയുടെ ദേശീയ പതാകയും നാറ്റോ ലോഗോയും പതിച്ച മനോഹരമായ തടിയുടെ പെട്ടിയിലാണ് ഇത് സൂക്ഷിച്ചിരുന്നത്. തുർക്കിയിൽ ആദ്യമായി നിർമ്മിച്ച റിവോൾവർ ടൈപ്പ് തോക്കാണിതെന്ന് വ്യക്തമാക്കുന്ന ഒരു കുറിപ്പും ഇതിനൊപ്പം ഉണ്ടായിരുന്നു.
ഉർദുഗാനും ട്രംപും തമ്മിലുള്ള സവിശേഷമായ വ്യക്തിബന്ധത്തിന്റെയും ഇരുരാജ്യങ്ങളും തമ്മിൽ അടുത്തുവരുന്ന നയതന്ത്ര ബന്ധത്തിന്റെയും തെളിവാണ് ഈ പ്രത്യേക സമ്മാനമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ. റഷ്യയിൽ നിന്ന് എസ്400 മിസൈൽ പ്രതിരോധ സംവിധാനം വാങ്ങിയതിനെത്തുടർന്ന് തുർക്കിക്കുമേൽ അമേരിക്ക ഏർപ്പെടുത്തിയിരുന്ന ഉപരോധങ്ങൾ വരും മാസങ്ങളിൽ ട്രംപ് ഭരണകൂടം പിൻവലിച്ചേക്കുമെന്ന റിപ്പോർട്ടുകൾക്കിടയിലാണ് ഈ കൂടിക്കാഴ്ച നടന്നത്. സ്വന്തം രാജ്യത്തിന്റെ വളർന്നുവരുന്ന പ്രതിരോധ വ്യവസായ ശേഷി ലോകനേതാക്കൾക്ക് മുന്നിൽ പ്രദർശിപ്പിക്കുന്നതിന്റെ ഭാഗമായാണ് ഉർദുഗാൻ ഇത്തരമൊരു സമ്മാനം തിരഞ്ഞെടുത്തത്. ആഗോളതലത്തിൽ ചെറുകിട ആയുധങ്ങൾ കയറ്റുമതി ചെയ്യുന്നതിൽ ലോകത്തിൽ മൂന്നാം സ്ഥാനത്താണ് നിലവിൽ തുർക്കി.
അതേസമയം, ഉച്ചകോടിക്ക് ശേഷം ലോകനേതാക്കൾക്ക് പ്രവർത്തനക്ഷമമായ തോക്കുകളും വെടിയുണ്ടകളും സമ്മാനമായി നൽകിയ ഉർദുഗാന്റെ നടപടി പല രാജ്യങ്ങളുടെയും സുരക്ഷാനയതന്ത്ര വിഭാഗങ്ങളെ വലിയ പ്രതിസന്ധിയിലാക്കിയിരുന്നു. കടുത്ത ആയുധ നിയന്ത്രണ നിയമങ്ങളുള്ള യൂറോപ്യൻ രാജ്യങ്ങളിലെ നേതാക്കൾക്ക് ഇത് കൈകാര്യം ചെയ്യുന്നത് കടുത്ത വെല്ലുവിളിയായി മാറി. ബ്രിട്ടീഷ് പ്രധാനമന്ത്രി കീർ സ്റ്റാമർ, ജർമ്മൻ ചാൻസലർ ഫ്രീഡ്രിക്ക് മെർസ് എന്നിവർക്ക് നിയമപരമായ തടസ്സങ്ങൾ കാരണം തോക്കുകൾ സ്വന്തം നാട്ടിലേക്ക് കൊണ്ടുപോകാൻ സാധിക്കാതെ അങ്കാറയിലെ തങ്ങളുടെ എംബസികളിൽ തന്നെ ഏൽപ്പിക്കേണ്ടി വന്നു. ബെൽജിയം പ്രധാനമന്ത്രി ബാർട്ട് ഡി വെവർ എയർപോർട്ട് പോലീസിന് തോക്ക് കൈമാറിയപ്പോൾ, യൂറോപ്യൻ കമ്മീഷൻ പ്രസിഡന്റ് ഉർസുല വോൺ ഡെർ ലെയൻ തന്റെ സമ്മാനം ഒരു മിലിട്ടറി മ്യൂസിയത്തിന് സംഭാവന ചെയ്യാനാണ് തീരുമാനിച്ചത്.
