ഇന്ത്യൻ സുരക്ഷയ്ക്ക് ഭീഷണി: യുഎസ് കൂലിപ്പട്ടാളക്കാരനും ആറ് യുക്രെയ്ൻ സ്വദേശികളും എൻഐഎ പിടിയിൽ
ന്യൂഡൽഹി: മിസോറാം അതിർത്തി വഴി ഇന്ത്യയുടെ സുരക്ഷാ മേഖലകളിൽ അതിക്രമിച്ചു കയറിയതിനും വിഘടനവാദി ഗ്രൂപ്പുകളെ സഹായിച്ചതിനും കുപ്രസിദ്ധ അമേരിക്കൻ കൂലിപ്പട്ടാളക്കാരൻ മാത്യു വാൻഡൈക്കിനെയും ആറ് യുക്രെയ്ൻ പൗരന്മാരെയും ദേശീയ അന്വേഷണ ഏജൻസി (എൻഐഎ) അറസ്റ്റ് ചെയ്തു. കൊൽക്കത്ത, ഡൽഹി, ലഖ്നൗ വിമാനത്താവളങ്ങളിൽ നിന്നാണ് ഇവരെ പിടികൂടിയത്. ലിബിയൻ ആഭ്യന്തര യുദ്ധത്തിലും ഇറാഖിൽ ഐഎസിനെതിരെയുള്ള പോരാട്ടത്തിലും പങ്കെടുത്ത ചരിത്രമുള്ളയാളാണ് മാത്യു വാൻഡൈക്ക്.
അനുമതിയില്ലാതെ മിസോറാമിലെ നിയന്ത്രിത മേഖലകളിൽ പ്രവേശിക്കുകയും അവിടെനിന്ന് നിയമവിരുദ്ധമായി മ്യാൻമറിലേക്ക് കടക്കുകയും ചെയ്തുവെന്നാണ് ഇവർക്കെതിരെയുള്ള പ്രധാന ആരോപണം. മ്യാൻമറിലെ വംശീയ സായുധ ഗ്രൂപ്പുകൾക്ക് ആധുനിക ഡ്രോൺ യുദ്ധമുറകളിൽ പരിശീലനം നൽകാനും ആയുധങ്ങൾ എത്തിക്കാനും ഇവർ പദ്ധതിയിട്ടിരുന്നതായി എൻഐഎ കണ്ടെത്തി. വടക്കുകിഴക്കൻ ഇന്ത്യയിലെ വിമത ഗ്രൂപ്പുകളുമായി ഈ സംഘത്തിന് ബന്ധമുണ്ടെന്നും എഫ്ഐആറിൽ പറയുന്നു.
പെട്രോ ഹുർബ, താരാസ് സ്ലൈവിയാക് ഉൾപ്പെടെയുള്ള യുക്രെയ്ൻ സ്വദേശികളാണ് പിടിയിലായ മറ്റുള്ളവർ. വിദേശത്തുനിന്ന് ഇറക്കുമതി ചെയ്ത ഡ്രോണുകളും ജാമിംഗ് സാങ്കേതികവിദ്യയും ഉപയോഗിച്ച് തീവ്രവാദ പ്രവർത്തനങ്ങൾക്ക് സഹായം നൽകുകയായിരുന്നു ഇവരുടെ ലക്ഷ്യം. പ്രതികളെ പട്യാല ഹൗസ് കോടതി 11 ദിവസത്തെ എൻഐഎ കസ്റ്റഡിയിൽ വിട്ടു. യുഎപിഎ (UAPA) നിയമപ്രകാരമാണ് ഇവർക്കെതിരെ കേസെടുത്തിരിക്കുന്നത്. ഇന്ത്യയുടെ വടക്കുകിഴക്കൻ അതിർത്തിയിലെ സുരക്ഷാ ക്രമീകരണങ്ങളെ അട്ടിമറിക്കാനുള്ള അന്താരാഷ്ട്ര ഗൂഢാലോചനയാണ് ഇതിലൂടെ പുറത്തുവരുന്നത്.
