സർക്കാർ രൂപീകരിക്കാൻ നെതന്യാഹുവിനെ ഒഴിവാക്കി ലിക്കുഡ് പാർട്ടിയുടെ പിന്തുണ തേടി ഐസൻകോട്ട്
തെൽ അവീവ്: ഇസ്രയേലിൽ സർക്കാർ രൂപീകരിക്കാനുള്ള നിർണ്ണായക നീക്കങ്ങളുമായി ഗാഡി ഐസൻകോട്ട്. ഐക്യസർക്കാർ രൂപീകരിക്കുകയാണ് തന്റെ ലക്ഷ്യമെന്ന് വ്യക്തമാക്കിയ അദ്ദേഹം, ബെഞ്ചമിൻ നെതന്യാഹുവിന്റെ ലിക്കുഡ് പാർട്ടിയുടെ പിന്തുണ പരസ്യമായി തേടി. ഐക്യത്തിനുള്ള സമയമാണിതെന്ന് വിശ്വസിക്കുന്നുണ്ടെങ്കിൽ ലിക്കുഡ് അംഗങ്ങൾ തന്റെ നേതൃത്വത്തിലുള്ള സർക്കാരിനെ പിന്തുണയ്ക്കണമെന്ന് ഐസൻകോട്ട് ആവശ്യപ്പെട്ടു. എന്നാൽ നെതന്യാഹുവിനെ പൂർണ്ണമായും ഒഴിവാക്കിക്കൊണ്ടാണ് ഐസൻകോട്ടിന്റെ ഈ നീക്കം എന്നത് ശ്രദ്ധേയമാണ്.
നെതന്യാഹുവിന്റെ പ്രധാന എതിരാളിയായി തെരഞ്ഞെടുപ്പിൽ മത്സരിച്ച ഐസൻകോട്ടിന് പുതിയ സർക്കാർ രൂപീകരിക്കാൻ ഇനി ആറാഴ്ചത്തെ സമയം കൂടിയാണ് ബാക്കിയുള്ളത്. 28 ദിവസത്തിനുള്ളിൽ ഐസൻകോട്ടിന് സർക്കാർ രൂപീകരിക്കാൻ സാധിച്ചില്ലെങ്കിൽ ഇസ്രയേൽ പ്രസിഡന്റിന് സർക്കാർ രൂപീകരിക്കാൻ മറ്റൊരു നേതാവിനെ ചുമതലപ്പെടുത്താം. ആവശ്യമെങ്കിൽ ഇതിനായി 14 ദിവസത്തെ അധിക സമയവും അനുവദിക്കും. ഇതും പരാജയപ്പെട്ടാൽ പാർലമെന്റായ നെസെറ്റിന് മറ്റൊരു അവസരം നൽകാനും, ഒടുവിൽ രാജ്യം വീണ്ടും തെരഞ്ഞെടുപ്പിലേക്ക് നീങ്ങാനും സാധ്യതയുണ്ട്. 2019-2020 കാലയളവിൽ തുടർച്ചയായ തെരഞ്ഞെടുപ്പുകൾക്കൊടുവിലും ഭൂരിപക്ഷ സർക്കാർ രൂപീകരിക്കാൻ കഴിയാതിരുന്ന സാഹചര്യത്തിൽ നെതന്യാഹു തന്നെയായിരുന്നു കാവൽ പ്രധാനമന്ത്രിയായി തുടർന്നിരുന്നത്.
നിലവിൽ അറബ് ഭൂരിപക്ഷമുള്ള ജോയിൻ്റ് ലിസ്റ്റ് സഖ്യം ഐസൻകോട്ടിന് പിന്തുണ പ്രഖ്യാപിച്ചിട്ടുണ്ട്. മറ്റൊരു അറബ് പാർട്ടിയായ റാമും നേരത്തെ പിന്തുണ അറിയിച്ചിരുന്നു. ഇതോടെ 120 അംഗ നെസെറ്റിൽ ഐസൻകോട്ടിന് 67 അംഗങ്ങളുടെ പിന്തുണ ലഭിക്കുമെന്നാണ് കണക്കാക്കുന്നത്. സർക്കാർ രൂപീകരിക്കാൻ ആവശ്യമായ 61 സീറ്റുകളേക്കാൾ ആറ് സീറ്റുകൾ അധികമാണിത്. എന്നാൽ, അറബ് പാർട്ടികളുടെ പിന്തുണ സ്വീകരിക്കുന്ന കാര്യത്തിൽ ഐസൻകോട്ടും സഖ്യകക്ഷികളും ഇതുവരെ അന്തിമവും വ്യക്തവുമായ നിലപാട് പ്രഖ്യാപിച്ചിട്ടില്ല.
ഒക്ടോബർ 27-ന് നടന്ന തെരഞ്ഞെടുപ്പിൽ നെതന്യാഹുവിനോ ഐസൻകോട്ടിനോ ഒറ്റയ്ക്ക് സർക്കാർ രൂപീകരിക്കാനുള്ള കേവല ഭൂരിപക്ഷം ലഭിച്ചിരുന്നില്ല. നെതന്യാഹുവിൻ്റെ നേതൃത്വത്തിലുള്ള തീവ്ര വലതുപക്ഷ സഖ്യത്തിന് 53 സീറ്റുകളും, ഐസൻകോട്ടിന്റെ പ്രതിപക്ഷ സഖ്യത്തിന് 48 സീറ്റുകളുമാണ് ലഭിച്ചത്. അറബ് പാർട്ടികളായ റാമിനും ജോയിൻ്റ് ലിസ്റ്റിനും കൂടി ആകെ 19 സീറ്റുകളാണ് ലഭിച്ചത് (റാമിന് 8 സീറ്റുകൾ, ഹദാഷ്-തഅൽ-ബലാദ് എന്നീ പാർട്ടികൾ ഉൾപ്പെട്ട ജോയിൻ്റ് ലിസ്റ്റിന് 11 സീറ്റുകൾ).
2023 ഒക്ടോബർ ഏഴിന് ഹമാസ് നടത്തിയ ആക്രമണത്തിന് പിന്നാലെ രൂപീകരിച്ച നെതന്യാഹുവിന്റെ അടിയന്തര യുദ്ധകാല സർക്കാരിൽ മുൻ ഇസ്രയേൽ സൈനിക മേധാവികളായ ബെന്നി ഗാൻ്റ്സും ഗാഡി ഐസൻകോട്ടും പങ്കാളികളായിരുന്നു. 2020-ൽ നെതന്യാഹുവും ബെന്നി ഗാന്റ്സും തമ്മിൽ സമാനമായ രീതിയിൽ അധികാര പങ്കിടൽ കരാറുണ്ടാക്കിയിരുന്നെങ്കിലും ഗാൻ്റ്സിന് പ്രധാനമന്ത്രി പദം ലഭിക്കുന്നതിന് മുമ്പ് തന്നെ ആ സർക്കാർ തകർന്നു. എന്നാൽ നെതന്യാഹുവിൻ്റെ കീഴിൽ ഇനി ഒരിക്കലും പ്രവർത്തിക്കില്ലെന്ന് ഐസൻകോട്ട് പലതവണ വ്യക്തമാക്കിയിട്ടുണ്ട്. നെതന്യാഹുവിനെ അധികാരത്തിൽ നിന്ന് പുറത്താക്കുക എന്നതായിരുന്നു പ്രതിപക്ഷത്തിൻ്റെ പ്രധാന തെരഞ്ഞെടുപ്പ് വാഗ്ദാനവും.