ആനക്കൊമ്പ് കേസ്: വിവരങ്ങൾ വനംവകുപ്പിന് കൈമാറി മോഹൻലാൽ; കൈവശമുള്ളത് 2 ജോഡി കൊമ്പുകളും 13 കരകൗശല വസ്തുക്കളും
കൊച്ചി: ആനക്കൊമ്പ് കേസുമായി ബന്ധപ്പെട്ട് തന്റെ കൈവശമുള്ള ആനക്കൊമ്പുകളുടെയും മറ്റ് വസ്തുക്കളുടെയും വിശദാംശങ്ങൾ നടൻ മോഹൻലാൽ വനംവകുപ്പിന് ഔദ്യോഗികമായി കൈമാറി. വനംവകുപ്പ് പ്രഖ്യാപിച്ച ഒറ്റത്തവണ വെളിപ്പെടുത്തൽ നടപടിക്രമങ്ങളുടെ ഭാഗമായാണ് അദ്ദേഹം ഈ വിവരങ്ങൾ സമർപ്പിച്ചത്. ഇതിനായി വനംവകുപ്പ് ഉദ്യോഗസ്ഥർ മോഹൻലാലിന്റെ കൊച്ചിയിലെ വസതിയിലെത്തി വിശദാംശങ്ങൾ ശേഖരിക്കുകയായിരുന്നു.
രണ്ട് ജോഡി ആനക്കൊമ്പുകളും, ആനക്കൊമ്പിൽ നിർമ്മിച്ച 13 കരകൗശല വസ്തുക്കളുമാണ് തന്റെ കൈവശമുള്ളതെന്ന് മോഹൻലാൽ ഉദ്യോഗസ്ഥരെ അറിയിച്ചു. ഈ വസ്തുക്കൾ തനിക്ക് എങ്ങനെ ലഭിച്ചു എന്നതിനെക്കുറിച്ചുള്ള കൃത്യമായ വിശദീകരണവും അദ്ദേഹം നൽകിയിട്ടുണ്ട്. ഉദ്യോഗസ്ഥർ തയ്യാറാക്കിയ ഇൻവെന്ററി റിപ്പോർട്ട് തുടർനടപടികൾക്കായി മേലുദ്യോഗസ്ഥർക്ക് സമർപ്പിക്കും.
വർഷങ്ങൾക്ക് മുൻപ് മോഹൻലാലിന്റെ വസതിയിൽ ആദായനികുതി വകുപ്പ് നടത്തിയ പരിശോധനയിലാണ് ഈ ആനക്കൊമ്പുകൾ ആദ്യമായി കണ്ടെത്തിയത്. തുടർന്ന് വനംവകുപ്പ് ഇവ കസ്റ്റഡിയിലെടുക്കുകയും ഉടമസ്ഥാവകാശം സംബന്ധിച്ച തർക്കങ്ങൾ ആരംഭിക്കുകയും ചെയ്തു. പിന്നീട് മോഹൻലാലിന് സർക്കാർ ഇവയുടെ ഉടമസ്ഥാവകാശം നൽകിയെങ്കിലും, നടപടിക്രമങ്ങളിൽ വീഴ്ചയുണ്ടായെന്ന് ചൂണ്ടിക്കാട്ടി ഹൈക്കോടതി ഇത് റദ്ദാക്കുകയായിരുന്നു.
ഹൈക്കോടതിയുടെ നിർദ്ദേശപ്രകാരം, അനധികൃതമായി വന്യജീവി ഉൽപ്പന്നങ്ങൾ കൈവശമുള്ളവർക്ക് അത് വെളിപ്പെടുത്താൻ വനംവകുപ്പ് പ്രത്യേക നോട്ടിഫിക്കേഷൻ ഇറക്കിയിരുന്നു. ഈ സെൽഫ് ഡിക്ലറേഷൻ പദ്ധതി പ്രകാരം അപേക്ഷിക്കുന്നവർക്ക് തുടർ നിയമനടപടികളിൽ നിന്ന് പരിരക്ഷ ലഭിക്കും. ഈ ആനുകൂല്യം ഉപയോഗപ്പെടുത്തിയാണ് മോഹൻലാൽ ഇപ്പോൾ വിവരങ്ങൾ കൈമാറിയിരിക്കുന്നത്.
വനംവകുപ്പ് തയ്യാറാക്കിയ റിപ്പോർട്ടും മറ്റ് നിയമവശങ്ങളും വിശദമായി പരിശോധിച്ച ശേഷം ചീഫ് വൈൽഡ് ലൈഫ് വാർഡനായിരിക്കും മോഹൻലാലിന് ഉടമസ്ഥാവകാശം നൽകുന്ന കാര്യത്തിൽ അന്തിമ തീരുമാനം കൈക്കൊള്ളുക.
