അത്താഴത്തിന് ശേഷം മധുരം കഴിക്കാൻ തോന്നാറില്ലേ? ഇതാണ് കാരണം
അത്താഴം കഴിഞ്ഞ ഉടൻ മധുരമുള്ള എന്തെങ്കിലും കഴിക്കാൻ കൊതിക്കുന്നത് പലരും നേരിടുന്ന പ്രധാന പ്രശ്നമാണ്. ചോക്ലേറ്റിനോടോ മറ്റ് മധുരപലഹാരങ്ങളോടോ തോന്നുന്ന ഇത്തരം ആസക്തികൾ ശരീരത്തിൽ മഗ്നീഷ്യം പോലെയുള്ള പോഷകങ്ങളുടെ കുറവ് മൂലമാണെന്ന പ്രചാരണം സോഷ്യൽ മീഡിയയിൽ ശക്തമാണ്. എന്നാൽ, രാത്രിയിലെ മധുരക്കൊതിക്ക് പിന്നിൽ ഒരൊറ്റ പോഷകത്തിന്റെ കുറവ് മാത്രമല്ലെന്ന് ആരോഗ്യ വിദഗ്ധർ ചൂണ്ടിക്കാണിക്കുന്നു.
ദിവസം മുഴുവൻ നിങ്ങൾ എങ്ങനെ ഭക്ഷണം കഴിച്ചു, ഉറങ്ങി, സമ്മർദ്ദം കൈകാര്യം ചെയ്തു എന്നിവയുമായി ഇതിന് വലിയ ബന്ധമുണ്ട്. പലരും പ്രഭാതഭക്ഷണം ഒഴിവാക്കുകയോ ഉച്ചയ്ക്ക് വളരെ കുറച്ച് മാത്രം ആഹാരം കഴിക്കുകയോ ചെയ്യാറുണ്ട്. വൈകുന്നേരം കൂടുതൽ കാപ്പി കുടിച്ച് ക്ഷീണം മാറ്റാനും ശ്രമിക്കുന്നു. ഇതിലൂടെ പകൽ ഉണ്ടാകുന്ന ഊർജ്ജക്കുറവ് നികത്താൻ ശരീരം രാത്രിയിൽ ശ്രമിക്കുമ്പോഴാണ് പെട്ടെന്ന് ഊർജം നൽകുന്ന മധുരത്തോടുള്ള ആഗ്രഹം പ്രത്യക്ഷപ്പെടുന്നത്.
ഭക്ഷണരീതിയിലെ മറ്റ് ചില പ്രധാന കാരണങ്ങൾ താഴെ പറയുന്നവയാണ്
- ശീലങ്ങളും സംസ്കാരവും: ആഹാരത്തിനു ശേഷം മധുരപലഹാരം കഴിക്കുന്ന ശീലം കുട്ടിക്കാലം മുതലേ പലരിലുമുണ്ട്. കാലക്രമേണ തലച്ചോറ് ഈ പ്രതിഫലം പ്രതീക്ഷിക്കാൻ തുടങ്ങുകയും, മധുരം കഴിച്ചില്ലെങ്കിൽ ഭക്ഷണം അപൂർണമാണെന്ന് തോന്നിക്കുകയും ചെയ്യുന്നു.
- കാർബോഹൈഡ്രേറ്റിന്റെ അളവ്: രാത്രി ഭക്ഷണത്തിൽ അരി, റൊട്ടി എന്നിവ കൂടുതലാവുകയും പ്രോട്ടീനും നാരുകളും കുറയുകയും ചെയ്യുന്നത് വയറു നിറയാത്ത അവസ്ഥയുണ്ടാക്കാം.
- സമ്മർദ്ദവും ക്ഷീണവും: മാനസിക സമ്മർദ്ദമുള്ള ദിവസങ്ങളിൽ ആശ്വാസത്തിനായി തലച്ചോറ് മധുരമുള്ള ഭക്ഷണങ്ങളിലേക്ക് ആകർഷിക്കപ്പെടുന്നത് സ്വാഭാവിക ജൈവിക പ്രതികരണമാണ്.
- ഉറക്കക്കുറവ്: ഉറക്കം കുറയുമ്പോൾ വിശപ്പ് നിയന്ത്രിക്കുന്ന ഹോർമോണുകളിൽ വ്യതിയാനം വരികയും മധുരത്തോടുള്ള കൊതി വർധിക്കുകയും ചെയ്യുന്നു.
ഗ്ലൂക്കോസ് മെറ്റബോളിസത്തിൽ മഗ്നീഷ്യം പ്രധാന പങ്ക് വഹിക്കുന്നുണ്ടെങ്കിലും, എല്ലാ മധുരക്കൊതിക്കും കാരണം മഗ്നീഷ്യം കുറവാണെന്ന് കരുതുന്നത് തെറ്റാണ്. അതിനാൽ മധുരക്കൊതി അനുഭവപ്പെടുമ്പോൾ ഏതെങ്കിലും സപ്ലിമെന്റുകൾ കഴിക്കുന്നതിന് പകരം, പകൽ സമയത്ത് ആവശ്യത്തിന് പോഷക സമ്പന്നമായ ഭക്ഷണം കഴിക്കുന്നുണ്ടോ എന്നും കൃത്യമായി ഉറങ്ങുന്നുണ്ടോ എന്നും സ്വയം വിലയിരുത്തുകയാണ് വേണ്ടത്.
